මැතිවරණය ආසන්නයේ දී රජය විසින් නව සුරාසැල් බලපත්ර ලබා දීම දැඩි ලෙස හෙළා දැක එම ක්රියාපටිපාටියෙන් වහාම නතර කරන ලෙස දන්වමින් අස්ගිරි මල්වතු පාර්ශව දෙකෙහි මහා සංඝයා වහන්සේ ජනාධිපති රනිල් වික්රමසිංහ වෙත ලිඛිතව දන්වා තිබේ.
උන්වහන්සේලා මෙම ලිඛිත දැන්වීම සිදුකරන්නේ පසුගිය මස 29 වැනි දා ය. එහෙත් මේ වනවිටත් එම නිවේදනයට රජයෙන් සාධනීය ප්රතිචාරයක් ලැබී නැති බව උභය පාර්ශවීය මහා විහාර ආරංචි මාර්ග සනාථ කරයි.
මල්වතු පාර්ශවයේ මහා නායක තිබ්බටුවාවේ ශ්රී සිද්ධාර්ථ සුමංගලාභිදාන හිමිපානන් වහන්සේ සහ අස්ගිරි පාර්ශවයේ මහා නායක වරකාගොඩ ධම්මදස්සී ශ්රී පඤ්ඤානන්ද ඤාණරතනාභිධාන හිමිපානන් වහන්සේ සිය අත්සන් සහිතව ජනාධිපතිවරයා වෙත යොමු කරන මෙම ලිපියේ සඳහන් වන්නේ මත් පැන් සහ මත්ද්රව්ය ඇබ්බැහිය ජාතික ව්යසනයක් වී ඇති මොහොතක ආත්මාර්ථකාමී ආර්ථික වාසි සහ දේශපාලන අවශ්යතා පූර්ණය කරගැනීමේ ජුගුප්සාජනක පරමාර්ථ සහිතව සුරාසැල් බලපත්ර අලුතින් නිකුත් කිරීමට රජය ගෙන ඇති තීරණය මහා සංඝරත්නය කිසිසේත්ම අනුමත නොකරන බවට බරපතල ලෙස අවධාරණය කරන බවය.
උන්වහන්සේලා ජනාධිපතිවරයාට දන්වන්නේ බුද්ධ දේශනාව අනුව ආධ්යාත්මික සංවර්ධනය පිළිබඳ නොසිතා ආත්මාර්ථකාමී ආර්ථික අභිලාෂයන්ගෙන් මෙහෙයවන තැනැත්තා එකැස් ඇත්තෙකුට සමාන බවය.
එවැනි පුද්ගලයෙක් ලෝකයේ සැබෑ තත්ත්වය නොදකින්නේ යම් සේ ද ඒ ආකාරයෙන්ම ආර්ථික සංවර්ධනය පමණක් සිතා සදාචාරාත්මක ගුණ වගාවෙන් වියුක්ත වීම හේතුවෙන් මේ රටේ සමාජ සංස්ථාවන් බිඳ වැටෙන බව මෙරට මහජන නියෝජිතයන් තේරුම් නොගැනීම සමස්ථ ජාතියේ අවාසනාව බව උන්වහන්සේලා ජනාධිපතිවරයාට කියති.
මහජන යහපත උදෙසා ව්යාවෘත වන්නට සපථ වූ මහජන නියෝජිතයන් සමස්ථ රටවාසීන්ගේ ජීවිත අන්ධකාරයේ හෙළීමට කටයුතු කරන බව පෙන්වා දෙන මහා නායක හිමිවරු සංඝයා වහන්සේ ගේ විරෝධය හමුවේ රටේ බරපතල කැළඹීමක් ඇතිවන්නට පෙර මෙම අනර්ථකාරී වැඩපිළිවෙළ සපුරා තහනම් කිරීමට කටයුතු කරන මෙන් උන්වන්සේලා ජනාධිපතිවරයාට අවධාරණය කරයි…
එම නිවේදනය පහත දැක්වේ.
