සමගි ජනබලවේගය අද කොළඹ දී සංවිධානය කළ විරෝධතා පා ගමන කොළඹ ගාලුමුවදොර පිටිය ආසන්නයේ දී නිමාවට පත් විය.
කොළඹ සර් මාකස් ප්රනාන්දු මාවතේ පිහිටි විපක්ෂ නායක කාර්යාලය අසලින් අද (16) සවස 2ට පමණ ආරම්භ වූ විරෝධතා පා ගමන පිත්තල මංසන්ධිය, කොල්ලුපිටිය හරහා ගාලුමුවදොර අසලට පැමිණියේය.
අද උදෑසන සිට අනුරාධපුර, පොළොන්නරුව, හම්බන්තොට, අම්පාර, කුරුණෑගල, හල්දුම්මුල්ල, තිස්සමහාරාමය, බදුල්ල සහ මහනුවර ඇතුළු දිවයිනේ විවිධ ප්රදේශවලින් විරෝධතාකරුවන් රැගත් බස් රථ කොළඹට පැමිණෙන අතරතුර පොලිසියෙන් එල්ල වූ බාධාවන් සමග උණුසුම් තත්ව ඇති වී තිබිණි.
පොලිිසය භාර ඇමති විශ්රාමික රියර් අද්මිරාල් සරත් වීරසේකර කීවේ පුලුවන්නම් ඇවිත් විරෝධතාව පවත්වන ලෙසයය. කටමැත දොඩවන අයට තරාතිරම නොබලා නීතිය ක්රියාත්මක කරන බවය.
සෞඛ්ය අමාත්ය කෙහෙළිය රඹුක්වැල්ල ප්රකාශ කළේ ජනතාවගේ සෞඛ්ය ආරක්ෂාව වෙනුවෙන් මෙම විරෝධතාව සඳහා ඉඩ ලබා නොදෙන බවය.සෞඛ්ය නීති රීති උල්ලංඝනය කරමින් උද්ඝෝෂකයින් කොළඹ ට පැමිණියහොත් ඔවුන්ට එරෙහිව නීතිය ක්රියාත්මක කරන බව ද ඇමතිවරයා කීවේය.
එමෙන්ම සෞඛ්ය නීතී උල්ලංඝනය කරන්නන්ට එරෙහිව නීතිය ක්රියාත්මක කරන ලෙස පොලීසියට උපදෙස් ලබාදී ඇති බව ද පොලිස් මාධ්ය ප්රකාශක ජ්යෙෂ්ඨ පොලිස් අධිකාරී නිහාල් තල්දූව කීවේය.
ඊයේ නිකුත් කළ සෞඛ්ය මාර්ගෝපදේශයට අනුව නිසි බලධාරීයාගෙන් ලබා ගන්නා අවසරයකින් තොරව නව රෙගුලාසිවලට අනුව මහජන ඒකරාශී වීම්, රැස්වීම් හා උත්සව සඳහා නැවත දැනුම් දෙන තුරු තහනම් විය.
විරෝධතාවයට එරෙහිව අලුත්කඩේ අංක 05, මහර අංක 01 හා 02, කඩුවෙල සහ හෝමාගම යන අධිකරණ විසින් වාරණ නියෝග නිකුත් කර තිබිණි.
විරෝධතා පැවැත්වීම වළක්වාලන ලෙස පොලීසිය විසින් සිදුකළ ඉල්ලීම මාළිගාකන්ද, ගංගොඩවිල සහ කොළඹ ප්රධාන මහෙස්ත්රාත් අධිකරණ විසින් ප්රතික්ෂේප කර තිබිණි.
