පසුගිය මැයි 09 වනිදා හිටපු අගමැති මහින්ද රාජපක්ෂට පක්ෂපාතී පිරිස් විසින් ගාලු මුවදොර සාමකාමී උද්ඝෝෂණයේ නිරත පිරිසට එල්ල කළ මැර ප්රහාරය ට මොහොතකට පෙර හිටපු අමාත්ය ජොන්ස්ටන් ප්රනාන්දු අරලියගහ මන්දිරයට රැස්ව සිටි පිරිස අමතමින් සිදු කරන ලද ආන්දෝලනයට තුඩු දුන් කතාව පිළිබඳව මනෝවෛද්ය මතය විමර්ශනයක් කිරීමට බලාපොරොත්තු වන අතිරේක සොලිසිටර් ජනරාල් අයේෂා ජිනසේන අද කොටුව මහෙස්ත්රාත් අධිකරණය හමුවේ කියා සිටියාය.
ඒ අනුව එම කතාව මනෝ වෛද්යවරුන් දෙදෙනකු වෙත යොමු කිරීමට කටයුතු කරන බව අතිරේක සොලිසටර් ජනරාල්වරිය කීවාය. ඇය මේ බව ප්රකාශ කළේ එම ප්රහාරයට අදාල මහෙස්ත්රාත් පරීක්ෂණය කොටුව මහෙස්ත්රාත් අධිකරණයේදී විභාගයට ගත් අවස්ථාවේදීය.
එහිදී අපරාධ පරීක්ෂණ දෙපාර්තමේන්තුව වෙනුවෙන් වැඩිදුර විමර්ශන වාර්තාවක් ඉදිරිපත් කළ අතිරේක සොලිසිටර් ජනරාල්වරිය සඳහන් කළේ මෙම නඩුවේ සැකකරුවෙකු ලෙස පාර්ලිමේන්තු මන්ත්රී ජොන්ස්ටන් ප්රනාන්දු නම් කිරීමට ද පියවර ගන්නා බවය.
ඊට අමතරව මහින්ද කහඳගම, දිලිත් ප්රනාන්දු සහ නිශාන්ත ජයසිංහ මෙම නඩුවේ සෙසු සැකකරුවන් ලෙස නම් කිරීමටද අතිරේක සොලිසිටර් ජනරාල්වරිය මහේස්ත්රාත්වරයාගෙන් ඉල්ලා සිටියාය.
ජනාධිපති නීතිඥ උපුල් ජයසුරිය අගතියට පත් පාර්ශවය වෙනුවෙන් මහෙස්ත්රාත් හමුවේ කරුණු දක්වමින් සඳහන් කළේ මෙම මැර ප්රහාරය වළකවා නොගැනීම සම්බන්ධයෙන් ප්රධාන සැකකරුවෙකු ලෙස නම්කළ යුතු ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් මෙතෙක් සැකකරුවෙකු ලෙස නම් නොකිරීම පුදුමයට හේතුවක් බවයි.
එසේම ඒ සම්බන්ධයෙන් අගතියට පත් පාර්ශවය නියෝජනය කළ ජනාධිපති නීතිඥ සරත් ජයමාන්න ද මෙම ප්රහාරය ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන්ට වළක්වා ගත හැකිව තිබූ එකක් වුවද ඊට පෙර දිනයේ පොලිස්පතිවරයා ලිඛිත උපදෙස් දී තිබියදීත් මෙම සිද්ධිය වැළැක්වීමට ඔහු ක්රියා නොකළ බව අධිකරණය හමුවේ පෙන්වා දුන්නේය.
මේ කතාවත් කියවන්න…
ජොනී අරලියගහ මන්දිරයේ දී “ කපුටෙක් මරා තට්ටක් එල්ලීමට පෙර“…. විනාශයක් නිර්මාණය කරන අයුරු…..
