ජාත්යන්තර මූල්ය අරමුදල සමඟ තමන් ඇතුළු කණ්ඩායම මූලික සාකච්ඡා ආරම්භ කළ බවත් එම අරමුදලෙන් අපට කඩිනමින් මුදල් නොලැබෙනු ඇති බවත් ඒ සඳහා යම් කාලයක් ගත වන බැවින් එතෙක් අවශ්යතා සපුරා ගැනීම සඳහා මූල්ය පහසුකම් සපයා ගැනීමට අපට සිදුව ඇති බව මුදල් අමාත්ය අලි සබ්රි පවසයි.
දැනට ජාත්යන්තර මූල්ය අරමුදලේ හතර වැනි වගන්තිය අනුව ශ්රි ලංකාව සම්බන්ධයෙන් සිදු කර ඇති ඇගයීම වන්නේ ණය ගෙවීම පිළිබඳව ශක්යතාවක් නැති රටක් ලෙස බැවින් අපට මෙම ණය ලබා ගැනීමට පෙර තිබෙන ණය මුදල් ගෙවන්නේ කෙසේද ලැබෙන ණය මුදල් ගෙවිම් කළමනාකරණය කරන්නේ කෙසේද යන්න පිළිබඳව සැලැස්මක් තිබිය යුතු යැයි ඔහු පෙන්වා දුන්නේය.
මෙම මුදල් සොයා ගැනීමට අදාල මූලික කටයුතු සිදු කෙරෙමින් පවතින බවත් ඒ අනුව ලෝක බැංකුව ආසියානු සංවර්ධන බැංකුව ජපානය චීනය වැනි රටවල් ඇතුළු අපට ආධාර දෙන රටවලින් මෙම අරමුදල් ලබා ගැනීමට බලාපොරොත්තු වන බවත් මුදල් ඇමතිවරයා කීවේය.
මෙම අතරමැදි මූල්ය පහසුකම් ලබා ගැනීමේ වැඩසටහන් යටතේ ඉදිරි සති දෙකත් හතරත් ඇතුළත ලෝක බැංකුවෙන් ඇමෙරිකානු ඩොලර් මිලියන 300ත් 600ත් අතර ප්රමාණයක් ලැබෙනු ඇති බව ද ඇමතිවරයා ප්රකාශ කළේය. ඔහු මේ බව අනාවරණය කළේ අද සවස වොෂින්ටනයේ සිට මාධ්ය අමතමිනි.
සූම් තාක්ෂණය ඔස්සේ මාධ්ය ඇමතූ මුදල් අමාත්යවරයා තමන් මේ වනවිට ජාත්යන්තර මූල්ය අරමුදලේ අධ්යක්ෂ ජනරාල් ක්රිස්ටලිනා ජෝර්ජියේවා, නියෝජ්ය අධ්යක්ෂිකා ගීතා ගෝපිනාත් ඇතුළු ප්රධානීන් හමුවූ බවත්, මහ බැංකු අධිපතිවරයා ප්රමුඛ ශ්රි ලංකා කණ්ඩායම මේ වනවිට අරමුදලේ නිලධාරීන් සමඟ උපදේශනාත්මක රැස්වීම් ගණනාවකට සහභාගී වී සිටි බවත් එම අරමුදල ණය ලබා දෙන්නේ මූලික ශක්යතා අධ්යයනයකින් පසුව බවත් සඳහන් කළේය.
ජාත්යන්තර මූල්ය අරමුදල විසින් කඩිනමින් මූල්ය පහසුකම් සලසන සීඝ්ර මූල්ය උපකරණ (Rapid Financing Instruments) ලබා ගැනීමටද මූල්ය අරමුදල සමඟ මෙහිදී සාකච්ඡා කළේ යැයි ද මෙහිදී ශ්රි ලංකාවට ලබා දෙන ණය තිරසාර මට්ටමක තිබීම මූලික සුදුසුකමක් වන්නේයැයි ද කී මුදල් ඇමතිවරයා මේ සුදුසුකම් තවමත් ශ්රි ලංකාව සපුරා නැති බැවින් එලෙස ක්ෂණික මූල්ය සහනයක් අපට දැනට ලබා ගැනීම අපහසු බව පැහැදිළි කළේය.
ඒ සඳහා ද වැඩකටයුතු කරගෙන යන බවත් අදාළ පිරිවිතර සම්පූර්ණ වුවහොත් අපට මෙම පහසුකම ලබා ගත හැකි බවත් හෙතෙම විශ්වාසය පළ කළේය.
“කොහොම වුණත් අපට ජාත්යන්තර මූල්ය අරමුදලෙන් අදාළ ණය පහසුකම ලබා ගැනීමට ඉතා දුෂ්කර කල්ගත වන ක්රියාවලියක් බව පැහැදිළියි. මේ සඳහා මාස නවයක් අවුරුද්දක පමණ කාලයක් ගත වන්නට පුළුවන්. අද රටේ ජනතාවට දැන ගන්න ඕන කොහොමද එතෙක් රට ගෙන යන්නේ කියල. “
“එහිදී මා සඳහන් කරන්න ඕන අපි මේ ගමනෙදී ලෝක බැංකුව එක්කත් සාකච්ඡා කළා. ඔවුන් ඉදිරි කාලය තුළ බොහෝ විට සති දෙකත් මාස හතරක් අතර කාලය තුළ ඩොලර් මිලියන 300ත් 600ත් අතර ප්රමාණයක් ලබා දේවි. විශේෂයෙන් රටේ සෞඛ්ය සේවාවට අවශ්ය ඖෂධ ඇතුළු ද්රව්ය ගෙන්වා ගන්න. ආහාර ගෙන්වා ගන්න. ඒ වගේම මූල්යමය වශයෙන් ඉතා දුෂ්කර තත්ත්වයක ඉන්න ප්රජාවට උදව් කරන්න, පොහොර ආනයනය කරන්න, මෙම මුදල් වියදම් කරන්න හැකි වේවි.
ඒ වගේම අපි ආසියනු සංවර්ධන බැංකුව සමඟ සාකච්ඡා කරනවා. ඉන්දියාවේ මුදල් අමාත්ය නිර්මලා සීතාරාමන් මහත්මියත් මා හමුවුණා. මා ඇයගෙන් ඉල්ලා සිටියා අපට ඉන්ධන සඳහා තවත් ඩොලර් මිලියන 500ක ණයක් ලබා දෙන්න කියල. ඒ වගේම තවත් ඩොලර් බිලියනයක ණය සහනයක් ඉල්ලා තිබෙනවා “ යයි ද සඳහන් කළේය. .
