නිසි ප්රමිතියෙන් තොර ගල් අඟුරු ආනයනය කිරීම හේතුවෙන් රජයට රුපියල් කෝටි 224කට ආසන්න අතිවිශාල පාඩුවක් සිදුව ඇති බව ජාතික විගණන කාර්යාලය විසින් නිකුත් කරන ලද නවතම විගණන වාර්තාවකින් අනාවරණය කර තිබේ.
ගල් අඟුරු ප්රසම්පාදන ක්රියාවලිය සම්බන්ධයෙන් සිදුකළ මෙම විශේෂ විගණනයේදී හෙළි වී ඇත්තේ, ලක්විජය බලාගාරය සඳහා ආනයනය කළ ගල් අඟුරු නැව් කිහිපයකම අඩංගු වූ තොග නියමිත ප්රමිතියෙන් තොර වීම මෙම දැවැන්ත මූල්ය පාඩුවට සෘජුවම හේතු වී ඇති බවයි.
නැව් අනුව සිදුව ඇති පාඩුව විගණනයෙන් පෙන්වා දී ඇත්තේ මෙලෙසිනි:
- පළමු නැව (තොග අංක 456): රු. කෝටි 16කට වැඩි පාඩුවක්
- දෙවැනි නැව (තොග අංක 457): රු. කෝටි 09කට වැඩි පාඩුවක්
- තෙවැනි නැව (තොග අංක 458): රු. කෝටි 31කට වැඩි පාඩුවක්
- සිව්වැනි නැව (තොග අංක 459): රු. කෝටි 15කට වැඩි පාඩුවක්
- පස්වැනි නැව (තොග අංක 460): රු. කෝටි 18කට ආසන්න පාඩුවක්
- හයවැනි නැව (තොග අංක 461): රු. කෝටි 30කට ආසන්න පාඩුවක්
- හත්වැනි නැව (තොග අංක 462): රු. කෝටි 24කට වැඩි පාඩුවක්
- අටවැනි නැව (තොග අංක 463): රු. කෝටි 39කට වැඩි පාඩුවක්
- දහවැනි නැව (තොග අංක 464): රු. කෝටි 39කට වැඩි පාඩුවක්
විදුලි ජනනයට එල්ල වූ බරපතළ බලපෑම
මෙම ප්රමිතියෙන් තොර ගල් අඟුරු භාවිත කිරීම හේතුවෙන් බලාගාරයේ යන්ත්රවලින් එහි පූර්ණ ධාරිතාව වන මෙගාවොට් 300ක බලශක්තියක් නිපදවීමට නොහැකි වී ඇති බවද විගණන වාර්තාව වැඩිදුරටත් පෙන්වා දෙයි.
ඒ අනුව, ජාතික විදුලි පද්ධතියට අහිමි වූ එම බලශක්ති ප්රමාණය වෙනත් විකල්ප මූලාශ්රයකින් (ඩීසල් හෝ දැවි තෙල් වැනි ඉහළ පිරිවැයක් සහිත මූලාශ්ර) උත්පාදනය කිරීමට සිදුවුවහොත්, ඒ සඳහා අතිරේකව නිපදවා ගත යුතු ඇස්තමේන්තුගත බලශක්ති ප්රමාණය කිලෝවොට් පැය 76,354,087ක් (76.3 GWh) බව එම වාර්තාවේ සවිස්තරාත්මකව සඳහන් කර ඇත. මෙය විදුලිබල මණ්ඩලයට තවත් අතිවිශාල මූල්ය බරක් පැටවෙන තත්ත්වයක් බව බලශක්ති ක්ෂේත්රයේ ප්රවීණයෝ පෙන්වා දෙති.
- ලංකාදීප පුවතකින්
