දිනසේන රතුගමගේ –
මුලතිව් කුරුදුමලේ විහාරයට අයත් බව සැලකෙන ඉඩම් ප්රමාණය මායිම් ගල් යොදා වෙන් කොට දීමට ජනාධිපතිවරයා ගත් තීරණය මෙන්ම වවුනියාවේ නෙඩුන්කේණී වෙඩුක්කුනාරී ආදී ලිංගේස්වර හින්දු කෝවිල සඳහා අයත් ඉඩම් ප්රමාණයද වෙන් කොට දෙන ලෙස ඉල්ලා පිරිසක් නෙඩුන්කේණී නගරයේදී 25 දා උද්ඝෝෂණයක් පවත්වනු ලැබීය.
වර්ෂ 2014න් පසුව නෙඩුන්කේණී වෙඩුක්කුනාරී ආදී ලිංගේස්වර හින්දු කෝවිල ලෙස මෙම පිරිස හඳුන්වන්නේ පෞරාණික වඩ්ඪමාන පබ්බත විහාරය ය.
ජනාධිපතිවරයා කුරුදුමලේ විහාරය සම්බන්ධයෙන් ගත් තීරණය ඇගයීමට ලක් කරමින් සටන් පාඨ කියූ මෙම උද්ඝෝෂණකරුවෝ වඩ්ඪාමන පබ්බත විහාරය ලෙස සාධක සහිතව හඳුනාගෙන තිබෙන පුරාවිද්යා භූමිය වෙඩුක්කුනාරී ආදී ලිංගේස්වර හින්දු කෝවිල ලෙස සිය අයිතිය තහහවුරු කොට දීමට ජනාධිපතිවරයා මැදිහත් විය යුතු බව කියා සිටියහ.
උතුරේ හින්දු කෝවිල් ආශ්රිතව බුදු පිළිම තැබීම හා බෞද්ධ ස්තූප ඉදිකිරීම නිසා හින්දු ජනතාවට සිය ආගමික කටයුතු සිදු කරගෙන යාමට විශාල බාධාවක් එල්ල වී තිබෙන බවත් උතුරේ වැසියන්ට අයත් ඉඩම් විශාල ප්රමාණයක් පුරාවිද්යා දෙපාර්තමේන්තුව විසින් බලහත්කාරයෙන් අත්පත් කරගෙන ඇති බවත් උද්ඝෝෂණකරුවෝ කියා සිටියහ.
වඩ්ඪමාන පබ්බත විහාරය
වෙඩුක්කුනාරී ආදී ලිංගේස්වර හින්දු කෝවිල ලෙස හඳුන්වන පුරාණ වඩ්ඪමාන පබ්බත විහාරය ක්රිස්තුපූර්ව දෙවැනි සියවස තෙක් දිවෙන බෞද්ධ ඉතිහාසයක් ඇති පුදබිමකි.
ඒ බව සාධනය කරන්නේ කටාම් කෙටූ ගල් ලෙන්වල ලියැවී ඇති ක්රිස්තු පූර්ව දෙවන සියවසට අයත් බ්රාහ්මී අක්ෂර සහිත ලෙන් ලිපි මාලාවය. එම ලිපිවල සදහන් පාඨයන් පුරාවිද්යා චක්රවර්තී එල්ලාවල මේධානන්ද හිමියන් විසින් ”නැගෙනහිර හා උතුරු පළාතේ සිංහල බෞද්ධ උරුමය” නැමති ග්රන්ථයේ දක්වා ඇත්තේ මෙසේය.
- මහ ශමුද පුත ගුතශ ලෙණෙ ශගශ පරුමක
මහා සමුද්ර ගේ පුත්ර ගුතගේ ලෙණ සංඝයාටය - බමදත පුත මහ ගුතහ ලෙණේ
ප්රමුඛ බමදතගේ පුත්ර මහගුනගේ ලෙණයි. - බත වුඩ තිශහ ලෙණේ
ස්වාමි වූ චූලතිශගේ ලෙණයි. - පරුමක පුශමිත පුතශ මහ ලෙණේ අගත අනගත චතුදිශ සගශ
ප්රමුඛ පුෂමිතගේ පුත්රයාගේ මහලෙණ පැමිණි නොපැමිණි සිවිදිග සංඝයාටය.
කෙසේ වෙත්ත මේ වනවිට මේ භූමිය පිළිබඳ අයිතිය කියන හින්දු ජාතිවාදී පිරිස් කුරුඳුමලේට දුන් විසඳුම ලබා දෙන්නැයි ජනාධිපතිවරයාගෙන් ඉල්ලා සිටින්නේ ඔහු කුරුඳුමලේ ඉඩම් ප්රශ්නයය විසඳූ නිර්භීත ආකාරය ගැන ප්රසංශා කරමිනි.
