මනම්පිටිය නිමල් ජයරත්න –
-
වන අලියා ඝාතනය කළ පොලිස් නිලධාරීන් අත් අඩංගුවට ගන්න ගිය අවස්ථාවේ දී බකමුණ ඕඅයිසී වනජීවී නිලධාරීන්ගේ රාජකාරියට බාධා කර අත් අඩංගුවට ගැනීම වළක්වලා…
බකමූණ පොලිසියේ නිළධාරින් පිරිසක් වන අලියෙකු වෙඩි තබා ඝාතනය කර ඇතැයි ඇලහැර වනජීවී කාර්යාලය පවසයි.
මෙම සාහසික ඝාතනය සිදුවී ඇත්තේ දඹුල්ල – බකමූණ ප්රධාන මාර්ගයේ දම්පුරගම මංසන්ධියේදී ඊයේ (15) රාත්රී 11.45 ට පමණය.
වන අලියාට වෙඩි තබා ඇත්තේ බකමූණ පොලිසියේ රාත්රී මුර සංචාරයේ යෙදෙන පොලිස් නිළධාරීන් කිහිපදෙනෙකු බව ඒ පිළිබඳ පරීක්ෂණ පවත්වන ඇළහැර අඩවි ආරක්ෂක සුනිල් සාන්ත අප කළ විමසීමකදී සඳහන් කළේය.
ඝාතනය කර ඇත්තේ වයස අවුරුදු 35 ක් පමණ වයසැති උස අඩි අටකින් යුත් සද්දන්ත පිරිමි වන අලියෙකි. පොලීසියට අයත් ත්රීවිල් රථයෙන් රාත්රි මුර සංචාරයේ යෙදී සිටි පොලිස් නිළධාරීන් කිහිපදෙනාට වන අලියා පහරදීමට යෑමෙදී පොලිස් නිළධාරීන් ඔවුන්ගේ ජීවිත ආරක්ෂාවට වෙඩි තබා ඇති බව පොලිසිය කියයි.
වන අලියාට වෙඩි තැබූ පොලිස් නිලධාරීන් අත්අඩංගුවට ගැනීම සඳහා බකමූණ පොලිසියට තමන් ඇතුළු වනජීවී නිලධාරී කණ්ඩායමක් ගිය මොහොතේදී එහි පොලිස් ස්ථානාධිපතිවරයා වන අලියාට වෙඩි තබා ඇත්තේ, මුර සංචාරයේ යෙදුන පොලිස් නිලධාරීන්ගේ ජීවිත ආරක්ෂාව උදෙසා බව ප්රකාශ කරමින් ඔවුන් අත්අඩංගුවට ගැනීම ප්රතික්ෂේප කිරීමට කටයුතු කළ බවද ඇළහැර අඩවි ආරක්ෂක සුනිල් ශාන්ත වැඩිදුරටත් පැවසීය.
පොලිස් නිලධාරීන් අත්අඩංගුවට ගැනීම සඳහා බකමූණ සංචාරක මහේස්ත්රාත් අධිකරණයට බී වාර්තාවක් මගින් අද (16 ) කරුණු වාර්තා කිරීමට කටයුතු කරන බවද ඇලහැර වන අඩිවි ආරක්ෂක නිලධාරියා කීවේය.
වන අලියාට පොලිසියෙන් වෙඩි තැබීමේ සිද්ධිය පිළිබඳව අප බකමූණ පොලිස් ස්ථානාධිපති පොලිස් පරීක්ෂක උපුල් බොලුකඳුරගෙන් කළ විමසීමකදී ඔහු සඳහන් කළේ ඉදිරි විමර්ශන කටයුතු සිදුකිරීම සඳහා අදාළ පොලිස් නිලධාරීන් කීපදෙනා අද 16 වෙනිදා ඇළහැර අඩවි ආරක්ෂක කාර්යාලයට භාරදීමට කටයුතු කරන බවය.
වෙඩි ප්රහාරයෙන් මියගිය වන අලියාගේ පශ්චාත් මරණ පරීක්ෂණ කටයුතු ගිරිතලේ වනජීවී පශු වෛද්ය සමීර කළුගුආරච්චි ඇතුළු වනජීවි නිලධාරීන් විසින් 16 වෙනිදා දහවල් සිදුකිරීමට නියමිත බවද ඇළහැර අඩවි ආරක්ෂක සුනිල් ශාන්ත අප කළ විමසීමකදී වැඩිදුරටත් කීවේය.
