මානව හිමිකම් කඩකිරීමේ චෝදනා සම්බන්ධයෙන් මෙරට ආරක්ෂක අංශ සමාජිකයින් දෙදෙනෙකුට අමෙරිකා එක්සත් ජනපදය සංචාරක තහනම් පැනෙව්වේය.
එලෙස අමෙරිකා විසින් සංචාරක තහනම් පනවා ඇත්තේ නාවික හමුදා බුද්ධි අංශ නිලධාරියෙකු වු චන්දන හෙට්ටිආරච්චිට සහ යුද හමුදා සැරයන්වරයෙකු වූ සුනිල් රත්නායකටයි.
2008 – 2009 කාල සීමාවේදී ත්රිකුණාමලය ප්රදේශයේදී තරුණයින් 11 දෙනෙකු ඝාතනය කිරීමේ සිදු වීමට අදාලව චෝදනා කරමින් නාවික හමුදා නිලධාරී චන්දන හෙට්ටිආරච්චිට එම තහනම පනවා තිබේ. සැරයන් සුනිල් රත්නායකට එල්ල වී ඇති චෝදනාව වන්නේ 2000 වසරේ දෙසැම්බර් මාසයේදී සිවිල් වැසියන් 08 දෙනෙකු ඝාතනය කිරීමය.
නේවි සම්පත්
මෙතැන් සිටි අප කතා කරන්නේ චන්දන හෙට්ටිආරච්චි ගැනය. මේ චන්දන හෙට්ටිආරච්චි පොලිසිය විසින් හඳුන්වා දෙන්නේ නේවි සම්පත් නමිනි. මේ රටේ සිදුවූ අශිෂ්ටම මිනීමරුමක්වන මේ සිවිල් පුද්ගලයින් 11 දෙනා ඝාතනය කළ නේවි සම්පත් ගැන යළිත් අපට මතක් කර දෙන්නේ ඇමරිකාවය.
මේ නේවි සම්පත්ගේ කතාව තවමත් මේ රටට උභතෝකෝටියකි. මේ සටහන තබන්නේම ඒ නිසාය.
නේවි සම්පත් නැමැත්තෙක් පොලිස් අත්තඅඩංගුව ගන්නේ වර්ෂ 2018 අගොස්තු 13 වනදා කොළඹ ලෝටස් පාරේදීය. ඔහුව රැඳවුම් නියෝග මත රඳවා ගනිමින් ප්රශ්න කිරිමෙන් අනතුරුව එවකට සමූහ මංකොල්ල විමර්ශන අංශයේ ස්ථානාධිපති නිශාන්ත සිල්වා විසින් 2018 අගෝස්තු 15 ඔහුව අධිකරණයට ඉදිරිපත් කරනු ලබන්නේ ය.
පොලිසිය විසින් පසුගිය 13 දා අත්අඩංගුවට ගත්තේ හෙට්ටිආරච්චි මුදියන්සේලාගේ චන්දන ප්රසාද් හෙට්ටිආරච්චිය. අපරාධ පරීක්ෂණ දෙපාර්තමේන්තුව ඔහුව නේවි සම්පත් ලෙස හඳුනාගන්නේ 2018 අවුරුද්ද මුල් භාගයේය. පොලිස් මූලස්ථානය වර්ෂ 2018 ජනවාරි මස මාධ්යවලට නිවේදනයක් නිකුත් කරමින් චන්දන ප්රසාද් හෙට්ටිආරච්චි නොහොත් නේවි සම්පත් නැමැත්තා පුද්ගලයන් 11 දෙනෙක් පැහැරගෙන ගොස් අතුරුදන් කිරීමේ අපරාධයට සම්බන්ධ ප්රධාන සැකකරුවෙක් බවත්, දැනට අධිකරණය මඟහැර සිටින ඔහුව අත්අඩංගුවට ගැනීමට මහජන සහයෝගය අවශ්ය බවත් කියා සිටියේය.
