නම්බුකාර ලෙස ඉවත්වීමට සූදානම් නැති අගමැතිවරයා විශ්වාසභංග යෝජනාවක් සම්මත කරගෙන පාර්ලිමේන්තුවෙන් ඉවත් කිරීමට සිදුකරන තීරණාත්මක සාකච්ඡාව සමගි ජනබලවේගය සහ ආණ්ඩුවෙන් ස්වාධීන වූ මන්ත්රී කණ්ඩායම අතර ඊයේ සිට ආරම්භ වී තිබේ.
ඊයේ රැස් වූ ශ්රී ලංකා නිදහස්පක්ෂ මධ්යම කාරක සභාවේ දී මෙම විශ්වාසභංගයට සහය පල කිරීම සම්බන්ධව දීර්ඝ සාකච්ඡාවක් සිදු කර තිබේ. පක්ෂයේ මතය වී ඇත්තේ ඊට සහාය පල කිරීමය.
කෙසේ වෙතත් සාකච්ඡාව අතරතුර හිටපු අමාත්ය මහින්ද අමරවීර පිටවී ගොස් ඇත. ඔහු එළියට පැමිණ පවසා ඇත්තේ ඊයේ වනතුරුත් සමගි ජනබලවේගයේ මෙම විශ්වාස භංග යෝජනාවේ කොලකෑල්ලක්වත් දැක නැති බවය.
නොදුටු විශ්වාසභංගයට සහය පලකිරීම සම්බන්ධව අභ්යන්තරයේ යම් විසංවාදයක් ඇති වී තිබේ. මේ ප්රශ්නය මින් පෙර පක්ෂයේ මහලේකම් දයාසිරි ජයසේකරත් මතු කළේය. ඔහු පැවසුවේ විශ්වාසභංග යෝජනාවක් විපක්ෂය රැගෙන එන්නේ නම් ඒ සම්බන්ධව විවෘත සාකච්ඡාවක් අවශ්ය බවය.
අප කළ විමසීමක දී සමගි ජන බලවේගයේ ක්රියාකාරී තරුණ නායකයෙක් පැහැදිලි කර සිටියේ දයාසිරි ජයසේකර මතුකරන කාරණාව නිවැරදි නමුත් මතු වී ඇති අර්බුදය හමුවේ සියලු දේශපාලන පක්ෂ මීට වඩා නම්යශීලීව පොදු විසඳුමකට පැමිණීම වැදගත් යැයි කීවේය.
මේ අතර සමගි ජන බලවේගයේ නායක සජිත් ප්රේමදාස කිසිම රාජපක්ෂවරයෙක් සහිත රජයක් යටතේ තමන් කිසිම තනතුරක් භාර නොගන්නා බවට ඊයේ විශේෂ ප්රකාශයක් කළේය.
