ඊයේ එනම් බදාදා තායිවානයේ රික්ටර් මාපක 7.4 ක විශාල භූමිකම්පාවක් ඇති වී තිබෙනවා.තායිවානයේ හුආලින් නගරයේ සිට සැතපුම් 11ක් පමණ නිරිත දෙසින් වන්නට එය සිදුව තිබූ බව වාර්තා වනවා.
තායිපේ වේලාවෙන් ඊයේ උදෑසන 7:58 ට පමණ කම්පනය සිදුව ඇති අතර භූමි කම්පාව හේතුවෙන් ජීවිත සහ දේපල හානි රැසක් සිදු ව තිබෙනවා.
භූමිකම්පාවෙන් තුවාල ලැබූ පුද්ගලයින් සංඛ්යාව අද වනවිට 1000 ඉක්මවා ගොස් ඇති බව විදෙස් මාධ්ය වාර්තා කර තිබෙනවා. සිදු වූ මරණ සංඛ්යාව දැක්වෙන්නේ නවයක් ලෙසයි. එරට මාධ්ය සඳහන් කරන පරිදි ඊයේ සිදු ව ඇත්තේ වසර 25 කට පසු ඇති වූ ප්රබලතම කම්පනයයි.
තායිපේ අගනුවර ගොඩනැගිලි ප්රචණ්ඩ ලෙස සෙලවීමට ලක් වූ බව ද සඳහන් වනවා. තායිවානයේ ගිනි නිවන දෙපාර්තමේන්තුව ප්රකාශ කර තිබෙන්නේ තුවාල ලැබූ පුද්ගලයින් සංඛ්යාව 1,050 දක්වා ඉහළ ගොස් ඇති බව සහ අතුරුදහන් වූවන්ගේ සංඛ්යාව 52 දක්වා ඉහළ ගොස් ඇති බවයි.
එමෙන්ම භූමි කම්පාව හේතුවෙන් පතල් කැණීමේ ප්රදේශයක සිරවී සිටි පුද්ගලයන් හය දෙනෙකු, අද හෙලිකොප්ටරයක් යොදා ගනිමින් බේරා ගැනීමට හැකි වූ බව තායිවානයේ ගිනි නිවීමේ දෙපාර්තමේන්තුව පවසා තිබෙනවා. මුදවා ගැනීමේ කණ්ඩායම් කඩා වැටුණු ගොඩනැගිලි වල සුන්බුන් අතර සෙවීමේ කටයුතු සිදු කරමින් සිටින අතර ඒ අනුව ඉදිරි දිනවලදී මරණ සංඛ්යාව තරමක් ඉහළ යා හැකි බව එරට මාධ්ය වැඩි දුරටත් වාර්තා කර තිබෙනවා.
හුආලින් හි නගරාධිපති හ්සු චෙන් වෙයි පවසන්නේ ඊයේ දවස අවසන් වන විට භයානක යැයි සැලකෙන ගොඩනැගිලිවල සිටි සියල්ලන් ඉවත් කල බවයි. භූමි කම්පාව ට මුහුණ දුන් පනස් දෙහැවිරිදි කාන්තාවක් විදෙස් මාධ්ය වෙත අදහස් දක්වමින්, තම මහල් නිවාසයේ නිදා ගැනීමට ඇති බිය නිසා ඊයේ රාත්රිය ගත කිරීමට තමන් තාවකාලික නවාතැන් සඳහා භාවිතා කරන ක්රීඩා පිටියක කූඩාරමක් තුළට ගිය බව පවසා තිබෙනවා.
