මනම්පිටිය නිමල් ජයරත්න –
වස්ගමුව ජාතික වනෝද්යානයේ අඹන් ගඟට ආසන්නව ගලමුල්ල මාලිගාව ප්රදේශයේ කඳවුරුගතව නීති විරෝධී කැණීම් කරමින් සිටි පුරාවස්තු සංහාරකයින් පිරිසක් අද ( 16) කළ වැටලීමක දී කැණීම් කිරීමට උපයෝගී කරගන්නා වටිනා භාණ්ඩ හා ඔවුන්ගේ පාරිභෝජනයට ගෙන්වාගත් ආහාර තොගයක් ද එම ස්ථානයේ දමා පලාගොස් ඇති බව වනජීවී දෙපාර්තමේන්තුවේ පොලොන්නරුව වැටලීම් ඒකකය පවසයි.
එම ආහාර තොගය සමග යුද හමුදාව විසින් ආහාරයට ගන්නා කල්තබා ගත හැකි ආහාර පැකට් තොගයක්ද, හමුදාව විසින්ම භාවිතා කරන බවට සාක්ෂි ඇති තවත් විශේෂිත ද්රව්ය තොගයක් ද සොයාගත් බව එම වැටලීම් ඒකකය වැඩිදුරටත් සඳහන් කරයි.
කැණීම් කරන ලද ස්ථානයේ ජාවාරම්කරුවන්ට අයත් අයත් බවට සැකකරන ගල් විදින කුරු, කලු ගල් පුපුරන වෙඩි බෙහෙත්, වයර්, ජෙලට් නයිට් කූරු, ඩීසල් ලීටර් 10 ක් ,පූජා භාණ්ඩ, සහල් කිලෝ තිහක් ,වලං, මුට්ටි, පිඟන්, මඤ්ඤොක්කා අල තොගයක්, මෙන්ම වියළි ආහාර සහ ආහාර පිසීමට යොදා ගන්නා තවත් ද්රව්ය රැසක් යුද හමුදාව විසින් ආහාරයට ගන්නා කල්තබා ගත හැකි ආහාර පැකට් තොගයක් , හමුදාව භාවිතා කරන බවට සාක්ෂි ඇති තවත් ද්රව්ය තොගයක් සොයාගත් බව වනජීවී දෙපාර්තමේන්තුවේ පොලොන්නරුව වැටලීම් අංශයේ අඩවි ආරක්ෂක ඩබ්ලිව්.එම්. කුමාරසිරි විජේකෝන් අප කළ විමසීමකදී සඳහන් කළේය.
වනජීවී දෙපාර්තමේන්තුවේ පොලොන්නරුව වනජීවී සහකාර අධ්යක්ෂ කීර්ති චන්ද්රරත්නගේ උපදෙස් අනුව පොලොන්නරුව කලාප කාර්යාලයේ වනජීවී නිලධාරීන්ගේ මෙහෙයවීමෙන් කිරිඔය, බක්මූණ, දියබෙදුම, යන වන අඩවි කාර්යාලවල වනජීවි නිලධාරින් විසින් මෙම වැටලීම් සිදුකර ඇත.
මෙම වැටලීම සිදු කරන ස්ථානයට ගමන් කිරීම සඳහා තමන්ට අඹන්ගඟ හරහා පිහිනා යෑමට ද සිදු වූ බව වනජීවී නිලධාරීහු සඳහන් කළහ.
වස්ගමුව ජාතික වනෝද්යානයේ ගලමුල්ල මාලිගය ප්රදේශයේ දින ගණනාවක් නවාතැන් ගනිමින්, මෙම පුරාවස්තු කැණීම සිදුකර ඇති බවට මූලික විමර්ශන වලදී අනාවරණය වී ඇති බවත්, සොයාගත් භාණ්ඩ හා උපකරණ ඇතුළු තවත් සාක්ෂි උපයෝගී කරගනිමින් මේ පිළිබඳ ඉදිරි විමර්ශන කටයුතු සිදු කරන බවත් පොලොන්නරුව වනජීවී සහකාර අධ්යක්ෂ කීර්ති චන්ද්රරත්න අප කළ විමසීමකදී සඳහන් කළේය.
