ආර්ථික අර්බුදය හේතුවෙන් පීඩාවට පත්ව අසරණව සිටින ජනතාවට ඉන්දියානු රජය ලබාදුන් ආධාර බෙදාදීමේ වැඩසටහනට ලංකා කම්කරු කොංග්රසය දැඩිව බලපෑම් කරන නිසා අදාළ වැඩපිළිවෙළ ක්රියාත්මක කිරීමට විශාල බාධාවක් මතුව තිබෙන බව ශ්රී ලංකා ග්රාම නිලධාරී සංගමයේ ජාතික සංවිධායක නෙවිල් විජේරත්න පවසයි.
මෙම ආධාර හිමිවිය යුත්තේ ලංකා කම්කරු කොංග්රසයේ මහලේකම් ජීවන් තොණ්ඩමන් ට අවශ්යය අයට නොව ඇත්ත වශයෙන්ම දරිද්රතාවයෙන් පෙළෙන පවුල් වලට බව ඔහු කීවේය.
මහනුවරදී අද (01) මාධ්ය හමුවක් පවත්වමින් ජාතික සංවිධායකවරයා මේ බව ප්රකාශ කළේය. එහිදී ඔහු මෙසේද පැවසුවේය.
“ඉන්දියන් රජයේ ආධාර කාටද ලැබිය යුත්තේ කියලා මුලින් නිර්ණායකයක් තිබිය යුතුයි. මේ වෙලාවේ මුළු රටේම ජනතාව ඉන්නේ අසීරුතාවෙන්. මේ තත්ත්වය තුළ මේවා ලබාදෙන්නේ කාටද කියලා තෝරන එකත් ලොකු අසීරුතාවක්. බඩගන්නට ජාති ,ආගම් බේදයක් නැහැ. උතුරුද දකුණද වතුකරයද කියලා වර්ග කරන්න බැහැ. මේ ආර්ථික කඩා වැටීමේ බලපෑම රටේ හැමෝටම තිබෙනවා.
තොණ්ඩමන් මන්ත්රීවරයා මේ ආධාර බෙදීමට ඍජුවම බලපෑම් කරනවා. ශ්රී ලංකා පරිපාලන සේවය, ශ්රී ලංකා ග්රාම නිලධාරී සංගමය, ප්රාදේශීය ලේකම්වරුන්ගේ සංගමය තීරණයක් ගෙන තිබෙනවා දේශපාලනඥයින් සම්බන්ධ වන කිසිදු වැඩසටහනකට සම්බන්ධ වෙන්නේ නැහැ කියලා. ඒ ස්ථාවරයේ අපි අදත් හෙටත් ඉන්නවා. රටම අසරණ වෙලා ඉන්න අවස්ථාවක ඉන්දියාවෙන් ලබා දුන්න බඩු මල්ල බදාගෙන ඒකෙන් දේශපාලන වාසි ගන්න අපි කාටවත් ඉඩ දෙන්නේ නැහැ.
අපි ජීවන් තොණ්ඩමන්ට කියනවා මේකට ඇඟිලි ගහන්න එපා කියලා. වතුකරයේ කාටද හිමිවිය යුත්තේ කියන එක රජයේ නිලධාරීන් බලාගනියි.
මේ වෙලාවේ වසම තුළ සිටින අන්ත දුප්පතා කවුද කියලා ග්රාම නිලධාරිවරයා දන්නවා. ඒත් රජයට තාමත් බැරිවෙලා තිබෙනවා මේ ආධාර බෙදීම සඳහා නිර්ණායක ඉදිරිපත් කරන්න. අමාත්යාංශ ලේකම්,දිසාපති හෝ ප්රාදේශීය ලේකම් කාර්යාල වලට වෙලා නියෝග පැනවූවාට නිර්ණායක දීලා නැහැ. මේ ගෙනාපු බඩු දැනට පන්සල් වල හා වෙනත් ගබඩා වල තැන්පත් කරලා තිබෙනවා. මේවා එහාට මෙහාට ගෙනියන්න නාටාමි වැඩ කරන්න ග්රාම නිලධාරිවරු සූදානම් නැහැ. වාහන සහ බහුකාර්ය නිලධාරීන් යොදාගෙන අවශ්යය තැන් වලට ඒවා ප්රවාහනය කරලා දෙන්න ඕන.
ආධාර හිමිවිය යුතු පුද්ගල නාම ලේඛණ අපි ලබාදී තිබෙනවා. මිනිස්සුන්ගේ බඩගින්න වෙනුවෙන් කරන වැඩක් නිසා අපි මේකෙන් ඉවත් නොවී සේවයේ ඉනන්වා. ඒත් අවශ්යය පහසුකම් ලබා දෙන්නේ නැත්නම් ඉන්දියානු ආධාර බෙදාදීමේ වැඩසටහනින් අපි ඉවත් වෙන බව කනගාටුවෙන් වුවත් කිව යුතුයි.
මෙම අවස්ථාවට ශ්රී ලංකා රාජ්ය නිලධාරීන්ගේ වෘත්තිය සමිති සම්මේලනයේ සභාපති සුමිත් කොඩිකාර,එම සම්මේලනයේ ජාතික සංවිධායක ඒ.බී බස්නායක යන මහත්වරුද සහභාගි වූහ.
