2026 අයිසීසී කාන්තා විස්සයි 20 ලෝක කුසලාන ක්රිකට් තරගාවලියේ දෙවැනි අර්ධ අවසාන තරගයෙන් දකුණු අප්රිකානු කාන්තා කණ්ඩායම පරදා ලකුණු 40ක අතිවිශිෂ්ට ජයක් වාර්තා කිරීමට සත්කාරක එංගලන්ත කාන්තා කණ්ඩායම සමත් විය.
ලන්ඩනයේ කෙනින්ටන් ඕවල් ක්රීඩාංගණයේදී පැවැති මෙම තීරණාත්මක තරගයේ ජයග්රහණයත් සමඟින් වසර අටකට පසු පළමු වරට විස්සයි20 ලෝක කුසලාන අවසන් මහා තරගයකට සුදුසුකම් ලැබීමට ද එංගලන්ත කණ්ඩායමට අවස්ථාව උදා විය.
පසුගිය ලෝක කුසලාන තරගාවලි ද්විත්වයේදීම අර්ධ අවසාන තරගවලදී දකුණු අප්රිකාව හමුවේ පරාජයට පත්වී තරගාවලියෙන් ඉවතට විසිවීමේ අමිහිරි අත්දැකීමට මුහුණ දී සිටි එංගලන්ත කණ්ඩායම, මෙම ජයග්රහණයත් සමඟ එම පරාජයන්ට සාර්ථකව ප්රති අත්තර ලබා දිමට සමත් විය.
තරගයේ කාසියේ වාසිය දිනූ දකුණු අප්රිකානු කණ්ඩායම ප්රථමයෙන් පන්දු රැකීමට තීරණය කළේය. ඒ අනුව පිටියට පිවිසි එංගලන්ත කණ්ඩායමට ආරම්භයේදීම දරුණු ප්රහාරයකට මුහුණ දීමට සිදු විය. වේග පන්දු යවන ශබ්නිම් ඉස්මයිල් සහ මරිසාන් කැප්ගේ දක්ෂ පන්දු යැවීම හමුවේ එංගලන්ත මුල් පෙළ පිතිකාරිණියන් තිදෙනෙකුම ලකුණු 33ක් තුළ දැවී ගියේය. එහිදී ඇමී ජෝන්ස්ව දවාගත් ශබ්නිම් ඉස්මයිල්, කාන්තා විස්සයි20 ලෝක කුසලාන ඉතිහාසයේ විකට් 50ක් බිඳහෙළු පළමු පන්දු යවන්නිය බවට පත්වෙමින් වාර්තාවක්ද පිහිටවූවාය.
කෙසේ වෙතත්, ආබාධයකින් පසු නැවත කණ්ඩායමට පැමිණි සුපිරි ක්රීඩිකා සීවර්-බ්රන්ට්’ සහ නායිකා හෙදර් නයිට් එක්ව එංගලන්ත ඉනිම සවිමත් කළහ. සිව්වැනි විකට්ටුව වෙනුවෙන් පන්දු 90කින් ලකුණු 133ක අගනා සබඳතාවක් ගොඩනැඟීමට ඔවුහු සමත් වූහ. සීවර්-බ්රන්ට්’ පන්දු 47කදී හතරේ පහර 11ක් සහ එක් හයේ පහරක් සමඟින් වේගවත් ලකුණු 75ක් රැස් කළාය. ඇයට අනගි සහයක් දුන් හෙදර් නයිට් පන්දු 47කදී ලකුණු 58ක් ලබා ගත්තාය. ඉනිමේ 19 වැනි පන්දුවාරයේදී නොන්කුලුලෙකෝ ම්ලාබා විසින් මෙම ක්රීඩිකාවන් දෙදෙනාවම දවාගැනීමට සමත් වුවද, නියමිත පන්දුවාර 20 අවසානයේ කඩුලු 5ක් දැවී ලකුණු 169ක ප්රබල ලකුණු සංඛ්යාවක් පුවරුවට එකතු කිරීමට එංගලන්තය සමත් විය. දකුණු අප්රිකාව වෙනුවෙන් ශබ්නිම් ඉස්මයිල් සහ නොන්කුලුලෙකෝ ම්ලාබා කඩුලු 2 බැගින් බිඳහෙළූහ.
ලකුණු 170ක ජයග්රාහී ඉලක්කයක් හඹා යාම සඳහා පිටියට පිවිසි දකුණු අප්රිකානු කණ්ඩායමට සාර්ථක ආරම්භයක් ලබාදීමට ආරම්භක පිතිකාරිණියන් වූ ලෝරා වොල්වාර්ඩ් (17) සහ ටැස්මින් බ්රිට්ස් සමත් වූහ. ඔවුහු පළමු කඩුල්ල වෙනුවෙන් ලකුණු 47ක් එකතු කළහ. එහෙත් ලින්සි ස්මිත්ගේ පන්දුවක් හමුවේ වොල්වාර්ඩ් දැවී යාමත් සමඟ දකුණු අප්රිකානු ඉනිමේ බිඳවැටීම ආරම්භ විය.
දකුණු අප්රිකානු ඉනිම වෙනුවෙන් තනි සටනක නිරත වූ ටැස්මින් බ්රිට්ස් පන්දු 45කදී හතරේ පහර 6ක් සමඟින් ලකුණු 51ක් රැස් කළද, චාලි ඩීන්ගේ පන්දුවක් හමුවේ ඇය දැවී යාමත් සමඟ දකුණු අප්රිකානු ජයග්රාහී බලාපොරොත්තු බිඳ වැටුණි. එංගලන්ත දඟපන්දු යවන්නියන් වූ චාලි ඩීන්, සෝෆි එක්ලස්ටෝන් සහ ලින්සි ස්මිත් එක්ව දකුණු අප්රිකානු පිතිකාරිණියන්ට ලකුණු ලබා ගැනීමට කිසිදු ඉඩක් ලබා නොදුන්හ.
නියමිත පන්දුවාර 20 අවසානයේ දකුණු අප්රිකානු කණ්ඩායමට කඩුලු 8ක් දැවී රැස් කරගත හැකි වූයේ ලකුණු 129ක් පමණි. ඒ අනුව එංගලන්ත කණ්ඩායම ලකුණු 40ක විශිෂ්ට ජයක් අත්කර ගත්තේය. පන්දු යැවීමේදී එංගලන්තය වෙනුවෙන් ලෝරන් බෙල් සහ චාලි ඩීන් කඩුලු 2 බැගින් දවාගත්හ.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
තරගයේ දක්ෂතම ක්රීඩිකාව ලෙස එංගලන්තයේ සීවර්-බ්රන්ට්’ සම්මානය දිනා ගත්තාය. මේ අනුව, සාර්ථක ලෙස අවසන් මහා තරගයට පිවිසි එංගලන්ත කාන්තා කණ්ඩායම, සුපිරි ලෝඩ්ස් (Lord’s) ක්රීඩාංගණයේදී පැවැත්වෙන අවසන් මහා තරගයේදී ඕස්ට්රේලියානු කාන්තා කණ්ඩායම සමඟින් ලෝක කිරුළ සඳහා තරග වැදීමට නියමිතය.
