ශ්රියානි විජේසිංහ –
වායු දූෂණය පාදක කරගෙන ඇතිවන හෘදයාබාධ, ආඝාතය , පිළිකා සහ නිදන්ගත ශ්වන රෝග හේතුවෙන් ශ්රී ලංකාවේ ජනගහණයෙන් පුද්ගලයින් 14300ක් දෙනා වාර්ෂිකව මිය යන බව සෞඛ්ය ප්රවර්ධන කාර්යාංශය සදහන් කරයි.
මේ අනුව වායු දූෂණය පාදක කරගෙන දෛනිකව මරණ 42ක් සිදුවන බව සංඛ්යාලේඛන දත්ත පෙන්වා දෙයි. 
වසරකට පුද්ගල මරණ 125000ක් සිදුවන අතර ඉන් සියයට 90ක් බෝනොවන රෝග හේතුවෙන් සිදුවන අතර සියයට 10ක් හදිසි අනතුරු හේතුවෙන් මිය යන බවද සංඛ්යා ලේඛණ පෙන්වා දෙයි. මේ වාර්ෂික මරණවලින් සියයට 11.4ක් සඳහා පාදක වන්නේ වායු දූෂණය නිසා ඇතිවන රෝගාබාධ බව පෙනී ගොස් ඇත.
බාහිර පරිසරයේ පවතින දූවිල් අංශු පෙනහලු කරා ගමන් කිරිමෙන් ස්වසන රෝග , හෘදයාබාධ , ආඝාතය වැනි රෝග තත්ත්වයන් පමණක් නොව සමේ අසාත්මිකතාවන් හා ඇස්වල පෙනීමේ දුර්වලතාවන් ඇතිවිය හැකි බව කාර්යාංශය නිවේදනය කර සිටියි.
වාහනවලින් නිකුත්වන දුම් , කර්මාන්ත ශාලාවන්ගෙන් නිකුත්වන විස රසායනිකයන් සහ බලාගාරයන් මගින් නිකුත්වන දුම් හා විවිධ රසායනිකයන් හේතුවෙන් බාහිර පරිසරයේ අංශුමය දූෂක ද්රව්ය වැඩිවීමට මෙය හේතුවක් වෙන බවද සඳහන්වේ. .
කෙසේ නමුත් මේ වන විට ඇතිව තිබෙන වායු දුෂණය වර්ධනය වන ක්රියාකාරකම්වලින් හැකි පමණ ඈත් වීමටත් වායු දූෂණයෙන් සෞඛ්යයට සිදුවිය හැකි හානිය අවම කර ගැනීමට හැකි පමණ සෞඛ්ය ආරක්ෂිත ක්රමවේදයන් අනුගමනයක කරන්නැයිද ජනතාවගෙන් ඉල්ලා සිටී.
