දැන් මොකක් නැතත් අපට ක්රිකට් ඇත. ඒ මදිවට උහු තරඟත් දිනති. ලංකාව වල පල්ලටම වැටී සිටින මේ මොහොතේ සංචාරක ඔස්ට්රෙලියා කණ්ඩායම මෙරටට පැමිණීමම අගය කළ යුතුය. පෙට්රල් ඩීසල් ගෑස් සියල්ල තිබියෙදී බෝම්බ බියට උන් 1996 ලෝක කුසලානයට ලංකාවට ආවේ නැත.
“දැන් බලනවා ඔස්ට්රෙලියා කණ්ඩායම අපට දෙන ඒ පණිවිඩේ. තෙල් ගෑස් වලට වඩා බෝම්බ භයානකයි. පෝළිමේ ඉන්න හරි රටක් ඉතිරි වුණේ මෙයාලා නිසානේ. ඔසියොන්ගෙ පැමිණීමෙන්ම තේරෙනවා රට එදා තිබුණු තත්වෙට වැඩිය හොද තැනක තාමත් තියෙන්නේ කියලා”
පෙට්රල් නැති දුකට කියන කවි සීපද මෙන් මෙයද පෝළිමේ රැස්ව හිඳින අය කුපිත කිරීමට මා මිතුරා කියූ කතාවක් වග අමුතුවෙන් නොකිව මනාය. එහෙත් ක්රිකට් යන මැජික් පදය ඇසීමෙන්දෝ ජනයා කලබල නොවූහ.
“ඔසියොන්ට සහයෝගෙට කහ ඇදගෙන ගිය එකට මගේ නම් සම්පූර්ණ සහයෝගය දෙනවා. හැබැයි අපි 3ට 1 ගානේ සීරිස් එක දිනලා හිටියෙ නැත්තං ඔය සහයෝගෙ ලොවෙත් නෑ. එහෙනම් ඔසියො වගේම ලංකා ටීම් එකත් ‘පන්දු කෙළින අමනයෝ’ ගාණට වැටෙනවා ශුවර්”
තෙල් මිල ඉහළ ගිය බව බ්රේකින් නිවුස්එකක් ආවේය.
“ඒක ඇත්ත. ආණ්ඩුවත් ක්රිකට් ටීම් එකෙන් ඉගෙන ගන්න ඕන පාඩම ඒක. පොඩ්ඩක් හරි අපිව දිනවලා පෙන්නුවොත් අපිටත් පුළුවන් පොඩි සහයෝගයක් දෙන්න. ඉන්දියාවට වරාය තෙල් ටැංකි බලශක්ති ව්යාපෘති බාර දෙන කොට ‘ජන මන අබිනයක ජයහේ’ කියලා ගායනා කරන්න උනත් බැරිය අපිට”
අද පැමිණීමට නියමිතවූ තෙල් නැව දින නියමයක් නොමැතිව මුහුදේ අතරමං වී ඇති බව කාලගුණ විද්යා දෙපාර්තමේන්තුව පවසා සිටියි.
“කොහොමටත් ඒක අපේ ජාතික ගීයට වඩා ලස්සනයිනේ. එක්කො රට පිටින්ම ඉන්දියවට දීලා දැම්ම නම් ඉවරනේ. ක්රිකට් ටීම් එක විතරක් ලංකාවෙ නමට තියාගෙන. හරියට එංගන්තෙයි වේල්සුයි වගේ”
දින ගණනක් පෝළිමේ සිටි අයෙක් රටම ඉන්දියාවට දී තෙල් ලබා ගැනීමට සිතීම පිළිබඳ එහි කිසිවෙක් විරෝධය නොපෑහ.
“පිස්සුද මනුස්සයෝ මෙච්චර වටින රටක් ඉන්දියාවට පාවලා දෙන්න? මොළේ හොඳ නැද්ද? එතකොට කොහොමද අපේ අහිංසක දේශපාලුවෝ ටික හොරා කන්නේ? හොරා කන්නත් ඉන්දියාවෙන් ටීම් එකක් බස්සයිනේ”
රට වෙන රටකට බාර දීමට ඇති නොහැකියාව දැන් ජනතාවට ප්රශ්නයකි.
“රට ඉන්දියාවට දුන්නොත් අපේ දේශපාලකයන්ට පුළුවන් ආයේ අපිව අන්දලා නිදහස් සටනට බහින්න. අපට නිදහස දියව්! කියපුවම අපි දැන් දැනගන්න ඕන උන් කියන්නේ, “අපිට හොරකම් කරන්න දියව්!’ කියලා. ඕවට අහුවෙයි අපි ආයෙත්”
නැවත නිදහස් සටන් ද නැත.
“ඉන්දියාවෙන් නිදහස් නොවුණට කමක් නෑ. අපිට මුන්ගෙන් නිදහස් වෙන්න මුකුත් කරන්න බැරිද?”
“ඔව් අපිට මෙහෙම හරි පෝළිම්වල ඉඳලා තෙල් ටික දෙනවට කොහොමද අපි ආණ්ඩුවට කෘතගුණ සලකන්න ඕන?”
“හැබැයි අනේ විරෝධය පාන්න එක එක පාට අදින්න නම් යෝජනා කරන්න එපා. මොකද අපි මොන පාට ඇන්දත් උන් ඉන්නෙ හෙළුවෙන්නේ. උන් හෙළුවෙන් බව අපි දන්න වග උන්ට දනවලා එලවන්නයි ඕනේ. ඒකට හොඳ යෝජනාවක් කරනවකෝ”
