දිනසේන රතුගමගේ –
යුද හමුදාව විසින් යුද සමයේදී අධි ආරක්ෂිත කලාප පවත්වා ගෙන ගිය කිළිනොච්චිය හා යාපනය යන දිස්ත්රික්කවල ඉඩම් අක්කර 109 ක් නිදහස් කොට ජනතා අයිතියට පත් කිරීම අද (10 ) යාපනය දිස්ත්රික් ලේකම් කාර්යාලයේදී සිදුවුණි.
ජනාධිපති කාර්යාලයේ ජාතික ආරක්ෂාව පිළිබඳ ජනාධිපති ජ්යෙෂ්ඨ උපදේශක සහ ජනාධිපති කාර්ය සාධක බළකායේ ප්රධානී සාගල රත්නායක ප්රධාන ආරාධිත අමුත්තා ලෙස සහභාගි වෙමින් ඉඩම් හිමිකරුවන් වෙත ඉඩම් ඔප්පු ප්රදානය කළේය.
මෙහිදී අදහස් දක්වමින් සාගල රත්නායක ප්රකාශ කළේ 1985 වසරේ උතුරේ ඉඩම්ෙවල අයිතිය තිබූ මුල් අයිතිකරුවන්ගේ ඉඩම් කුමන හේතුවක් නිසා හෝ ලබා ගෙන ඇත්නම් ඒවා නිදහස් කොට අයිතිකරුවන්ට ලබා දීම පිණිස ජනාධිපතිවරයා විසින් දියත් කොට ඇති වැඩ පිළිවෙළ මත ඉඩම් මේ අන්දමට නිදහස් කරන බවයි.
මේ වසරේ අප්රේල් මසය වන විට එම ඉඩම් වලින් විශාල ප්රමාණයක් නිදහස් කොට ජනතාව වෙත ලබා දෙන බව කී සාගල රත්නායක මේ කාරණයේදී යුද හමුදාව හා රජයේ සෙසු නිලධාරීන් දක්වන උනන්දුව ඇගයීමට ලක් කළේය.
මේ අවස්ථාවට ධීවර අමාත්ය ඩග්ලස් දේවානන්දා යාපනය වැඩ බලන දිසාපති එම් ප්රදීපන් යාපනය ආරක්ෂක ආඥාපති මේජර් ජෙනරාල් චන්දන වික්රමරත්න, ජනාධිපති ලේකම් කාර්යාලයේ උතුරු සම්බන්ධීකාරක එල්. ඉලංගෝවන්, ඇතුලු විශාල පිරිසක් ද යාපනයේ හා කිළිනොච්චියේ ඉඩම්ලාභීන්ද සහභාගී වූහ.