2018ට කලින් සිටි නේවි සම්පත්
2018 අවුරුද්දේ ජනවාරියට කලින් නේවි සම්පත් නැමැත්තෙක් සම්බන්ධව පොලිස් පොත් වල ලියැවුණේය. විමර්ශන සිද්ධ වුණේය. අත්අඩංගුවට පත් වුණේය. ඒ නේවි සම්පත්, මුණසිංහ ආරච්චිගේ දොන් නිලන්ත සම්පත් නැමැති නාවික හමුදාවේ හිටපු ලුතිනන් කමාන්ඩර් වරයාය. හිටපු නාවික හමුදාපති වසන්ත කරන්නාගොඩ ගේ පුද්ගලික ආරක්ෂක නිලධාරියා ය.
නේවි සම්පත් නැමැත්තෙක් සම්බන්ධව මුලින් ම ඇසෙන්නේ යුද්ධය පවතින කාලයේදීය. ඒ එවකට ගුවන් හමුදාපතිවරයාව සිටියේ රොෂාන් ගුණතිලකගේ පුද්ගලික ආරක්ෂක නිලධාරියා වන බලගන නායක නිශාන්ත ගජනායකත් ජනාධිපති ආරක්ෂක අංශයේ පොලිස් නිලධාරියෙක් වූ ප්රීතිවිරාජ් මනම්පේරි නැමැත්තාත් පිටකොටුවේ ද්රවිඩ ජාතික ව්යාපාරිකයෙක් පැහැර ගෙන කප්පම් ඉල්ලීමේ සිද්ධියක් සම්බන්ධව අත්අඩංගුවට පත්වීමෙන් පසුය.
මේ අවධිය වනවිට එල්.ටී.ටී.ඊ ක්රියාකාරකම් මැඩ පැවැත්වීමට කොළඹ ක්රියාත්මක වුන බුද්ධි ජාලයේ ගාමක බලය සහිතව සිටි කරුණා පාර්ශවයේ කාඩරයන් එල්.ටී.ටී.ඊ ට කප්පම් ගෙවන වග හොඳින්ම දැනගෙන හිටි ව්යාපාරිකයන් ඉලක්ක කරගෙන සිය කප්පම් ව්යාපාරය දියත් කර තිබුණහ. ඒ සමඟම විවිධ කප්පම් කල්ලි කොළඹ හැසිරුණේය. මේ කප්පම් කල්ලි ගැන විමර්ශනය කරගෙන යන පොලිසිය හිටපු ගුවන් හමුදාපති රොෂාන් ගුණතිලකගේ පුද්ගලික ආරක්ෂක නිලධාරී බලගණ නායක නිශාන්ත ගජනායකත් ජනාධිපති ආරක්ෂක අංශයේ පොලිස් නිලධාරියෙක්වන ප්රීති විරාජ් මනම්පේරි නැමැත්තාත් අත්අඩංගුට ගත්තේය. ඒ වර්ෂ 2007 ජුනි මස 21 දාය. නේවි සම්පත් නැමැත්තෙකුගේ කල්ලියක් කප්පම් ගන්නා බව මුලින්ම රහස් පොලිසියේදී හෙළි වන්නේ අත්අඩංගුවට ගත් ප්රීති විරාජ් මනම්පේරිගේ ප්රශ්න කිරීමේදී ඔහු කළ ප්රකාශයකට අනුවය.
