වාහන බලපත්රය ලබා ගැනීමේ අරමුණින් පමණක් දුම් සහතිකය ලබා ගැනීම සිදුනොකරන ලෙසත් අධික ලෙස දුම පිට කරමින් මහ මග ධාවනය කරන රථවාහන අසාදු ලේඛන ගත කිරීමට පියවර ගන්නා බවත් මෝටර් රථ ප්රවාහන දෙපාර්තමේන්තුවේ වාහන වායු විමෝචන භාරකාර අරමුදල පවසයි.
එහි අධ්යක්ෂ දසුන් ගමගේ සඳහන් කළේ මාර්ගයේ ධාවන කරන එවැනි වාහන සම්බන්ධයෙන් මහජන පැමිණිලි ලබා ගැනීම සඳහා 070 3500 525 යන වට්ස් ඇප් අංකය විවෘත කර ඇති බවය.
ව්යාජ උපක්රම ඔස්සේ දුම් සහතිකය ලබා ගැනීම ට බොහෝ පිරිස් පෙළඹී සිටිය ද, එම රථ වාහන ගමන් කරවිය යුත්තේ මහා මාර්ගයේ බවත්, එම වාහන ධාවනය වන විට පොලිස් නිලධාරීන් සහ මෝටර් රථ දෙපාර්තමේන්තුවේ නිලධාරීන් දිවයිනේ සියලුම ප්රදේශවලදී අදාළ පරික්ෂාවන් සිදු කරන බවත්ය.
එම අවස්ථාවක දී අධික දුමක් පිට වන බවට නිරීක්ෂණය වුවහොත් අදාළ රථයේ හිමිකරුට විරුද්ධව තහනම් නියෝගයක් රථයට ලැබෙන බව ද අධ්යක්ෂවරයා පවසයි.
