කීර්ති ප්රනාන්දු –
හිස කෙස් සැකසීම සඳහා ආලේපනයක් ගැල්වීමෙන් පසුව කාන්තාවකගේ කෙස්කලඹ ගැලවී යාමේ සිද්ධිය සම්බන්ධයෙන් අධිකරණය මග හරිමින් සිටින මිනුවන්ගොඩ රූපලාවණ්යාගාරයේ හිමිකාරිය සිය නීතිඥයින් මගින් අධිකරණයට ඉදිරිපත් කර තිබූ අපේක්ෂිත ඇප අයදුම්පත ප්රතික්ෂේප කළ මිනුවන්ගොඩ මහේස්ත්රාත් ටී .තේනබදු එම රූපලාවණ්යාගාර හිමිකාරියව අත්අඩංගුවට ගන්නා ලෙස නැවත වරක් නියෝග කරනු ලැබීය .
මෙම අපේක්ෂිත ඇප ඇදුම් පත විභාගයට ගත් අවස්ථාවේදී මිනුවන්ගොඩ පොලිසියේ ස්ථානාධිපති ප්රධාන පොලිස් පරීක්ෂක එන් .පී.එස්. ජයලත් සහ ළමා හා කාන්තා කාර්යාංශයේ ස්ථානාධිපතිනි උප පොලිස් පරීක්ෂිකා වජිරා චාමලී අධිකරණයට කරුණු දක්වමින් රූපලාවණ්යාගාරයේ හිමිකාරියට ඇප ලබාදීමට විරුද්ධ වන බවත් ඇය පොලිසිය විසින් අධිකරණයට ඉදිරිපත් කර ඇති බී වාර්තාව මගින් ප්රධාන සැකකාරිය ලෙස නම්කර සිටින බවද පැවසීය.
එසේම මෙම සැකකාරිය අදාළ සිදුවීම වූ ඉකුත් 30 වෙනදා සිට අධිකරණ නියෝග නොසලකා හරිමින් පොලිසිය හා අධිකරණය මගහරිමින් සිටින තැනැත්තියක් බවද පොලිසියේ අධිකරණයට කරුණු දැක්වීය .
මෙහිදී අගතියට පත් පැමිණිලිකාර කාන්තාව වෙනුවෙන් පෙනී සිටි. නීතිඥ සරල කරුණාරත්න සහ සරණ කරුණාරත්න අධිකරණයට කරුණු දක්වමින් අපේක්ෂිත ඇප ඉල්ලා සිටින මෙම රූපලාවණ්යාගාරයේ හිමිකාර තැනැත්තිය සිද්ධියට අදාළව පොලිසිය මගින් අධිකරණයට ඉදිරිපත් කර ඇති බී වාර්තාවේ ප්රධාන සැකකාරිය වී සිටින අයෙකු බවත් ඇයට ඇප ලබා දුනහොත් සිද්ධිය පිළිබඳව දැනට ක්රියාත්මක වන විමර්ශන වලට බාධාවක් වන බවත් පැවසීය.
මෙය මේවන විට ක්රියාත්මක විමර්ශනවලින් සහ අත්අඩංගුවට ගැනීමෙන් ගැලවීම මූලික කරගෙන ඉදිරිපත් කර ඇති අපේක්ෂිත ඇප අයදුම් පතක් වන බැවින් මෙම ඇප අයදුම්පත ප්රතික්ෂේප කරන ලෙසත් අගතියට පත් පැමිණිලිකාර කාන්තාව හට සාධාරණයක් සිදු විය යුතු බවත් එම නිසා මෙම සැකකාරියව අත්අඩංගුවට ගැනීමට නියෝගයක් ලබා දෙන ලෙස ඉල්ලා සිටියේය .
මෙම අවස්ථාවේදී ප්රධාන සැකකාරිය වන රූපලාවණ්යාගාරයේ හිමිකාරිය වෙනුවෙන් පෙනී සිටි ජනාධිපති නීතිඥ නලින් දිසානායක සහ සංජීව හෙට්ටිආරච්චි අධිකරණයට කරුණු දක්වමින් බී වාර්තාවක් ඉදිරිපත් කර තිබෙන අවස්ථාවක ඇප අයදුම් පතක් ඉදිරිපත් කිරීමට නොහැකි බවට ඇප පනතේ සඳහනක් නොමැති බවත් ඕනෑම කොන්දේසියක් මත ඇප ලබා දෙන ලෙස ඉල්ලීමක් කළේය .
මෙහිදී දෙපාර්ශවයේම කරුණු සැලකිල්ලට ගත් මිණුවන්ගොඩ මහේස්ත්රාත් ටී .තේනබදු මෙම අපේක්ෂිත ඇප අයදුම්පත ප්රතික්ෂේප කර එම සැකකාරියව අත්අඩංගුවට ගෙන අධිකරණයට ඉදිරිපත් කරන ලෙස නැවත වරක් පොලිසියට නියෝග කරනු ලැබුවාය. .
