කුඩු විකුණන එක් අයෙක්වත් ඉතිරි නොකරන බවත් මැරුම් නොකා පාතාලයෙන් සහ කුඩු ජාවාරමින් ඉවත්වන ලෙසත් මහජන ආරක්ෂාව පිළිබඳ ඇමති ටිරාන් අලස් අද (16) පාතාලයට සහ කුඩු ජාවාරම්කරුවන්ට නිල වශයෙන් දැන්වූයේය.
ඇමතිවරයා මේ දැනුම්දීම සිදුකළේ ඇල්පිටිය පොලිස් කොට්ඨාසයේ ප්රජා පොලිස් කමිටු දැනුවත් කිරීම උදෙසා අම්බලන්ගොඩ ධර්මාශෝක විද්යාලයේ පැවති විශේෂ වැඩසටහනකට එක් වෙමිනි.
සංවිධානාත්මක අපරාධ කල්ලි සහ මත්ද්රව්ය මර්දන මෙහෙයුම් හෙට (17) අළුයම සිට ආරම්භ කරන බවත්, අපරාධකරුවන් සොයාගෙන පැමිණ සියල්ල නිමා කරන බවත් කී ඇමතිවරයා සියලුම බාධා මැඩගෙන මත්ද්රව්ය ජාවාරමට සහ පාතාලයට එරෙහි වැඩපිලිවෙළ දියත් කර ජූනි මස 30 වැනිදා වනවිට පවතින් ස්වරූපය සම්පූර්ණයෙන්ම වෙනස් කරන බව කීවේය.
ඇමතිවරයා මෙසේත් පැවසුවේය.
කුඩු විකුණන අයට පණිවිඩයක් දෙන්න තියනවා. අද ඉඳලා කුඩු විකුණන එක්කෙනෙක් හරි අහුවුනොත් මමනම් කියලා තියෙන්නේ ඉතිරි කරන්න එපා. ඒගොල්ලන්ට මම අද දෙන පණිවිඩය තමයි විකුණන එක නවත්වන්න.
පාතාලයේ අයට මට දෙන්න තියනවා පණිවිඩයක්. පාතාලේ අය හොඳටම දන්නවා දැන් ඔය ලොකු චන්ඩි අන්තිමට මැරෙනවා. මැරෙන්නේ කොහොමද . එක්කො පොලිසියෙන් මැරුම් කනවා. නැතිනම් විරුද්ධ වාදීන්ගෙන් මරුම් කනවා.
ඊට පස්සේ අපි දකිනවා මැරුම් කාපු අයගේ පවුලටයි ළමයින්ටයි වෙලා තියන දේ. යන එන මං නෑ ඊට පස්සේ. පාතාලෙ නායකයන් දන්න කවුරුහරි ඉන්නවා නම් ඒ අයට කියන්න මේක තේරුම් කරලා, තමුසෙල් මොනව කෙරුවත් අන්තිමට තමුසෙලට මෙච්චරයි වෙන්නේ කියලා.
ඒක නිසා මේ කියන පනිවිඩය තමයි ඒක නැවැත්තුවෙ නැතිනම් අපි ඒ ගොල්ලන්ව හොයාගෙන එනවා. හොයාගෙන ගියාම වෙඩි හුවමාරු වෙනවා. ඒ ගොල්ලන් මැරෙනවා. ඒක නවත්වන්න බෑ. ඉතින් එහෙම නිකම් මැරුම් කනවට වඩා හොඳ නැද්ද මේ වැඩේ නවත්වලා තමන්ගේ ළමයි සහ පවුලේ අය එක්ක ඉන්න එක.
මේ පණිවිඩ දෙක තමයි දෙන්න තියෙන්නේ කුඩු විකුණන අයටයි, පාතාලය එක්ක සම්බන්ධ අයටයි. සියලු දෙනාගෙන්ම කියන්නෙ අපි සියලු දෙනාම අපි එක්ක එකතු වෙන්න. ඔබට පෙනෙයි අපි මොකක් ද කරන්නෙ කියලා. හෙට එළිවෙන්න අපි මෙහෙයුම් පටන් ගන්නවා හැම තැන්වලම. අපිට සහයෝගය දෙන්න. තොරතුරු දෙන්න. පොලිසිය ඉන්න අය දිරිමත් කරන්න. පොලිස් නිලධාරීන්ට වුනත් සියලු මහජනයා ඒ අය පස්සේ ඉන්නවා කියලා දැනගත්තාම ඒ අයටත් ලොකු හයියක් වෙනවා. ඒ දේ ඔයගොල්ලන්ගෙන් අපි බලාපොරොත්තු වෙනවා. ඉතිරි ටික අපි කරන්නම්.”
“කවර තරාතිරමක අයෙකුගේ හෝ බලපෑම්වලට යටත් නොවී නීතිය ක්රියාත්මක කිරීමට අප කටයුතු කරනවා. එළඹෙන ජුනි 30 වනදා වන විට සම්පූර්ණ වෙනසක් සඳහා අවශ්ය කටයුතු කරන ලෙස පොලිසියට උපදෙස් ලබාදී තිබෙනවා.”
මේ ක්රියාත්මක කරන වැඩපිළිවෙළට එරෙහිව සමාජ මාධ්ය ඔස්සේ විවිධ ප්රහාරයන්ට මුහුණ දීමට සිදුවේවි. මේ වන විටත් සංවිධානාත්මකව එවැනි වැඩපිළිවෙළක් ක්රියාත්මක වෙනවා. එවැනි කටයුතුවලින් මෙම ක්රියාමාර්ග අධෛර්යමත් කිරීමට කිසිවෙකු උත්සාහ කරනවා නම් එය කිසිසේත්ම සාර්ථක වන්නේ නැහැ. එවැනි ප්රචාරයන් සිදුකරන බොහෝ දෙනෙකු යැපෙන්නේ පාතාලයෙන් හෝ මත්ද්රව්ය ජාවාරම්කරුවන්ගෙන්. බොහෝ දෙනෙකු විදේශයන්හි සිට මෙවැනි කටයුතු සඳහා මුදල් වැය කරනවා. අරගලගේ දී සිදුවුයේත් එයයි.
මේ වැඩ පිළිවෙළ වෙනුවෙන් කිසිදු අවිශ්වාසයකින් තොරව අප හා අත්වැල් බැඳගන්නා ලෙස සියලු දෙනාගෙන් ඉල්ලා සිටිනවා. එහි සහයෝගයත් සමඟ කවර බාධක, අභියෝග පැවතුනත් මේ වැඩ පිළිවෙල ඉදිරියට ගෙනයාමට කටයුතු කරනවා.
අමාත්යංශ ලේකම් වියානි ගුණතිලක, වැඩ බලන පොලිස්පති දේශබන්දු තෙන්නකෝන්, විශේෂ කාර්ය බලකාය භාර ජ්යෙෂ්ඨ නියෝජ්ය පොලිස්පති, දකුණු පළාත භාර ජ්යෙෂ්ඨ නියෝජ්ය පොලිස්පති ඇතුළු පොලිස් ප්රධානීන්, රාජ්ය නිලධාරීන්, ප්රජා පොලිස් කමිටු නියෝජිතයින් ඇතුළු පිරිසක් මෙම අවස්ථාව සඳහා එක්ව සිටියහ.
