-
විගණකාධිපති බලතල පරිපාලන කටයුතු භාර නියෝජ්ය විගණකාධිපතිට…
විගණකාධිපතිවරයෙකු පත්කිරීම ප්රමාද වීම හේතුවෙන් කාර්ය මණ්ඩල වැටුප් පවා ගෙවීමට නොහැකි වීමේ අවදානමක් මතු වූ බැවින්, මුදල් අමාත්යාංශය විසින් ජාතික විගණන කාර්යාලයේ (NAO) මූල්ය කටයුතු පිළිබඳ බලය නියෝජ්ය විගණකාධිපතිවරයෙකු වෙත කඩිනමින් පවරා ඇතැයි සන්ඩේ ටයිම්ස් වාර්තා කරයි.
ජාතික විගණන කාර්යාලයේ ප්රධාන ගිණුම් නිලධාරියා වන්නේ විගණකාධිපතිවරයායි.
ඒ අනුව, විගණකාධිපතිවරයෙකු පත් කරන තෙක් ජාතික විගණන කාර්යාලයේ පරිපාලන කටයුතු භාර නියෝජ්ය විගණකාධිපතිවරයා වෙත මූල්ය බලතල පැවරීමට අමාත්යාංශ ලේකම්වරයා පියවර ගෙන ඇත.
ඒ අනුව මේ සතියේ සිට පරිපාලන කටයුතු භාර නියෝජ්ය විගණකාධිපති ඕෂාන් ප්රනාන්දු වෙත එම බලතල හිමිවනු ඇත.
සාමාන්යයෙන්, පාර්ලිමේන්තුවේ විසර්ජන පනත් කෙටුම්පත (අයවැය) සම්මත වීමෙන් පසුව, මූල්ය බලතල හිමිවන්නේ මුදල් අමාත්යවරයාට වන අතර ඔහු එය මුදල් අමාත්යාංශ ලේකම්වරයාට පවරයි. ඉන් අනතුරුව ලේකම්වරයා එම බලතල අනෙකුත් අමාත්යාංශවල ලේකම්වරුන් වෙත පවරනු ලබයි.
නමුත් ජාතික විගණන කාර්යාලය වැනි ස්වාධීන ආයතන කිසිදු අමාත්යාංශයක් යටතට පත් නොවේ. එබැවින් එම ආයතනවල ප්රධානීන් ප්රධාන ගිණුම්කරණ අධිකාරිය ලෙස සලකනු ලැබේ.
“යම් අයෙකු ප්රධාන ගිණුම් නිලධාරියා ලෙස පත් කළ යුතුයි. බලතල සහිත නිලධාරියෙකු නොමැති නිසා වැටුප් ගෙවීමට පවා නොහැකි බවත්, කිසිදු මූල්ය ගනුදෙනුවක් කළ නොහැකි බවත් ජාතික විගණන කාර්යාලය දැනුම් දී තිබුණා.” බලය ලත් නිලධාරියෙක් උපුටා දක්වමින් සන්ඩේ ටයිම්ස් වාර්තා කර ඇත.
පසුගිය දෙසැම්බර් 6 වැනිදා සිට විගණකාධිපති ධුරය පුරප්පාඩුව පවතී.
“ජනවාරි මාසයේ සිට ජාතික විගණන කාර්යාලයට මුදල් වියදම් කිරීමට නොහැකි වුණා. ඒ අනුව මුදල් අමාත්යාංශය මෙම කරුණ මුදල් අමාත්යවරයා ලෙස කටයුතු කරන ජනාධිපති අනුර කුමාර දිසානායක මහතා වෙත ඉදිරිපත් කළා. එහිදී ජනාධිපතිවරයා උපදෙස් දුන්නේ විගණන කාර්යාලයේ නිලධාරියෙකු වෙත එම බලතල පවරන ලෙසයි.” එම මූලාශ්රය වැඩිදුරටත් සන්ඩේ ටයිම්ස් වෙත ප්රකාශ කර තිබේ.
මේ සතියේ සිට පරිපාලන කටයුතු භාර නියෝජ්ය විගණකාධිපති ඕෂාන් ප්රනාන්දු වෙත විගණකාධිපතිවරයාගේ බලතල හිමිවන්නේ ඒ අනුවය.
