නුවන් ජයසේකර –
බෙලිඅත්තේ වෙඩි තැබීමකින් මියගිය අපේ ජනබල පක්ෂයේ නායක සමන් පෙරේරා ඇතුළු පස් දෙනකු ඝාතනය කිරීම කොස්ගොඩ සුජීගේ පාතාල කල්ලිය විසින් සිදුකරනු ලැබ ඇති බවට ඒ සම්බන්ධව කළ මූලික විමර්ශනවලදී අනාවරණය වී ඇති බව විමර්ශන අංශ කියයි.
තංගල්ල කුඩාවැල්ලේ සිදුවූ ත්රිත්ව ඝාතනයක පළිගැනීමක් ලෙස කොස්ගොඩ සුජීගේ නායකත්වයෙන් යුත් පාතාල කල්ලිය මෙම වෙඩි තැබීම සැලසුම් කරන්නට ඇති බව බවට විමර්ශන අංශ සැක පහළ කරයි.
රෝයල් බීච් සමන් දැනට විදේශගතව සිටින කොස්ගොඩ සුජී ගේ ප්රධාන ප්රතිවාදියෙක් බව ද පොලිසිය පවසයි.
මෙම වෙඩි තැබීම සම්බන්ධයෙන් දකුණු පළාත් විශේෂ අපරාධ විමර්ශන ඒකකය මගින් පරීක්ෂණ පවත්වන බව වැඩබලන පොලිස්පති දේශබන්දු තෙන්නකෝන් පවසා ඇත.
ඊයේ පෙරවරු 8.00 ට පමණ දක්ෂිණ අධිවේගී මාර්ගයේ බෙලිඅත්ත – කහවත්ත පිවිසුම අසලදී මෙම සිද්ධිය සිදුව ඇති අතර, ‘රෝයල් බීච් සමන්’ නමින් හඳුන්වන සමන් පෙරේරා ඇතුළු පිරිසක් තංගල්ල අධිකරණයට ඉදිරිපත් වීමට පැමිණෙමින් සිටියදී මෙම ඝාතනය සිදුවී තිබිණි.
ප්රාඩෝ වර්ගයේ වාහනයකින් පැමිණි පිරිසක් ඩිෆෙන්ඩර් ජීප් රථයකින් ගමන් කරමින් සිටි සමන් පෙරේරා ඇතුළු පිරිසට වෙඩි තබා ඇති බවට තොරතුරු අනාවරණය වී ඇත. වෙඩි තැබීමට සම්බන්ධ වාහනය ඉමදූව ප්රවේශයෙන් අධිවේගී මාර්ගයට ඇතුලු වී ඇත.
සමන් පෙරේරා ඇතුළු 4 දෙනෙකු එම ස්ථානයේදීම ජීවිතක්ෂයට පත්ව ඇති අතර තුවාල ලැබූ තවත් අයෙකු රෝහලට ඇතුළත් කිරීමේදී ජීවිතක්ෂයට පත්වූයේය.
වෙඩි තැබීමෙන් මියගිය සෙසු පිරිස ලෙස හසිත රණසිංහ, සමීර මධුශංක, බුද්ධික රාජපක්ෂ සහ දෙමටගොඩ චම්ප්රිය ජයතිලක බව හඳුනාගෙන ඇත.
දකුණේ පාතාලයට සම්බන්ධ මරණ රැසකට චෝදනා ලැබ සිටින සමන් පෙරේරා ප්රදේශයේ පාතාල කල්ලියක ආන්දෝලනාත්මක චරිතයකි. එමෙන්ම ඉඳුරුව රෝයල් බීච් හෝටලයේ හිමිකරුවෙකි. මොහු මීට පෙර 2022 වසරේ කුඩාවැල්ල ප්රදේශයේ මනුෂ්ය ඝාතනයකට සම්බන්ධ සැකකරුවෙකුට සහය දීම සම්බන්ධයෙන් පොලිස් අත්අඩංගුවට ගෙන නිදහස් කර ඇත.
බලපිටිය ප්රාදේශීය සභාවේ හිටපු සභාපති ස්ටැන්ලි තාබෲ සහ ඔහුගේ පුත් ටෙරී තාබෲ වෙඩි තබා ඝාතනය කිරීම මෙන්ම ඉඳුරුවේ සමන් ඝාතනයද ඔහුට එල්ල වී ඇති චෝදනා අතර වේ.
විශේෂ විමර්ශන කණ්ඩායම් 06ක් මගින් පරීක්ෂණ පැවැත්වේ.
