පාතාල නායකයෙක්වන කුඩු අංජු නැමැත්තාගේ කොන්ත්රාත්තුවක් මත ඔහුගේ ප්රතිවිරුද්ධ පාතාල නායකයෙක් වූ හැරල්ඩ් රෝහණ ද සිල්වා නොහොත් ගොනාකෝවිලේ රොහා පොලිසිය විසින් ඝාතනය කරන්නේ රුපියල් ලක්ෂ තුන්සිය පනහක කොන්ත්රාත්තුවකට බවත්, එම ඝාතනයට පොලිස්පති දේශබන්දු තෙන්නකෝන් ද සම්බන්ධ බවත් ප්රකාශිත හඬ පටවලට අදාලව අපරාධ පරීක්ෂණ දෙපාර්තමේන්තුව විශේෂ පරීක්ෂණයක් ආරම්භ කර තිබේ.
මෙම දුරකථන සංවාදවලදී තමන්ගේ නම භාවිත කරමින් පාතාල කල්ලි සාමාජිකයන්ගෙන් මුදල් ලබාගන්නා පද්මලාල් නැමැති පොලිස් පරීක්ෂකවරයා සම්බන්ධයෙන් විමර්ශනයක් සිදුකරන ලෙස පොලිස්පති දේශබන්දු තෙන්නකෝන් විසින් අපරාධ පරීක්ෂණ දෙපාර්තමේන්තුවේ මනුෂ්ය ඝාතන හා සංවිධානාත්මක අපරාධ විමර්ශන ඒකකයට ලිඛිතව පැමිණිලි කර තිබිණි
ඒ අනුව සිදුකළ විමර්ශන සඳහා අදාළ පොලිස් පරීක්ෂකවරයාට අවස්ථා දෙකකදී කට හඬ පරීක්ෂා කිරීම සඳහා රස පරීක්ෂක දෙපාර්තමේන්තුව පැමිණෙන ලෙස අධිකරණය මඟින් දැනුම් දුන්නද ඔහු ඒ සඳහා ගොස් තිබුණේ නැත.
සිද්ධිය සම්බන්ධ දැඩි අවධානයකින් මාධ්ය පසුවෙද්දී පොලිස් පරීක්ෂක පද්මලාල් ඊයේ ජානාධිපති නිතිඥ සාලිය පීරිස් මගින් ඇප අයදුම්පතක් කොටුව මහේස්ත්රාත්වරයා වෙත ඉදිරිපත් කර තිබිණි.
එහිදී අධිකරණය නියෝග කළේ පොලිස් පරීක්ෂක පද්මලාල් එළැඹෙන 16 වනදා රස පරීක්ෂක දෙපාර්තමේන්තුව වෙත ගොස් හඬ පරීක්ෂාව සඳහා ඉදිරිපත් විය යුතු බවය.
ගෙනා කෝවිලේ රොහාගේ ඝාතනය පොලිසිය විසින් පාතාලයෙන් ලබා ගත් කොන්තාත්රාත්තුවක් මත සිදුකළා ද යන සැකය කාලයක් තිස්සේ සමාජයේ තිබිණි. මේ පිළිබඳ විටින් විට මාධ්යය ද වාර්තා කලේය. රොහා ඝාතනය සඳහා මුලින්ම කුඩු අංජු ලක්ෂ 50ක් මුදලක් නියම කළේය. එය කෝටිය දක්වා වැඩි කර රොහා ඝාතනය කරන ඕනෑම පුද්ගලයෙකුට රුපියල් කෝටියක් ලබා දෙන බවට විවෘත ලන්සුවක් ලබා දුන්නේය.
රොහා පොලිස් වෙඩි හුවමාරුවක දී ඝාතනය වන බව කියන්නේ 2020 වසරේ සැප්තැම්බර් මස 24 වනදා ය. එහෙත් වෙඩි හුවමාරුවක දී ඝාතනය වූ බව කියන රොහා අත් අඩංගුවට ගෙන ප්රශ්න කරන ආකාරය සම්බන්ධ වීඩියෝවක් නෙත් එෆ්.එම් බැලුම්ගල සිය යූ ටියුබ් නාලිකාව ඔස්සේ විකාශය කර තිබිණි.
ගොනා කෝවිලේ රොහා අත්අඩංගුවට ගැනීම සඳහා පොලීසිය එම ස්ථානයට ගොස් තිබුණේ පද්මලාල් නමැති පොලිස් පරීක්ෂකවරයාගෙන් ලද තොරතුරකට අනුවය.
එවන් පසුබිමක එම පද්මලාල් නමැති පොලිස් පරීක්ෂකවරයා සහ මියගිය රොහාගේ ප්රධානතම ප්රතිවාදියෙකු වන ඇල්ටෝ ධර්මේ නමැත්තා අතර සිදු වූ බව කියන දුරකථ න සංවාදයක්, ගොනාකෝවිලේ රොහා පොලිස් වෙඩි පහරින් මියයාමෙන් පසු පොලිස් පරීක්ෂක පද්මලාල් බවට පැවසෙන පුද්ගලයා, ඇල්ටෝ ධර්මේගෙන් රුපියල් ලක්ෂ 350ක් ලබාගත් බවට පැවසෙන දුරකථන සංවාදයක්, පොලිස් පරීක්ෂක පද්මලාල් නැමැත්තා හා රොහාගේ ප්රධාන ප්රතිවාදියා වූ කුඩු අංජු නැමැත්තා අතර ද සිදුවූ බව කියන දුරකථන සංවාදයක් සහිත වාර්තාවක් ඊයේ අද දෙරණ ඔස්සේ විකාශය වී තිබිණි.
මෙම දුරකථන සංවාද අතර පොලිස්පති දේශබන්දු තෙන්නකෝන් මෙම ඝාතනයට සම්බන්ධ බවට සැක කෙරෙන ප්රකාශ, මෙන්ම මින් පෙර පොලිස්පති දේශබන්දු තෙන්නකෝන් කුඩු අංජු සමග කතා කරන ආකාරය ගැන ප්රකාශිත හඬපට සමාජය තුළ විශාල කථිකාවක් ඇති කර තිබිණි.
එම තත්ත්ව පිළිබඳ විමර්ශනයක් පැවැත්වීම සඳහා පොලිස්පති දේශබන්දු තෙන්නකෝන් අපරාධ පරික්ෂණ දෙපාර්තමේන්තුවට විශේෂ පැමිණිල්ලක් කරමින් විමර්ශනයක් ඉල්ලා තිබිණි.
එම විමර්ශනය දැන් ක්රියාත්මකය.
