ඉදිරි සති කිහිපයේදී රට තුළ බරපතළ ඛනිජ තෙල් අර්බුදයක් නිර්මාණය වන බව ඛනිජ තෙල් නීතිගත සංස්ථාවේ අභ්යන්තර ආරංචි මාර්ග හෙළිදරවු කර ඇත.
මීට හේතුව වී ඇත්තේ ලබන 16 වැනිදායින් පසු ඉන්දීය ණය ආධාර යටතේ ලැබෙන අවසන් තෙල් තොගයත් හමාර වීමෙන් පසුව මේ දක්වා රටට ඛනිජ තෙල් ගෙන ඒම සඳහා කිසිදු ක්රමවේදයක් සකස් කර නොමැති වීම නිසා බව එම ආරංචි මාර්ග පෙන්වා දෙයි.
ඛනිජ තෙල් සංස්ථාව තුළ උද්ගත වී ඇති මේ තත්ත්වය සම්බන්ධයෙන් අමාත්යවරයා වහා අවධානය යොමු කළ යුතු බවත්, මේ වන විට පවතින යථා තත්ත්වය සම්බන්ධයෙන් අමාත්යවරයාට ව්යාජ තොරතුරු ලබාදීමට ඛනිජ තෙල් බලධාරීන් කටයුතු කර ඇති බවටත් වාර්තා වේ.
ලෝක වෙළඳපලේ මේ වන විට පවතින මිලට වඩා බොහෝ අඩු මිලකට රුසියාවෙන් තෙල් ලබාගැනීමට හැකියාව තිබියදීත් බලධාරීන් ඒ සඳහා උනන්දු නොවන්නේත් අමාත්යවරයා නොමග යවන්නේත් සංස්ථාව තුළ ක්රියාත්මක වන මේ කොමිස් මාෆියාව විසින් නිසා බව එම ආරංචි මාර්ග හෙළි කරයි.
මේ වන විට යුරෝපය විසින් රුසියාවේ ඛනිජ තෙල් නිෂ්පාදන මිලදී ගැනීම අත්හිටුවා තිබීම හේතුවෙන් රුසියාව තුළ අති විශාළ ඛනිජ තෙල් නිෂ්පාදන අතිරික්තයක් ඇති බවත් මේ අවස්ථාවෙන් උපරිම ප්රයෝජන ගෙන රුසියානු රජය සමඟ සාකච්ඡා කර එම ඉන්ධන තොග සංචිත වශයෙන් ගබඩා කර ගැනීමට ශ්රී ලංකාව කටයුතු කළයුතු බවටත් ඔවුහු යෝජනා කරති.
මේ වන විට රුසියාව බොරතෙල් බැරලයක් සඳහා ඇමරිකානු ඩොලර් 35ක පමණ මිලක් නියම කර ඇති බවත් ලෝක වෙළඳපළේ මේ වන විට පවතින බොරතෙල් මිල හා සංසන්දනය කරද්දී මේ මිල ඉතා ලාභදායී මිල තැබීමක් වන අතර ඉන්දියාව මේ වන විටත් රුසියාවෙන් බොරතෙල් බොරතෙල් මිල දී ගනිමින් සිටින බවත් ආර්ථික විශ්ලේෂකයෝ පෙන්වා දෙති.
ඉන්දීය ණය ක්රමය යටතේ මෙරටට ලැබුණු ඛණිජතෙල් තොග බොහෝමයක් එසේ ලැබුණු ඒවා බවත් වාර්තා වේ.
ඉන්දියාව මෙලෙස රුසියාවෙන් ඉතා අඩු මිලට ලබා ගන්නා ඛනිජ තෙල් තොග ශ්රී ලංකාවට ඉන්දීය ණය ක්රමය යටතේ එවනු ලබන්නේ ලෝක වෙළෙඳ පොළේ මිල ගණන් හා සම ලෙස බර තබමින් බැවින් මේ ණය යෝජනා ක්රමය යටතේ ද ඉන්දියාව අති විශාල ලාභයක් ලබන බව විශ්ලේකයෝ පවසති.
මෙම ඉන්ධන ආනයන කටයුත්තට ශ්රී ලංකාවට සෘජුවම මැදිහත් වීමට කිසිදු බාධාවක් නොමැති බවත් ඒ සම්බන්ධයෙන් වන කැමැත්ත මේ වන විටත් ශ්රී ලංකාවේ රුසියානු තානාපති කාර්යාලය හරහා ප්රකාශ වී ඇති බවත් පෙන්වා දෙන ආර්ථික විශේෂඥයෝ ශ්රී ලංකාව මෙම කටයුත්තට කුමන ක්රමයකින් හෝ මැදිහත් වී නිරපරාදේ අපතේ යන මෙම අතිවිශාල ඩොලර් ප්රමාණය රැකගත යුතු බව පෙන්වා දෙති.
- හිරු –
