ඒ. ජේ. ඒ. අබේනායක –
රුපියල් ලක්ෂයකට ඉහළ වැටුප් ලබන පිරිස ලබන වැටුප් අනුව බදු අයකර ගැනීමට රජය ගෙන ඇති තීරණය අනුව අධිකරණ විනිසුරුවරුන්ගෙන් එකී බදු අඩුකර ගැනීමක් සිදුනොකර පවත්නා තත්ත්වයෙන්ම තබා ගන්නා ලෙසට තම අධිකරණය විසින් නිකුත් කර තිබූ අතුරු තහනම් නියෝගය පෙත්සම සලකා බැලීම අවසන් වනතුරු දීර්ඝ කිරීමට අභියාචනාධිකරණය ඊයේ (09දා) නියෝග කළේය.
එම පෙත්සම සෝභිත රාජකරුණා හා ධම්මික ගනේපොල යන විනිසුරු මඬුල්ල හමුවේදී ඊයේ (09දා) කැඳවිණි. 2007 අංක 24 දරන දේශීය ආදායම් පනතේ නව සංශෝධන අනුව අත්තිකාරම් පුද්ගල ආදායම් බදු (ඒ.පී.අයි.ටී) අයකිරීම අභියෝගයට ලක්කරමින් අධිකරණ සේවා නිලධාරීන්ගේ සංගමය විසින් ගොනුකර තිබූ රීට් ආඥා පෙත්සමක් සලකා බැලූ අභියාචනාධිකරණය එම නියෝගය කළේය.එම පෙත්සම වැඩිදුර සලකා බැලීම ලබන 21 වැනිදා කල් තැබිණි.
දිවයින –
