හිටපු බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්ය අමාත්යා ලොහාන් රත්වත්තේ අනුරාධපුර බන්ධනාගාරය තුළට ඇතුළු වී පිස්තෝලයක් හිසට තබා තර්ජනය කිරීම නිසා සිය මූලික අයිතිවාසිකම් උල්ලංඝනය වූ බවට චෝදනාකරමින් එම බන්ධනාගාරයේ රඳවා සිටින රැඳවියන් 08 දෙනෙක් ශ්රේෂ්ඨාධිකරණයට මූලික අයිතිවාසිකම් පෙත්සමක් ඉදිරිපත් කර තිබේ.
මෙම පෙත්සමේ වගඋත්තරකරුවන් ලෙස හිටපු රාජ්ය අමාත්ය ලොහාන් රත්වත්තේ, අනුරාධපුර බන්ධනාගාරයේ අධිකාරීවරයා, බන්ධනාගාර කොමසාරිස් ජනරාල්වරයා, අධිකරණ අමාත්ය අලි සබ්රි සහ නීතිපතිවරයා ව නම්කර තිබේ.
පෙත්සම්කරුවන් කියා සිටින්නේ තමන් ත්රස්තවාදය වැළැක්වීමේ පනත යටතේ අනුරාධපුර බන්ධනාගාරයේ රඳවා සිටින බවය.
ඉකුත් 12 වන දා සවස 6.05 ට පමණ සිය ආරක්ෂකයින් සමඟම බන්ධනාගාරයට පැමිණි වගඋත්තරකාර ලොහාන් රත්වත්තේ රාජ්ය අමාත්යවරයා තමන්ව දණ ගස්වා අමානුෂික ලෙස බැණ වැදුණු බව පෙත්සම්කරුවෝ පවසයි.
ත්රස්තවාදය වැළැක්වීමේ පනත යටතේ රඳවා සිටින සැකකරුවන් සම්බන්ධයෙන් කටයුතු කිරීමේ පූර්ණ බලය ජනාධිපතිවරයා විසින් තමාට ලබාදී ඇති බව රාජ්ය අමාත්ය රත්වත්තේ විසින් මෙහිදී ප්රකාශ කළේ යැයි පෙත්සම් කරුවෝ කියති.
අනතුරුව පිස්තෝලය ගෙන පූපාලසිංහම් සූරියපාලන් නමැති පෙත්සම්කරුගේ හිසට එය තබා තර්ජනය කළ බව ඔවුහු කියති.
මෙහි ප්රතිඵලයක් ලෙස තමන් දැඩි ලෙස භීතියට පත්වූ බව ඔවුහු කියති.
ඉන් සිය මූලික අයිතීන් උල්ලංඝනය වී ඇති බවට තීන්දුවක් ලබාදෙන ලෙසත් තමන්ව යාපනය බන්ධනාගාරයට මාරුකරන ලෙස අතුරු නියෝගයක් නිකුත්කරන ලෙසත් ඔවුන් අධිකරණයෙන් අයැද සිටිති.
එමෙන්ම තමන්ව ඇප මත මුදාහැර අවසන් වශයෙන් සියලු චෝදනාවලින් නිදහස් කිරීමේ නියෝගයක් නිකුත්කරන ලෙසත් පෙත්සම් කරුවෝ වැඩිදුරටත් ඉල්ලා සිටිති.
