කොළඹ සහ ගම්පහ තෝරාගත් ස්ථාන කිහිපයකදී රුපියල් 55කට බිත්තර ලක්ෂ හතරක් දිනකට අලෙවි කිරිම මේ වනවිට ආරම්භ වී තිබේ.
කොළඹ සහ ගම්පහ නගරවල තෝරාගත් ස්ථානවලදී අද (28) දහවල් 12.00 පසු රුපියල් 55ක උපරිම සිල්ලර මිල ගණන් යටතේ බිත්තර අලෙවි කිරීම සිදුකරන බව සමස්ත ලංකා කුකුළු ව්යාපාරිකයින්ගේ සංගමයේ සභාපති අජිත් ගුණසේකර පැවසුවේය.
බිත්තර ලක්ෂ 4ක් රැගත් ලොරි රථ 16ක් අද කුලියාපිටියේ සිට කොළඹට පැමිණ ඇත. මේ වනවිට රුපියල් 65 දක්වා මිලකට බිත්තර අලෙවි වීම වළක්වාගෙන වෙළෙඳපල මිල පාලනය කර ගැනිම සඳහා මෙම ව්යාපෘතිය දියත් වී තිබේ.
මේ අලෙවි රථවලින් එක් පුද්ගලයෙකුට බිත්තර 25 -30 දක්වා ලබා ගත හැකි අතර ආපන ශාලා සඳහා බිත්තර 50 සීමාව යටතේ නිකුත් කෙරේ.
තොග වෙළෙඳුන් සඳහා මෙම රථවලින් බිත්තර නිකුත් කරන්නේ නැත.
රුපියල් පනහක මිලක රඳවාගෙන තිබුණු බිත්තරවල මිල සඳහා සුදු බිත්තරයක් රුපියල් 44ක් ලෙසත් රතු බිත්තරයක් රුපියල් 46ක් ලෙසත් පාලන මිලක් නියම කරමින් පනවා තිබු ගැසට් නිවේදනය පෙබරවාරි මස 06 වනදා දක්වා අත්හිටුවීමට අභියාචනාධිකරණය නියෝග කිරීමෙන් පසු වෙළෙඳපොළේ බිත්තර මිල ඉහළ යෑම ආරම්භ වුණි.
මේ තත්ත්වය තුළ කෘෂිකර්ම ඇමතිවරයා සහ කුකුළු නිශ්පාදන සංගම් අතර ඇතිවූ සාකච්ඡාවකින් අනතුරුව රුපියල් 55 උපරිම සිල්ලර මිලකට බිත්තරයක් අලෙවි කිරීමට එම සංගම් එකඟ විය.