හිටපු ගුවන් හමුදාපති රොෂාන් ගුණතිලකගේ පුද්ගලික ආරක්ෂක නිලධාරියාට සමගාමීව තවත් කප්පම් කල්ලියක් මෙහෙයවන නේවි සම්පත් නැමැත්තා කවරෙක්දැයි සොයන රහස් පොලිසිය එදා හඳුනාගන්නා පුද්ගලයා මුණසිංහ ආරච්චිගේ දොන් නිලන්ත සම්පත් නැමැත්තෙකි. ඔහු ඒ වකවානුවේ හිටපු නාවික හමුදාපති වසන්ත කරන්නාගොඩගේ පුද්ගලික ආරක්ෂක නිලධාරියා ලෙස කටයුතු කළේය. මේ තොරතුරු මත නේවි සම්පත් නැමැත්තා අත්අඩංගුවට ගැනීමට අදාළ මූලික ප්රශ්න කිරීම් සඳහා අවශ්ය කතිකාව කරගැනීමට එවකට නියෝජ්ය පොලිස්පතිවරයෙක් වූ ජී.ඩබ්ලියු. ප්රතාපසිංහ හිටපු නාවික හමුදාපති වසන්ත කරන්නාගොඩව මුණ ගැසෙන්නේය. පොලිසියට අවශ්ය සහය ඒ මොහොතේ ලැබෙන්නේ නැත. නාවික හමුදාපති කරන්නාගොඩ තමන්ගේ පුද්ගලික ආරක්ෂක නිලධාරියා වූ මුණසිංහ ආරච්චිගේ දොන් නිලන්ත සම්පත්ට එරෙහිව නැගෙන “නේවි සම්පත්” චෝදනාව පිළිගන්නේ නැත. සිද්ධිය එතැනින් යට යන්නේය.
නේවි සම්පත්ගේ තුච්ඡ ඝාතන –
නැවත වරක් නේවි සම්පත් නැමැත්තෙක් ගැන කතා කරන්නේ පුද්ගලයන් 11 දෙනෙක් පැහැරගෙන ගොස් ඝාතනය කිරීම සම්බන්ධව ලෝකය කම්පා කළ අවනඩුවේදීය. වර්ෂ 2008 සැප්තැම්බර් 17 දින දෙහිවලදී මෙම පුද්ගලයන් පැහැර ගන්නේ නේවි සම්පත් නැමැත්තෙකුගේ මූලිකත්වයෙන් බව කියැවුණේය. නැවතත් නේවි සම්පත් ලෙස හඳුනා ගන්නේ මුණසිංහ ආරච්චිගේ දොන් නිලන්ත සම්පත් ය.
අනතුරුව වර්ෂ 2009 මැයි මාසයේදී එවකට නාවික හමුදාපති වසන්ත කරන්නාගොඩ විසින් තම පුද්ගලික ආරක්ෂක නිලධාරියාගේ අපරාධකාරී හැසිරීම සම්බන්ධව පොලිසියට පැමිණිල්ලක් කරන්නේය. පැමිණිල්ල කරනු ලබන්නේ මේ පුද්ගලයා සම්බන්ධව නාවික හමුදාව පාර්ශ්වයෙන් පරීක්ෂණයක් පවත්වා ඔහුගේ පුද්ගලික කුටිය මුද්රා තැබීමෙන් අනතුරුවය. නාවික හමුදාපතිවරයාගේ පැමිණිල්ලේ කියැවෙන්නේ තම පුද්ගලික ආරක්ෂක නිලධාරියා මිනිසුන්ගෙන් කප්පම් ගැනීම සඳහා ඔවුන් පැහැරගෙන ගොස් මරා දමා ඇති බවය.
මේ වනවිට තවත් සිදුවීමක් වාර්තා විය. තරුණයන් පැහැරගැනීම සිදුවන 2008 සැප්තැම්බර් 6 දා වනතෙක් මුණසිංහ ආරච්චිගේ දොන් නිලන්ත සම්පත් නමින් සිටි ලුතිනන් කමාන්ඩර් වරයා 2008. 11. 21 සුබසෙත පුවත්පතේ දැන්වීමක් දමා සිය නම මුණසිංහ ආරච්චිගේ දොන් නිලන්ත සම්පත් මුණසිංහ ලෙස වෙනස් කරගෙන තිබුණේය.
පැහැර ගැනීම
නේවි සම්පත් නැමැත්තකුගේ මූලිකත්වයෙන් 2008 සැප්තැම්බර් 6 දා දෙහිවලදී පැහැරගත් පුද්ගලයන් පස් දෙනෙක් ඇතුළු 11 දෙනෙක් සම්බන්ධව රහස් පොලිස් පරීක්ෂණ ආරම්භ වන්නේ එවකට නාවික හමුදාපති වසන්ත කරන්නාගොඩ ගේ පැමිණිලි ප්රකාරවය.
