වීරයා මැරිලා නෑ 3, චිත්‍රපටියේ නිෂ්පාදන කටයුතු ඇරඹෙයි.

සුරත් ද මැල් –

ආරුමුගම් තොණ්ඩමන් හෙවත් ‘වීරයා මැරිලා නෑ 2’ චිත්‍රපටය වසර විස්සක අඛණ්ඩ දර්ශනවාරයකින් පසු පසුගියදා නිමාවට පත් වුණා.

ජේසුට ඇණ ගැහුවා කියලා ධර්මය මිය ගියේ නෑනෙ. ධර්මය තාමත් අපිට ඇණ ගහනවා. මළවුන්ට නින්දා නොකරන්න කියලා තමයි ආගමේ කියන්නේ. ඒ හින්දා අපි ජීවත්වෙලා ඉන්න උන්ට අපහාස කරමු. එබැවින් මාර්තෘකාව තොණ්ඩමන්ලා. තහනම් වචනය ආරුමුගම්.

තොණ්ඩමන් මළ ගෙදර ‘චිත්‍රපටයක්’. වීරයෙක් වැටුණා. ඔහුගේ තැන ගන්න අලුත් වීරයෙක් උපන්නා. අලුත් කොල්ලා වාහනේ නැගලා ජනතාවට ආචාර කරන ශොට් එක මොන කොලිවුඩ් ෆිල්ම් එකෙන් ඉස්සුවද මන්දා. කවුද වීරයො කියලා ඔප්පු කළාට මෙන්න අපේ සැලීයුට් එක.

“අඩො අනිල්, වැඩිය ඉදිමෙන්න ආවොත් දෙනවා තොට නිල් වෙන්න” තමයි අලුත් වීරයාගේ මුල්ම දෙබස්.

බල්ටි දෙකයි විසිල් එකයි එක්ක සරමත් කැහැපට ගහලා වීරයා සීන් එකට එන්ටර් වුනේ ජාසිංහ දුෂ්ටයා කරලා. මෙතෙක් කල් ‘කෝවිඩ් 19’ චිත්‍රපටයේ ප්‍රධාන චරිත දෙක නිරූපණය කරමින් අතිමහත් රසික ප්‍රසාදයට පත් ව සිටි අනිල් සහ අජිත්, නිකම්ම රයිගමයයි ගම්පලයයි බවට පත් වුණා. අනේ ඉතිං මේ දෙන්නට, දැන් ජීවන් සරණේ සරණයි.

මළ ගෙදර චිත්‍රපටය සියලුම කෝවිඩ් වාර්තා බිද හෙලුවා. මීටරේ සෙන්ටිමීටරේට බැස්සුවා. වැළ නොකැඩී ජනතාව ආවා. අතිසාර්ථක හයවෙනි දවසටත් දිගෑරුණා. දෙසීය කියන අංකයට පවා අලුත් අර්ථකථනයක් දුන්නා. මේ කෝවිඩ් සමයේ සමහරු තමන්ගේ අම්මා තාත්තාගෙ පවා මළ ගෙදර ගියෙත් අමාරුවෙන් කර්ෆියුව් පාස් අරන්. ඒකට මෙන්න කොල්ලෝ. අපියි ලැජ්ජ වෙන්න ඕනේ. මෙහෙමයිනෙ දෙමාපියන්ට සලකන්න ඕනේ. ඉරිසියාවට බනින්න එපා. තාත්තා කරපු දේ කළේ නැත්තම් ‘නොට් උගේ පුතා’ කියන්නෙත් ඉංග්‍රිසියෙන් මේකට තමයි.

වෙන කොහේද රටක, වෙන මොකක්ද චිත්‍රපටයක රගමින් හිටපු, වෙන කාගෙද දියණියකුත්, වෙන කාගෙද මළගෙදරක ආවේ, කොරන්ටයින් නොවී හයිටයිම් රංගනයක නිරත වෙලා කියලා සිනමා ලෝකේ කට කතාවකුත් ගියා.

