පාර්ලිමේන්තුවේ වැඩ තහනමට ලක්ව සිටින නියෝජ්ය මහලේකම් චමින්ද කුලරත්න විසින් කතානායක ආචාර්ය ජගත් වික්රමරත්න ට එරෙහිව කරන ලද පැමිණිල්ලක් සම්බන්ධයෙන් විමර්ශනයක් ආරම්භ කිරීමට අල්ලස් හෝ දූෂණ චෝදනා විමර්ශන කොමිෂන් සභාව තීරණය කර ඇති බව Sunday Times වාර්තා කර තිබේ.
එසේම, ආර්. කන්නන් නැමැති අයෙකු විසින් චමින්ද කුලරත්නට එරෙහිව ඉදිරිපත් කරන ලද පැමිණිල්ලක් සම්බන්ධයෙන් ද විමර්ශනය කිරීමට කොමිසම තීරණය කර ඇති බව එම වාර්තාවේ සඳහන් වේ. චමින්ද කුලරත්න නියෝජ්ය මහලේකම් ධුරයට පත් කිරීමේ ක්රියාවලිය දෝෂසහගත බවත්, ඒ හරහා ඔහු දූෂණ වරදක් සිදු කර ඇති බවත් එම පැමිණිල්ලෙන් චෝදනා කර ඇත.
මෙහි මූලික පියවරක් ලෙස, මෙම පැමිණිලි දෙකට අදාළ ලේඛන පාර්ලිමේන්තුවෙන් ඉල්ලා සිටීමට කොමිෂන් සභාව කටයුතු කරනු ඇත. එම ලේඛන විශ්ලේෂණය කිරීමෙන් අනතුරුව කතානායක ජගත් වික්රමරත්නගෙන් සහ නියෝජ්ය මහලේකම් චමින්ද කුලරත්න ගෙන් ප්රකාශ සටහන් කර ගැනීමට නියමිතය.
සිද්ධියේ පසුබිම
හිටපු පරිපාලන නිලධාරියෙකු වන එස්.කේ. ලියනගේ විසින් පවත්වන ලද අභ්යන්තර පරීක්ෂණයකින් අනතුරුව, කතානායකවරයාගේ ප්රධානත්වයෙන් යුත් පාර්ලිමේන්තු කාර්ය මණ්ඩල උපදේශක කාරක සභාව විසින් හිටපු පාර්ලිමේන්තු නියෝජ්ය මහලේකම් චමින්ද කුලරත්නගේ සේවය අත්හිටුවීමට පියවර ගන්නා ලදී. චමින්ද කුලරත්න නියෝජ්ය මහලේකම් ධුරයට පත්වීම සඳහා අවශ්ය නිර්ණායක සපුරා නොමැති බවත් එම පත්වීම් ක්රියාවලිය දෝෂසහගත බවත් එම අභ්යන්තර පරීක්ෂණයේදී තහවුරු වී තිබිණි.
තම සේවය අත්හිටුවීමෙන් පසුව, කතානායකවරයා දූෂිත ක්රියාවන් රැසක නිරත වී ඇති බවට චෝදනා කරමින් චමින්ද කුලරත්න අල්ලස් කොමිසමට මෙම පැමිණිල්ල ඉදිරිපත් කළේය.
මේ අතර චමින්ද කුලරත්න ඉදිරිපත් කළ පැමිණිල්ලේ අඩංගු කරුණු සම්බන්ධයෙන් පාර්ලිමේන්තු මහලේකම්වරයාගෙන් වාර්තාවක් ඉල්ලා සිටීමට කතානායකවරයාගේ පෞද්ගලික ලේකම් චමීර ගාල්ලගේ කටයුතු කළේය. කෙසේ වෙතත්, මෙම පියවර අල්ලස් කොමිසමේ ස්වාධීන විමර්ශනයට බාධාවක් විය හැකි බවට විපක්ෂ මන්ත්රීවරු ප්රකාශ කළහ.
කතානායකවරයාට එරෙහි චෝදනා
- චමින්ද කුලරත්න විසින් කතානායකවරයාට එරෙහිව ප්රධාන චෝදනා 8ක් එල්ල කර ඇති අතර ඒවා පහත පරිදි වේ:
- නීති විරෝධී ලෙස ඉන්ධන දීමනා දෙකක් ලබා ගැනීම.
- නිල වාහන අවභාවිත කිරීම.
- පාර්ලිමේන්තු මාධ්ය උපකරණ අවභාවිත කිරීම.
- අදාළ ගාස්තු ගෙවීමකින් තොරව පාර්ලිමේන්තුවෙන් ආහාර ලබා ගැනීම.
- නීති විරෝධී ලෙස පරීක්ෂණ නිලධාරියෙකු පත් කිරීම, ඔහුට පාර්ලිමේන්තු අරමුදල්වලින් වැටුප් ගෙවීම සහ ආහාර පාන ලබා දීම.
- නිල නිවාස දෙකක් අවභාවිත කිරීම.
- තොරතුරු දැනගැනීමේ අයිතිවාසිකම පිළිබඳ පනත යටතේ තොරතුරු මුදා හැරීමට බාධා කිරීම.
- පාර්ලිමේන්තු කාර්ය මණ්ඩල පරිපාලනයට නීති විරෝධී ලෙස මැදිහත් වීම.
