ඡන්ද පත්‍රිකා මුද්‍රණය කිරීමට අවශ්‍ය මුදල් මෙතෙක් ලැබී නොමැතිවීම හේතුවෙන් ලබන 20 වනදාට පෙර මැතිවරණ කොමිසමවෙත තැපැල් ඡන්ද පත්‍රිකා භාරදීමට නොහැකි තත්වයක් මතු වී ඇති බව රජයේ මුද්‍රණාලායාධිපතිනි ගංගානි ලියනගේ ප්‍රකාශ කර ඇත.
හිරු ප්‍රවෘත්ති සේවය වෙත අදහස් දක්වමින් ඇය කියා ඇත්තේ ඡන්ද පත්‍රිකා මුද්‍රණය කිරීමට අදාළව කිසිදු ගෙවීමක් සිදුකර නොමැති හෙයින් වැඩකටයුතු ආරම්භ කිරීමට හැකියාවක් නැති බවය.
එමෙන්ම, ඡන්ද පත්‍රිකා සැකසීම, ප්‍රතිඵල ලේඛන සෑදීම ඇතුළු මේ දක්වා මුද්‍රණය කළ පත්‍රිකාවලට ගෙවිය යුතු රුපියල් මිලියන 152 ක මුදල සහ සේවක ශ්‍රමය සදහා ගෙවිය යුතු තවත් මිලියන 52 ක මුදල් ද තවමත් ලැබී නොමැති බවත් භාණ්ඩාගාරයෙන් මෙතෙක් ගෙවා ඇත්තේ මිලියන 40ක් පමණක් බවත් මුද්‍රණාලයාධිපතිනිය පවසයි.
යම් හෙයකින් මුදල් ලැබුණ ද ඡන්ද පත්‍රිකා මුද්‍රණය කිරීමට මසක කාලයක් ගත වනු ඇති බව ඇය පෙන්වා දී ඇත.
ඇය හිරු ප්‍රවෘත්ති සේවයට වැඩිදුරටත් පවසන්නේ , මුද්‍රණාලයේ ආරක්ෂාව සඳහා පොලිස් නිලධාරින් ඉල්ලා සිටියද ඊට දින හතරක පහක කාලයක් ගතවන බවට පොලිස්පතිවරයා දැනුම් දුන් බවය.
මේ සිදුවීම් පෙළ ගැසෙන්නේ මැතිවරණයට වෙන් කළ මුදල මුදා හරින ලෙස අධිකරණ නියෝගයක් ලැබී ඇති අවස්ථාවකය.
ඊයේ (11) අනුර කුමාර දිසානායක මන්ත්‍රීවරයා පාර්ලිමේන්තුවේ දී පෙන්වා දුන්නේ මැතිවරණයේ මුල් කාර්තු වේ වියදම සඳහා අවශ්‍ය වන්නේ විටින් විට මුදා හැරිය යුතු මිලියන 1100ක් පමණක් බවත් මේ මැතිවරණයට මුදල් නැති බව පැවසීම අමූලික බොරුවක් බවත්ය.
මැතිවරණය පැවැත්විය යුත්තේ ව්‍යවස්ථාව අනුව බවත්, අධිකරණය ගරු කිරීම සියලු පාර්ශවයන් විසින් කළ යුත්තක් බවත් පැවසූ මන්ත්‍රීවරයා පෙන්වා දුන්නේ තමන්ගේ අවශ්‍යතාවය අනුව අධිකරණය ගොඩනැගිල්ලක් බවට පත් කර ව්‍යවස්ථාව හුදු ලියැවිල්ලක් ලෙස මේ පාලකයින් විසින් හකුලා දමා ඇති බවය.
