පසුගිය 09 වැනිදා අරලියගහ මන්දිරය ඉදිරිපිට සහ ගොල්ෆේස් පිටියේ සාමකාමී උද්ඝෝෂණයට එල්ලවූ මැර ප්රහාර එල්ලකිරීම සම්බන්ධව කරන විමර්ශන හිටපු අගමැති මහින්ද රාජපක්ෂ, නාමල් රාජපක්ෂ, ජොන්ස්ටන් ප්රනාන්දු , ඇතුළු 16 දෙනෙකු ගේ විදෙස් ගමන් තහනම් කිරීමට කොළඹ මහේස්ත්රාත් තිළිණ ගමගේ අද නියෝග කළේය.
ජනාධිපති නීතිඥ මෛත්රී ගුණරත්න විසින් කොටුව මහේස්ත්රාත් අධිකරණයේ ගොනු කර තිබූ පැමිණිල්ලකට අනුව මෙම නඩුකරය ගොනු වී තිබිණි.
පසුගිය 09 දා සාමකාමී උද්ඝෝෂකයින්ට එල්ල වූ මැර ප්රහාරය සම්බන්ධව රහස් පොලිසිය විසින් සිදුකරන වැඩිදුර විමර්ශනයේ දී අනාවරණය වුණු කරුණු අනුව මහේස්ත්රාත්වරයා මෙම නියෝගය නිකුත් කළේය.
හිටපු අග්රාමාත්ය මහින්ද රාජපක්ෂ , පාර්ලිමේන්තු මන්ත්රිවරුන්වන නාමල් රාජපක්ෂ, ජොන්ස්ටන් ප්රනාන්දු, පවිත්රා වන්නිආරච්චි, සංජීව එදිරිමාන්න, කාංචන ජයරත්න, රොහිත අබේගුණවර්ධන, සීබී රත්නායක, සම්පත් අතුකොරල, රේනුක පෙරේරා, සනත් නිශාන්ත, බස්නාහිර පළාත් ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් මෙම විදෙස් ගමන් තහනම ලද අයය.
මිට අමතරව මෙම සිද්ධිය ඇසින් දුටු සාක්ෂිකරුවන් සහ මෙම සිද්ධියෙන් තුවාල ලද 07 දෙනෙකුගේ ද විදෙස් ගමන් තහනම් කරමින් ද මහේස්ත්රාත්වරයා නියෝගයක් නිකුත් කළේය.
ඒ නීතිපතිවරයා වෙනුවෙන් පෙනී සිටි අතිරේක සොලිස්ටර් ජෙනරාල් අයේෂා ජිනසේන අධිකරණයෙන් කළ ඉල්ලීමක් සලකා බැලීමෙන් අනතුරුවයි.
නීතිපතිවරයා අධිකරණයෙන් ඉල්ලා සිටියේ මෙම සිද්ධිය සම්බන්ධයෙන් සිදුකරන ඉදිරි විමර්ශන සඳහා මෙම පුද්ගලයින් මෙරට රැඳී සිටීම අත්යාවශ්ය බවය.
ඒ අනුව ඉදිරිපත් වූ කරුණු සැලකිල්ලට ගත් කොටුව මහේස්ත්රාත් තිළිණ ගමගේ ඔවුන්ගේ විදෙස් ගමන් තහනම් කරමින් නියෝගයක් නිකුත් කළ අතර ඒ පිළිබදව ආගමන විගමන පාලකයාට වහාම දැනුම් දීමට ද නියෝගයක් නිකුත් කළේය.