නාවික හමුදාපති තම පුද්ගලික ආරක්ෂක නිලධාරියාට එරෙහිව අපරාධ පරීක්ෂණ දෙපාර්තමේන්තුවට පැමිණිලි කරන තැනකට යන්නේ ඔහු කප්පම් ලබාගැනීම සඳහා මිනිසුන් පැහැර ගන්නා කල්ලියකට නායකත්වය දෙන බව කරුණු සහිතව දැනගන්නට ලැබීම නිසා බව කියැවිණි. ඔහුගේ එම පැමිණිල්ල සමඟ ලුතිනන් කමාන්ඩර් මුණසිංහ නාවික හමුදාවෙන් පළා යන අතර ඒ සමඟ අපරාධ පරීක්ෂණ දෙපාර්තමේන්තුව ඔහුගේ නිල කාමරය සීල් තබන්නේය. 2009 ජූනි 20 වැනි දින එම නිලධාරියා අපරාධ පරීක්ෂණ දෙපාර්තමේන්තුව විසින් අත්අඩංගුවට ගන්නේය. ඔහු ඉදිරියේ සීල් තබන ලද නිල කාමරය විවෘත කොට එය පරීක්ෂාවට ලක් කරන්නේය. එහිදී පැහැර ගන්නා ලද තරුණයන් පස්දෙනාගේ ගමන් බලපත්ර හා ජාතික හැඳුනුම්පත් 5 සොයා ගන්නේය.
එදා ලුතිනන් කමාන්ඩර් සම්පත් මුණසිංහව රහස් පොලිසිය හඳුනා ගත්තේ නේවි සම්පත් නමින් ය. ඔහු අත්අඩංගුවට පත්වූ විට මාධ්යය කීවේ නේවි සම්පත් අත්අඩංගුවට පත්වූ බව ය. නේවි සම්පත් යනු මුණසිංහ ආරච්චිගේ දොන් නිලන්ත සම්පත් හෙවත් මුණසිංහ ආරච්චිගේ දොන් නිලන්ත සම්පත් මුණසිංහ බව මාධ්යයට තහවුරු කළේ රහස් පොලිසිය ය.
නේවි සම්පත් මාරු වීම
නේවි සම්පත් මාරු වන්නේ පාර්ලිමේන්තු මන්ත්රී නඩරාජා රවිරාජ් ඝාතන සිද්ධියේ සැකකරුවන් අත්අඩංගුවට පත්වීමත් සමඟ ය. රවිරාජ් ඝාතන සිද්ධියේ රජයේ සාක්ෂිකරු ලෙස පෙනී සිටින්නේ එම ඝාතන සිද්ධිය සම්බන්ධයෙන් අත්අඩංගුවට පත් වූ ප්රීති විරාජ් මනම්පේරි ය. ඔහුගේ සාක්ෂියේ කියැවුණේ නේවි සම්පත් විසින් රවිරාජ් ඝාතනය කළ චන්දන ප්රසාද් හෙට්ටිආරච්චි වෙත ත්රී රෝද රථයකින් පැමිණ ඝාතන අවිය ගෙනැවිත් දුන් බවය. ඒ සාක්ෂිය මත ලුතිනන් කමාන්ඩර් චන්දන ප්රසාද් හෙට්ටිආරච්චි අත්අඩංගුවට පත්වන්නේය. ඔහුට ගිනි අවිය ගෙනත් දුන් නේවි සම්පත් ලෙස අත්අඩංගුවට පත්වන්නේ මුණසිංහ ආරච්චිගේ දොන් නිලන්ත සම්පත් මුණසිංහ ය. ඔහුව 2015 මාර්තු මස 13 දා අත්අඩංගුවට ගන්නේය. මාස තුනක් අත්අඩංගුවේ පසුවන්නේය. ඒ නේවි සම්පත් ලෙසය.