ඒ අතරේ මට මතක් වුනේ මේ මළ ගෙදර ජෙප්පෙග්ගේ වුණා නම් කොහොමද චිත්‍රපටය වෙන්නේ කියලා. එහෙනම් උන් ඔක්කොම හරියටම මීටරේ දුරින් සෝෂල් ඩිස්ටන්සින් තියන් ගිහින් මළ ගෙදර මළ කෝළමක් කරනවා. උන්ට මඩ ගහන්න බලං ඉන්න උන්ට සිහිමූර්ඡා වෙනවා.

ආණ්ඩුව ඒ අපහාසේ ලේසියෙන් අරින එකක් නෑ. අවමංගල පෙරහැරට තගෙක්ව දාලා එකෙක්ව තල්ලු කරලා හරි, දෙන්නෙක් ලංවෙලා ඉන්න ෆොටෝ එකක් ගහගන්නවා. ඊට පස්සේ ඒ ෆොටෝ එකේ දුර මීටරේට අඩුයි කියලා ඇදලා පෙන්නනවා. ඒ නිවුස් එක රජයේ නාලිකා දෙකයි ආණ්ඩුවේ නාළිකා දෙකයි නිවුස් බ්‍රේක් වෙනකම් ගහනවා. ඊළග චන්දෙදි තුන දෙක වෙයන් කියා පතනවා.

මේක අවස්ථාවක් කරගෙන ඕනනම් ජෙප්පොන්ටත් පුලුවන් මළගෙයක් කරන හැටි රටට පෙන්නලා තුන හතර කර ගන්න උත්සාහ කරන්න. මැයි දිනයට පසු දා ගෝල්ෆේස් එක සුද්ද කළා වගේ ෆොටෝ එකක් ගහලා ෆේස්බුක් එකේ වයිරල් වෙන්නත් පුලුවන්. තොණ්ඩගෙ මළගෙදරයි ජුණ්ඩගෙ මළගෙදරයි කියලා ෆොටෝ දෙක එකට යද්දි කොහොමද ගැම්ම.

පව්, මළ ගෙදර ජවනිකාව හැට නමය හැත්තෑව කර ගැනීමේ අහිංසක ප්‍රයත්නක්. තොණ්ඩලා සමගම අබාවයට යන සිනමා ව්‍යාපාරයට පණ දෙන්න අලුත් වීරයෙක් තිරයට ගෙන ආවඩන්නට අවංක උත්සාහයක්.

වෘත්තීය සංගම් ව්‍යාපාරයක් කිව්වට, වහල්ලු සහ හාම්පුත්තු සම්බන්දයක් තමයි වතුකරයේ කවදත් තිබුණේ.

ඒත් අද වෙනකොට ශ්‍රී ලංකා පොලිටිකල් වහල් රේටින්ස් චාර්ට් එකේ වතුකම්කරුවො දැන් දෙවැනි තැනට වැටිලා. තොණ්ඩලා කම්කරුවන්ට ලබා දීපු ලොකුම ගෞරවය ඒක.

තොණ්ඩලා කවුරුත් හොද නළුවෝ. සෞම්‍යමූර්ති නම් මේකප් නැතිවම කුසපබාවතී නාට්‍යයේ කුසගෙ චරිතෙට දාන්න තිබ්බ කැපිලා පේන හාදයා. අලුත් කොල්ලා ජීවන්ගෙ පෙනුම බොලිවුඩයේ ටයිගර්ගෙයි කොලිවුඩයේ ධනූෂ්ගෙයි හයිබ්‍රිඩ් එකක් වගෙයි මට පේන්නේ. අර රතුපාට ජටාවක් ඔලුවෙ බැදගෙන ඉන්න ෆිල්ම් එකේ ප්‍රොමෝෂන් වලට පාවිච්චි කරන ෆොටෝ එකනම් පට්ට. ඒක දැක්කම මටත් නුවරඑළියේ පදිංචියට ගිහින් තොණ්ඩට චන්දෙ දෙන්න හිතෙනවා.