අලුත් අමුත්තාගේ කිරි සුවඳ දිගේ ඇල්ප්ස් කඳු මතට ගිය ගමන…

සුනේත්‍රා ඇතුගල්පුර

-ජායාරූප ශෂි සුබ්‍රමනියම්-

ඇල්ප්ස් කිරි ගොවීන්ගේ ජීවිතය කැපවීම, වෙහෙස නොබලා වැඩ කිරීම, ධෛර්ය සම්පන්න බව හා ආත්ම තෘප්තිය මත පදනම් වූ එකක් යැයි කීම නිවැරදිය.
එය ඇල්ප්ස් කඳු වැටියේ ජීවත්වන සතා සිවුපාවට පවා පොදුය. ඇල්ප්ස් කඳු වැටියේ ඇති කුඩා මාර්ග ඇතැම්විට ගවයින් ගෙන් පිරී පවතින අතර ඒ හරහා වාහනයකින් ගමන් කරන අයෙකුට බොහෝ වේලා ගතවන අවස්ථාද නැතුවා නොවේ. සිය නිදහස නිදැල්ලේ ජීවත්වන ගවයින් උපරිමයෙන් භුක්ති විදින්නේ ඒ ආකාරයටය .

අලුත් අමුත්තා.

මාර්ටින් හා රෙබෙකා යුවළට හිමි වූ නවතම අමුත්තා පිළිබඳව කෙටි පණිවිඩය අපට ලැබුණේ පාන්දර 3.45 පමණය. එය කිසිසේත් ඇල්ප්ස් කඳු වෙත යාමට සුදුසු වේලාවක් නොවෙයි. දුර්නක්තාල් ඇල්ප්ස් කඳු වැටිය වෙත ගමන් කිරීමට අප යොදාගෙන තිබූනෙ එදින පෙරවරු 9:00 ටය. අලුත උපන් අමූත්තා දැකගැනීමට අපද නොවිසිලිමත්ව සිටියෙමු. එහෙත් රෙබෙකා හා මාටින්ගේ ගව පට්ටිය වෙත ගමන් කරන මාර්ගයේ මීටර් දෙසීයක් පමණ මෙපිට අපිට නතරව්මට සිදුවිය. ඒ මීට පෙර කී ආකාරයට ගවයින් මාර්ගය අවහිර කරමින් සිය නිදහස භුක්ති විඳිම නිසාය. මාර්ගය හරහා ඉදිරියට ගමන් කිරීමට දැරූ සියලු ප්‍රයත්නයන් අසාර්ථක වූ අතර අප ගමන් කළ වාහනය තුළට හොම්බ දැමීමට ඇතැම් දඟකාර යොවුන් ගවයින් උත්සාහ දැරීම අපට සොඳුරු අත්දැකීමක් විය. අවසානයේ මාටින්ට අප වෙත පැමිණීමට සිදුවූයේ ,නොසිතූ ආකාරයට මාර්ගය තවදුරටත් අවහිර වි තිබූ නිසාය .
අලුත උපන් අමුත්තා සඳහා ගව පට්ටියේ විශේෂ ස්ථානයක් සූදානම් කොට තිබිණි. මෙම නව අමුත්තාගේ සම්ප්‍රාප්තියෙන් වඩාත් සතුටට පත්ව සිටින්නේ මාර්ටින් හා රෙබෙකා යුවළගේ දරුවන් දෙදෙනාය. ඔවුන් දැනටමත් මෙම වසු පැටියාට “හාන්ස්ලි” නම යොදා තිබිණි. ඒ වනවිටත් හාන්ස්ලිට අවශ්‍ය කිරි සිය මවගෙන් දොවාගෙන තිබුණේය. ලීටර් එක හමාරක බීම බෝතලයකට දමාගත් එම කිරි මාටින් විසින් වසු පැටියාට පෙවීම ඉතාම සොඳුරු දසුනක් විය .
“අපි මේ වසුපැටියා ගෙ මවගේ කිරි දින කීපයක් යනතුරු බීමට දොවන්නේ නැහැ, ඒ දින කීපයේම කිරි දොවන්නෙ වසු පැටියාට පොවන්න විතරයි, ඇතැම්විට වසු පැටියාට කිරි පෙවීම ලේසි පාසු පහසු කර්තව්‍යයක් නොවේ “රෙබෙකා පැවසුවේ හාන්ස්ලිට කිරි පෙවීමට මාර්ටින් දැඩි උත්සාහයක් දරන අතරතුරදීය.

දිනචර්යාව

ඇල්ප්ස් කිරි ගොවීන් ගේ දින චර්යාව සාමාන්‍යයෙන් ආරම්භ වන්නේ අලූයම හතරට පමණය. බොහෝ විට කෝපි වීදුරුවකින් සප්පායම්වන ඔවුන් ඉන් අනතුරුව යන්නේ ගව පට්ටිය වෙතය. කිරි එළදෙනුන් සඳහා වියලි තණකොළ ලබාදීම ගව පට්ට්යෙදී ඇල්ප්ස් ගොවීන් මුලින්ම කරන කර්තව්‍යයයි. කිරි දෙවීම ආරම්භ කෙරෙන්නේ ඉන් අනතුරුවය. ඒ සඳහා යන්ත්‍රානුසාරයෙන් ක්‍රියාත්මක වන කිරි පොම්ප යොදා ගැනේ. කිරි දෙවීම සඳහා එක්තරා ක්‍රියාපිළිවෙතක් තිබේ. මුලින්ම එළදෙනුන්ගේ තන්පුඩු පිරිසුදු කළ යුතුය. අනතුරුව කිරි ප්‍රසාරණය වීම සඳහා දෑත් ආධාරයෙන් තන් පුඩු මිරිකා කිරි පිටතට ගැනේ.  ඉන් අනතුරුව සිදු කරන්නේ බීජ නාශක ද්‍රව්‍යයක් මගින් එළදදෙනුන්ගේ තන් පිඩු යළි පිරිසිදු කිරීමය. පසුව යන්ත්‍රානුසාරයෙන් එම කිරි ප්‍රධාන කිරි ගබඩාව වෙත පොම්ප කෙරේ.
මාටින් හා උරෙන් උර ගැටී රෙබෙකා කිරි දෙවීමේ කටයුතුවල නිරතවීම කැපී පෙනෙන දසුනකි. ඔවුන් ඇතැම් එළදෙනුන් වෙත ළඟා වත්ම උන්ගේ තනපුඩු වලින් කිරි පිටතට ශ්‍රාවය වීම ආරම්භ කෙරේ .
“මෙය සාමාන්‍ය දෙයක්, අපි කිරි දොවන්න ලං වෙනකොටම උන් ඒක දන්නවා, සමහර වෙලාවට අපිටත් කලින් උන් සූදානම් වෙලා කිරි දොවන්න.

“මාර්ටින් පැවසුවේ මෙම දසුන අපට නැවුම් අත්දැකීමක් බව අපගේ මුහුණුවලින දිස් වීම නිසාය .
මාර්ටින් රෙබෙකා යුවළ දිනකට දොවාගන්නා කිරි ප්‍රමාණය ලීටර් 770ක් පමණ වේ.  දිනකට එක් එළදෙනකුගෙන් ලබා ගන්නේ කිරි ලීටර් 18.5 ක ප්‍රමාණයකි. එම කිරි යොදා ගැනෙන්නේ ඇල්ප්ස් චීස් නිෂ්පාදනය සඳහාය.

ඇල්ප්ස් චීස් නිෂ්පාදනය පිළිබඳ තොරතුරු ලබන සතියේ බලාපොරොත්තුවන්න.