හෝමූස් සමුද්ර සන්ධිය හරහා නිදහසේ නෞකා ගමනාගමනයට ඉඩ දීමට ඉරානය ප්රතික්ෂේප කළහොත්, අමෙරිකානු වේලාවෙන් අද රාත්රී 8.00 ට ඉරානය පුරා සිවිල් සහ හමුදා යටිතල පහසුකම් ඉලක්ක කර දැවැන්ත ප්රහාරයක් එල්ල කරන බවට අමෙරිකානු ජනාධිපති ඩොනල්ඩ් ට්රම්ප් දැඩි අනතුරු ඇඟවීමක් සිදුකර තිබේ.
තම ‘Truth Social’ ගිණුමේ විශේෂ සටහනක් තබමින් ජනාධිපති ට්රම්ප් අවධාරණය කර ඇත්තේ, මෙම ප්රහාරයත් සමඟ ඉරානයේ මුළු මහත් ශිෂ්ටාචාරයක්ම විනාශ වී යා හැකි බවයි.
“මුළු මහත් ශිෂ්ටාචාරයක්ම අද රාත්රියේ විනාශ වනු ඇති අතර, එය කිසිදා යළි ගොඩනැඟිය නොහැකි වනු ඇත. එවැන්නක් සිදුවෙනවා දැකීමට මා කැමති නැත, නමුත් බොහෝවිට එය සිදුවනු ඇත. කෙසේ වෙතත්, දැන් අපට පූර්ණ පාලන තන්ත්ර වෙනසක් ලැබී ඇති බැවින් බුද්ධිමත් සහ අඩු අන්තවාදී පිරිස් එහි බලයට පත්වනු ඇත. වසර 47ක කප්පම් ගැනීම්, දූෂණය සහ මරණය අවසානයේ නිමාවට පත්වනු ඇත. ඉරානයේ ශ්රේෂ්ඨ ජනතාවට දෙවි පිහිටයි!” යනුවෙන් ට්රම්ප් සිය සටහනේ වැඩිදුරටත් දක්වා ඇත.
ඉරානයෙන් දැඩි ප්රතිචාර සහ සන්නිවේදන අත්හිටුවීමක්
ට්රම්ප්ගේ මෙම ප්රකාශයත් සමඟ ඉරානය සහ අමෙරිකාව අතර පැවති සියලුම සෘජු සහ රහසිගත සන්නිවේදන මාර්ග (Backchannels) සම්පූර්ණයෙන්ම අත්හිටුවීමට ඉරාන රජය පියවර ගෙන ඇති බව ‘වෝල් ස්ට්රීට් ජර්නල්’ (Wall Street Journal) පුවත්පත මැදපෙරදිග රාජ්ය තාන්ත්රික නිලධාරීන් උපුටා දක්වමින් වාර්තා කරයි.
මේ අතර ඉරාන ජනාධිපති මසූද් පෙසෙෂ්කියන් සිය ‘X’ ගිණුමේ සටහනක් තබමින් ප්රකාශ කළේ, “මිලියන 14 ක් වූ නිර්භීත ඉරාන ජනතාවගේ ආරක්ෂාව වෙනුවෙන් තම දිවි පිදීමට වුවද සූදානම්” බවයි. අමෙරිකානු ප්රහාර ව්යර්ථ කිරීමේ අරමුණින් ඉරානයේ ප්රධාන විදුලි බලාගාර සහ යටිතල පහසුකම් අසල මානව දම්වැලක් (මිනිස් පළිහක්) ලෙස එක්රැස් වන ලෙස ඉරාන නියෝජ්ය ක්රීඩා අමාත්ය අලිරේසා රහිමි එරට තරුණයින්ගෙන් සහ ක්රීඩකයින්ගෙන් ඉල්ලීමක් ද කර තිබේ.
ඊශ්රායලයෙන් පාලම් 08කට සහ ගුවන්තොටුපළ 03කට ප්රහාර
අමෙරිකානු ජනාධිපතිවරයා ලබාදුන් කාලසීමාව (Deadline) අවසන් වීමට පැය කිහිපයකට පෙර ක්රියාත්මක වූ ඊශ්රායල ආරක්ෂක බලකාය (IDF), ඉරානයේ ප්රධාන නගර 05ක පිහිටි පාලම් 08ක් ඉලක්ක කර මාරාන්තික ගුවන් ප්රහාර මාලාවක් දියත් කර ඇත. මෙම ප්රහාර පහත නගර කේන්ද්ර කරගනිමින් එල්ල වී තිබේ:
- ටෙහෙරාන් (Tehran)
- කරාජ් (Karaj)
- තබ්රිස් (Tabriz)
- කෂාන් (Kashan)
- කුම් (Qom)
මීට අමතරව ඉරාන විප්ලවීය ආරක්ෂක බලකායේ (IRGC) ගුවන් හමුදාවට අයත් ටෙහෙරාන් අගනුවර අවට පිහිටි මෙහෙර්බාද්, බහරේන් සහ අසෙමිෂ් යන ගුවන් තොටුපළ ත්රිත්වයට ද ඊශ්රායලය ප්රහාර එල්ල කර ඇති අතර, එහිදී හෙලිකොප්ටර් යානා කිහිපයක් සම්පූර්ණයෙන්ම විනාශ කර ඇති බව වාර්තා වේ.
ඊශ්රායල අග්රාමාත්ය බෙන්ජමින් නෙතන්යාහු මෙම මෙහෙයුම් සම්බන්ධයෙන් අදහස් දක්වමින් පවසා ඇත්තේ, ඊශ්රායලය කිසිදා නොවූ විරූ ලෙස ශක්තිමත්ව ඉරාන ත්රස්ත පාලන තන්ත්රය විනාශ කරමින් සිටින බවයි. “අපි ක්රමානුකූලව ඔවුන්ගේ පහසුකම් විනාශ කරනවා, ජ්යෙෂ්ඨ ක්රියාකාරීන් ඝාතනය කරනවා. ඉරානය තවදුරටත් පෙර තිබූ ඉරානයම නොවෙයි,” යනුවෙන් අගමැතිවරයා අවධාරණය කළේය.
අමෙරිකානු මධ්යම විධානය (CENTCOM) නිකුත් කළ නවතම දත්තවලට අනුව, ඉරානයට එරෙහිව යුද්ධය ආරම්භ වූ දා සිට මේ දක්වා ඉරානය තුළ ඉලක්ක 13,000කට අධික සංඛ්යාවකට ප්රහාර එල්ල කර තිබේ.
