අනුරාධපුර – පර්සි කුරුනේරු
කුසලතා පූර්ණ හා සමාජ අත්දැකීම් බහුල නොවූ අධ්යාපන දැනුම පමණක් තිබෙන දරුවන් පිරිසක් විශ්වවිද්යාල ඇතුළත්වීම නිසා ඔවුන් සමග කටයුතු කිරීම විශ්වවිද්යාල පරිපාලනයට දුෂ්කර කාර්යයක් වී ඇති බව ශ්රී ලංකා රජරට විශ්වවිද්යාලයේ උපකුලපති මහාචාර්ය සංජීවනී ගිනිගද්දර පැවසුවාය.
රජරට ප්රදේශයට විවිධ ක්ෂේත්ර නියෝජනය කරමින් සේවාවක් සිදු කළ ගුරුවරුන් සමාජ ක්රියාකාරීන් සහ මාධ්යවේදීන්ට උපහාර පිදීමට රජරට හසුන පදනම මගින් සංවිධානය කොට තිබූ උත්සවයක් අමතමින් ඇය මේ බව කියා සිටියාය.
අනුරාධපුර අටමස්ථානාධිපති නුවර කලාවියේ ප්රධාන සංඝනායක ගෞරව ශාස්ත්රවේදී පූජ්ය පල්ලේගම හේමරතන නාහිමියන්ගේ ප්රධානත්වයෙන් රජරට විශ්වවිද්යාලයේ උපාධි උත්සව ශාලාවේදී පැවැති උත්සවයේදී වැඩිදුරටත් අදහස් දැක්වූ මහාචාර්යවරිය මෙසේද කීවාය.
“අපි දන්න සත්යයක් තමයි අනුරාධපුර දිස්ත්රික්කයේ අධ්යාපනය ඉතාම පහළ මට්ටමක තියෙන්නෙ. අපි මේවා සඟවා ගෙන හිටියට වැඩක් නොවුණත් පාසැල් අධ්යාපනය ඉතාම පහළ අඩියක තියෙන්නෙ. සිසු දරුවන් වගේම ගුරුවරුනුත් දුප්පත්. දෙමව්පියන් තමන්ගෙ දරුවව බොහොම අමාරුවෙන් වියදම් කර පාසැලට එවන්නෙ. ඒ අයට තම දරුවන් පෞද්ගලික උපකාරක පන්තිවලට යොමු කොට ශක්තිය වාරුව නොමැති තරම්. එම නිසා පාසැල තුළ අධ්යාපනය යථාවත් කිරීමට හා ඔබ අද ගනු ලබන උත්සාහය වගේ දෙතුන් ගුණයක් උත්සාහ ගෙන රජරට ගොඩ නැගීමට වෙර දරන අසරණ දෙමව්පියන්ගේ දරුවන්ට අධ්යාපනය ලබා දී ඔවුන්ගේ සිහින යථාර්ථයක් කිරීමට උත්සාහ කරන්න.
ඔබලා දරුවන්ගේ අධ්යාපනය නගා සිටුවීමට උත්සාහ දරනවා ඇති. ඔබ ඒ සදහා මහත් පරිශ්රමයක් දරන බව මා දන්නවා. නමුත් ඇතැම් අවස්ථාවල ඒ සදහා යම් යම් හේතූන් නිසා විවිධ බාධාවන් එල්ල වෙනවා ඇති.
ඒ වගේම දරුවන්ට පාසැල තුළ අධ්යාපනය ලැබීමට හැකි අවස්ථාව වැඩි කර දෙන්න කියා විදුහල්පතිවරුන් හා ගුරුභවතුන්ගෙන් ඉල්ලා සිටිනව. එහෙම නොවුනොත් විශ්වවිද්යාල පරිශ්රයට එන්නෙ පෞද්ගලික උපකාරක පන්තිවලට ගොස් අධ්යන පොදු සහතික පත්ර උසස් පෙළ විභාගයට පෙනී සිට සමත්වූ දරුවෙක්.
කුසලතා පරිපූර්ණ හා සමාජ අත්දැකීම් බහුල නොවූ අධ්යාපනික දැනුම පමණක් තිබෙන එවැනි අයත් සමග ගනුදෙනු කිරීමට හරිම අමරුයි. ඒ තත්ත්වයන් සමග විශ්වවිද්යාල පරිශ්රයට එන එම දරුවො යහපත් උපාධිධාරීන් බවට පත් කොට සමාජයට යැවීමට විශාල පරිශ්රමයක් දැරීමට සිදුවී තිබෙනවා.
