-
ව්යාපාරයකට තියෙන්නේ හම සුදු කරන ක්රීම් වර්ගයක් සමාජ මාධ්ය ඔස්සේ අලෙවි කිරීම විතරයි…
-
ගෝඨගෙ ලක්ෂ 800 රේන්ජ් රෝවර් එකට අමතරව කුරුඳුවත්තේන් කෝටි 14ක නිවාස ඒකකයක් අරන්…
-
වැල්ලම්පිටියේ කුලී ගෙදරක හිටිය පියුමි දැන් ඉන්නේ හිල්ටන් රෙසිඩන්සිස් නිවසක… එයත් මිලදී ගත්තු ගෙයක්!
පියුමි හංසමාලි විසින් ප්රධාන බැංකු අටක ගිනුම් 19ක් පවත්වාගෙන යමින් එම ගිනුම් හරහා රුපියල් කෝටි ගණන් සංසරණයවුන ආකාරය සම්බන්ධව විමර්ශනය ආරම්භ කරමින් එම බැංකු ගිනුම් 19 හි වාර්තා කැඳවන ලෙස අපරාධ පරීක්ෂණ දෙපාර්තමේන්තුවේ නීති විරෝධී වත්කම් විමර්ශන කොට්ඨාසයේ සංවිධානාත්මක අපරාධ මගින් උපයා ගන්නා වත්කම් විමර්ශන ඒකකයට මාලිගාකන්ද අධිකරණය අද (18) නියෝග කළේය.
කෙටි කාලයක් තුළ අතාර්කික ලෙස රුපියල් කෝටි ගණනක දේපළ උපයාගත් බව කියමින් ලංකාවේ ප්රකට නිරූපිකාවකවන පියුමි හංසමාලි ට එරෙහිව ‘මගෙන් රටට‘ සංවිධානයේ සභාපති සංජය මහවත්ත විසින් ගොනුකළ පැමිනිල්ල විභාග කරන්නට අවසර ලබා දෙමින් අධිකරණය මෙම නියෝගය නිකුත් කර ඇත.
මෙරට ප්රධාන පෙළේ බැංකු 08 ගිණුම් 19ක් පවත්වාගෙන යමින් ප්රශ්නකාරී ලෙස උපයා ගත් මුදල් එම ගිනුම් හරහා වියදම් කරමින් කොළඹ හිල්ටන් රෙසිඩන්සීස් සුඛෝපභෝගි මහල් නිවාස ඒකකයක්, ආසන්න කාලයේ ගෝඨාභය රාජපක්ෂ පාවිච්චි කළ රුපියල් ලක්ෂ අටසීයක රේන්ජ් රෝවර් වර්ගයේ රථයක් කුරුඳුවත්තේ කෝටි 14 ක තවත් නිවසක්ද මිලට ගෙන ඇති බව පැමිණිල්ලේ සඳහන් කර තිබේ.
පැමිණිලිකරුවන් පෙන්වා දෙන්නේ මීට ටික කලකට ඉහත මැණික් ව්යාපාරිකයෙකු ලබාදුන් වැල්ලම්පිටිය ප්රදේශයේ කුඩා නිවසක පියුමි හංසමාලි ජීවත් වූ බවය.
සමාජ මාධ්ය තුළ ‘හම සුදු කරන’ ක්රීම් වර්ගයක් අලෙවි කිරීම සම්බන්ධ ව්යාපාරයක් ගැන පමණක් ඇය පවසන අතර මෙතරම් වත්කමක් ඇය උපයාගත් ආකාරය සැකයට තුඩුදෙන බව පැමිණිල්ලේ සඳහන් කර තිබිණි.
මේ අනුව අධිකරණයට කරුණු වාර්තා කරමින් රහස් පොලිසියේ නීති විරෝධී වත්කම් විමර්ශන කොට්ඨාසයේ සංවිධානාත්මක අපරාධ මගින් උපයා ගන්නා වත්කම් විමර්ශන ඒකකය කළ ඉල්ලීමක් අනුව මාලිගාකන්ද අධිකරණය ඇගේ බැංකු ගිණුම් 19 ගැන වාර්තා කැඳවීමට රහස් පොලිසියට අවසර ලබා දුන්නේය. විමර්ශන ප්රගතිය කඩිනමින් අධිකරණයට ඉදිරිපත් කරන ලෙස දන්වා අනතුරුව අධිකරණය විසින් පැමිණිල්ල බහා තැබීය.
කොළඹ හිල්ටන් රෙසිඩන්සීස් හි පදිංචි පියුමී හංසමාලි රුපියල් ලක්ෂ අටසීයකට රේන්ජ් රෝවර් වර්ගයේ රථයක් මිලදී ගැනීම,කොළඹ හත නිවාස සංකීර්ණයකින් රුපියල් මිලියන 148ක තවත් නිවසක් මිලදී ගැනීම, කෙටි කාලයක් තුළදී ප්රධාන බැංකු අටක පවත්වාගෙන යන බැංකු ගිණුම් 19 හරහා කෝටි ගණනක් මුදල් තැන්පත් කිරීම ඇතුළු සැක සහිත ලෙස දේපළ උපයා ගැනීම සම්බන්ධයෙන් 2011 අංක 40 දරණ පනතින් සංශෝධිත 2006 අංක 6 දරණ මුදල් විසුද්ධි කරන පනත යටතේ මෙම විමර්ශනය සිදු කෙරේ.
