කීර්ති ප්රනාන්දු –
ඛනිජ තෙල් ආනයනය කිරීම ඇතුළු ලංකා ඛනිජ තෙල් සංස්ථාව සතුව තිබූ ඒකාධිකාරී බලය විදේශ සමාගම් තුනකට ලබාදීම සහ වත්මන් ආණ්ඩුවේ ක්රියාකලාපයට එරෙහිව ලංකා ඛනිජ තෙල් සංස්ථාවේ වෘත්තිය සමිති අද (28) දින සිට දියත් කර ඇති වර්ජනය හේතුවෙන් ඛණිජ තෙල් පැටවීම බොදහැරීම ඇතුළු සියලුම මෙහෙයුම් කටයුතු මේ වනවිට මුලුමනින්ම අඩාල වී ඇති බව වෘත්තීය සමිති පවසයි.
ඛනිජ තෙල් සංස්ථාවේ පොදු සේවක සංගමයේ සභාපති, ආචාර්ය අශෝක රන්වල ලංකාසරට අදහස් දක්වමින් පැවසුවේ අද දහවල් 12.30 සිට දියත් කළ වර්ජනය වෘත්තීය සමිති හෑල්ලුවට ලක් කරමින් ජාතික දේපල වෙන්දේසි කරන ව්යාපෘතිය දියත් කර ඇති කටමැත දොඩවන ඇමතිවරයා දැන්වත් නිශ්ශබ්දව තමන්ගේ තරම තේරුම් ගත යුතු බවය.
අද සවස සිට බවුසර සියයකට ආසන්න ප්රමාණයක් ආපසු හරවා යැවූ බවත් පැයෙන් පැය සාකච්ඡා කරමින් වෘත්තීය සමිති කරගෙන යන මෙම වෘත්තීය ක්රියාමාර්ගවල ඊලඟ අදියර කුමක්දැයි දැන් ප්රකාශ නොකරන බවත් ඔහු කීවේය.
පුද්ගලික ඉන්ධන බවුසර හිමියන්ගේ සංගමයේ සමලේකම් ශාන්ත සිල්වා පැවසුවේ උදේ වරුවේ ඉන්ධන පැටවීම සහ ප්රවාහනය සිදුවුව ද වෘත්තීය ක්රියාමාර්ගය ආරම්භ වුන සවස් වරුවේ එකදු බවුසරයකට හෝ ඉන්ධන පුරවා නැති බවය.
ඉන්ධන පරිභෝජනය මේ වනවිට යම් පමණකට පහළ වැටී ඇති හෙයින් හෙට දිනය තුළ වර්ජනය යථාවත් වුවහොත් විශාල ගැටලුවක් ඇති නොවනු ඇතැයි ඔහු විශ්වාසය පළ කළේය.
නමුත් ඉන්ධන බෙදුම් කරුවන්ගේ සංගමයේ සභාපති කපිල නාඔටුන්න ලංකාසර කළ විමසීමක දී පැවසුවේ කොළඹ අවට ඉන්ධනහල්වල හෙට උදේ වරුව වනතුරු ඉන්ධන ගැටලුවක් ඇති නොවනු ඇති වුවද කොළඹින් පිට තත්ත්වය ගැටලු සහගත විය හැකි බවය.
අද සවස් වරුවේ ඉන්ධන නිකුත් නොකළ හෙයින් හවස 04න් පසු වැඩි වශයෙන් ආරම්භවන කොළඹින් පිටට ඉන්ධන ප්රවාහනය මේ වනවිට සම්පූර්ණයෙන්ම ඇනහිට ඇති බවය.
“කොලොන්නාවෙන් ලෝඩ් 350ක් විතර මේ වනවිට නැවතිලා. කොළඹින් පිට බෙදා හැරීමේ මධ්යස්ථාන 08ක් තිබෙනවා. බෙදා හැරීමේ මධ්යස්ථානවලත් හවස 2න් පස්සේ බෙදා හැරීම් නැවතුනා. හෙට කොළඹින් පිට තෙල් අර්බුදයක් ඇති වීමේ වැඩි ඉඩක් තියනවා. අද හවස් වරුවේ හෙට තියන ඇණවුම් ප්රමාණය මුද්රණය විය යුතුයි. එම කටයුතු සිදු වෙලා නෑ…” සභාපතිවරයා කිවේය.
මේ වනවට අන්තර්ජාතික සමාගම් තුනක් වෙත ඉන්ධන ආනයනය, බෙදා හැරීම සහ ගබඩා කිරීම සහ සිල්ලර අලෙවිය සඳහා කැබිනට් අනුමැතිය හිමි වී තිබේ.