මේ අතර නිලන්ත සම්පත් මුණසිංහ සිය නීතිඥයන් මඟිින් පෙන්වා දෙන්නේ නඩරාජා රවිරාජ් ඝාතන සිද්ධිය දින ඔහු කොළඹ නොසිටි බවය. විශේෂ රාජකාරියක් සඳහා කන්කසන්තුරය ප්රදේශයට වාර්තා කර තිබුණු බවය. ඒ අනුව මුණසිංහ ආරච්චිගේ දොන් නිලන්ත සම්පත් මුණසිංහ චෝදනාවෙන් නිදහස් වන්නේය. නිදහස්ව එන ඔහු රහස් පොලිසියට එරෙහිව මානව හිමිකම් කඩවීම සම්බන්ධව පැමිණිල්ලක් ගොණු කිරීමට සූදානම් වන විට ප්රකාශයක් කරන ප්රීති විරාජ් මනම්පේරි තමන් නේවි සම්පත් ලෙස හඳුනා ගත්තේ සම්පත් මුණසිංහ නොව චන්දන ප්රසාද් හෙට්ටිආරච්චි බව කියන්නේ ය. චන්දන ප්රසාද් හෙට්ටිආරච්චි නේවි සම්පත් ලෙස මුලින් ම ප්රකාශ වන්නේ ඒ ආකාරයට ය.
නේවි සම්පත්ගේ කතාව විකාරයක් වූ අයුරු
එහෙත් මේ සාක්ෂිය සමස්තය අතාර්කික කළේය. ප්රීති විරාජ් මනම්පේරිගේ මුල් සාක්ෂිය ප්රකාරව රවිරාජ් ඝාතනයට ගිනි අවිය ගෙනත් දී ඇත්තේ නේවි සම්පත් ය. නේවි සම්පත් අවිය ගෙනත් දී තිබුණේ චන්දන ප්රසාද් හෙට්ටිආරච්චිට ය. ඔහුගේ දෙවන සාක්ෂිය අනුව නේවි සම්පත් යනු චන්දන ප්රසාද් හෙට්ටිආරච්චි ය. ඒ අනුව හෙට්ටිආරච්චි විසින් හෙට්ටිආරච්චිට ම ගිනි අවිය ගෙනත් දී තිබිණි. මේ පරස්පරය උසාවියේදී තහවුරු වීමත් සමඟ චූදිතයෝ ඝාතන චෝදනාවෙන් නිදහස් වූහ. හෙට්ටිආරච්චි මුල්වරට නේවි සම්පත් ව වන්නේ එසේ ය.
දෙවන අවස්ථාවේදී ඔහු නේවි සම්පත් වන්නේ අපරාධ පරීක්ෂණ දෙපාර්තමේන්තුව විසින් හෙට්ටිආරච්චි මුදියන්සේලාගේ චන්දන ප්රසාද් හෙට්ටිආරච්චි නොහොත් නේවි සම්පත් අවශ්ය බව කියා පළ කළ ප්රසිද්ධ මාධ්ය දැන්වීම නිසාය.
“නේවි සම්පත්” සංකේතයම රටට ගැටලුවක් වූූයේ ඒ ආකාරයටය. එක් නේවි සම්පත් කෙනෙක් ඇතුළේය. අනෙක් නේවි සම්පත් රට පටලවමින් එළියේ ය. තවමත් කට්ටිය වටේ යමිනි. මරා දැමූ සිවිල් වැසියන් 11 දෙනාට තවමත් නිශ්චිත සාධාරණයක් ඉටු වී නැත. එහෙත් ලෝකය මේ තුච්ඡ අපරාධය ලෝකය විසින් නිර්දය ලෙස පිළිකුල් කර ඇත.
ඒ “නේවි සම්පත්“ සංකේතය ස්වකීය රටවල්වල හතර මායිමට වැද්ද ගැනීම තහනම් කිරීමෙනි.
