සමගි ජන බලවේගය පාර්ලිමේන්තුවට ගෙන එන විධායක ජනාධිපති ක්රමය අහෝසි කිරීමේ යෝජනාව සඳහා අත ඔසවන්නේ නැති බව ශ්රී ලංකා නිදහස් පක්ෂයේ මහලේකම් දයාසිරි ජයසේකර අද ( 22) පාර්ලිමේන්තුවේ දී පැවසුවේය.
දරුවාත් බේසමත් වතුරත් එක්වර විසිකිරීමට වගකිවයුතු මන්ත්රීවරුන් ලෙස තමන් සූදානම් නැති බව ද ඔහු පැවසුවේය.
දයාසිරි ජයසේකර මන්ත්රීවරයා මෙසේ ද පැවසුවේය.
“1978 සිට අප විධායක ජනාධිපති ක්රමය යටතේ කටයුතු කරනවා. ඒ වගේම විවිධ අවස්ථාවල දී ඒක වෙනස් වෙනවා. 17 වැනි ව්යවස්ථා සංශොධනයෙදි ජනාධිපති බලතල අඩු වෙනවා. 18න් බලතල වැඩි කරගන්නවා. 19 ගෙනත් බලතල අඩු කරගන්නවා. අඩු කරගත්තාම ඉතාම ලොකු අර්බුදයක් රට ඇතුළෙ ඇති වෙනවා. විධායකය සහ ව්යවස්ථාදායකය ගහගන්න තැනට එනවා. ඊට පස්සේ 20 ගෙනත් තිබුණාටත් වඩා බලතල වැඩි කරගන්නවා.“
“සජබ ගෙනත් තිබෙන යෝජනාව අනුව දරුවත් බේසමත් වතුරත් එකවර විසි කරන්න අපට බෑ. අප දන්නවා විධායක ක්රමය ගැටගැහිලා තියන කාරණා දෙකක් තියනවා. “
“එකක් තමයි චන්ද මේ ක්රමය. ජනාධිපති ක්රමයත් එක්ක ගැටගැහිලා තිබෙන අනෙක් කාරණාව තමයි පලාත් සභා ක්රමය. “
“බැරිවෙලාවක්වත් පලාත්සභා ක්රමය විධායක ජනාධිපතිවරයෙක් නැතිව ක්රියාත්මක වෙන්න ගියොත් වර්ෂ 1987 සර්වානන්ද විනිශ්ඡයකාරතුමා දුන්න බෙදුණු නඩු තීන්දුව අනුව ඉතිරිවෙන්නෙ ෆෙඩරල් රාජ්යයක්. ඒ නිසා අපට ඒක ක්රියාත්මක වෙන්න ඉඩ දෙන්න බෑ මේ පාර්ලිමේන්තුවෙ මන්ත්රීවරු විදිහට. “
“ඒ නිසා අපි බොහොම පැහැදිලිව රටේ ඒකීය භාවය සහ නඩු තීන්දු ගැන කල්පනා කරලා ජනාධිපති ක්රමය අහෝසි කිරීමේ අනාගත වැඩපිළිවෙළකට යා යුතු බවයි අප කියන්නෙ. ඒ ක්රියාත්මකවන වැඩපිළිවෙළ තුළ රට බෙදීමේ වැඩපිළිවෙළක් ක්රියාත්මක වෙනවා නම් අස්ථාවර ආණ්ඩුවක් මේ පාර්ලිමේන්තුව තුළ ඇතිවෙනවා නම් අපට ඊට අත උස්සන්න පුලුවන්කමක් නෑ.‘
“මේ ක්රියාදාමය තුළ ඡන්ද ක්රමයත් පළාත් සභා ක්රමයත් ඉදිරියට ක්රියාත්මක කරන ආකාරය ගැන තීන්දුවකට පැමිණිය යුතුයි. මේ ජනාධිපති ධුරය ඉවත් කිරීමේ ක්රියාදාමයට සෑහෙන කාලයක් යනවා. හේතුව මේකට ජනමත විචාරණයක් තියන්න ඕන. ඒක තීන්දු කරන්නෙ මේ රටේ දැනට ඉන්න ජනාධිපතිවරයා. ඔහුට පමණයි ජනමත විචාරණයක් කැඳවන්න පුලුවන්. ඒ නිසා ජනමත විචාරණයක් ඔහු කැඳෙව්වෙ නැතිනම් ජනාධිපති ක්රමය අහෝසි වෙන්නෙ නෑ. “
‘අනික ජනමත විචාරණයක් මේ වෙලාවෙ කැඳවන්නත් බෑ මේ වෙලාවෙ. මිනිස්සු ජනමත විචාරණයක් තියා ඡන්දයක් තියා පාර්ලිමේන්තුවෙ ඉන්න 225ම එපා, ගෙවල්වලට පලයල්ලා කියලා කියන මට්ටමකට ඇවිත් තියෙන්නෙ.“
“අරගලයේ ඉන්නෙ ජනතාව කියන්නෙ ජනාධිපතිට ගෙදර යන්න කියලා. රාජපක්ෂවරුන්ට ගෙදර යන්න කියලා. දැන් 225ම ගෙදර යන්න කියලා. එතන කවුරුත් ජනාධිපති ක්රමය අහොසි කරන්න කියලා සටන් පාඨ කියන්නෙ නෑ. ජනාධිපතිවරයා සතුව ඇති අභිමත බලතල අඩු කරන්න කියලා ඒ අය කතා කරනවා.“
“අපි කතා කරන්නෙ වෙනස් කතාවක්. 21 වැනි සංශෝධනය ගෙනත් අපි කරන්නෙ සාමකාමී විප්ලවයක්. 19 වැනි ව්යවස්ථා සංශෝධනය, සංශෝධන සහිතව ගෙනත් අපට විශාල වැඩ කොටසක් කරන්න පුලුවන්. මහා නායක හිමිවරුන් ඉල්ලුවෙත් එයයි.“
