දිනසේන රතුගමගේ –
සම්ප්රදායික ධීවර කර්මාන්තය මතු නොව, සමස්ථ සාගර පද්ධතියම බරපතල ව්යසනයකට ලක් කරන සමුද්ර ගොවිපල නැමැති ව්යසනකාරී ජාවාරමෙන් උතුරේ ධීවරයින් බේරාගන්නාට මැදිහත් වන ලෙස ඉල්ලමින් උතුරේ ධීවර සංගම් නියෝජිත පිරිසක් ඊයේ යාපනයේ නාග විහාරාධිප තිමිගහජදුරේ විමලකිත්ති නායක හිමියන් හමුවී ඉල්ලා සිටියහ.
ලෝකයේ සෑම සංවර්ධිත රටක්ම ප්රතික්ෂේප කර ඇති මේ ව්යසනකාරී මුහුදු ගොවිපල යාපනයේ පවුල් ලක්ෂ දෙකකට පමණ අන්ත දුගී ධීවර ජීවිත පමණක් නොව, ඔවුන්ගේ සමාජ සංස්කෘතික සංහිඳියාව ද බිඳ දමමින් ඇති ආකාරය ඔවුහු නායක හිමියන්ට පෙන්වා දී තිබුණහ.
ඉන්ධන හිඟය, ඉන්දීය ධීවරයින්ගේ ධීවර කොල්ලය, දරාගත නොහැකි උද්ධමනය අතර ජීවිතය ගෙවා ගැනීමට අන්තිම අසීරු මොහොතක ධනපතීන් විසින් “මුහුදු ගොවිපල“ ලෙස සිදුකරන ව්යසනකාරී කොල්ල කෑම දරාගත නොහැකි බවද මේ තත්ත්වය සමහන් කරගැනීම සඳහා ජනාධිපතිවරයාගේ සහ අගමැතිවරයාගේ අවධානය යොමු කරන ලෙස ද එම ධීවර සංගම් නා හිමියන්ගෙන් ඉල්ලා තිබිණි.
උතුරේ ධීවරයින් විසින් නායක හිමියන්ට බාර දෙන ලද ලිපියේ මෙම කරුණුද සඳහන් ව ඇත.
මේ අර්බුදකාරී කාලපරිච්ඡේදය තුළ අපගේ වේදනාව තවත් වැඩි කිරීමට මුහුදු ගොවිපළවලට මුවා වී අපේ පාරම්පරික මුහුද විනාශ කර, අපේ ජීවනෝපාය අහිමි කර, දුප්පත් ධීවරයන් වන අපව තව තවත් පීඩාවට පත් කිරීමේ දැවැන්ත කුමන්ත්රණයක් ක්රියාත්මක වන බව අපි දකිමු.
උතුරු පළාතේ අක්කර දහස් ගණනක මුහුදු ප්රදේශයක කිසිදු අවසරයකින් තොරව දිනෙන් දින සියගණනක් මුහුදු ගොවිපළවල් ස්ථාපිත වෙමින් පවතී.
දූෂිත රාජ්ය නිලධාරීන්ගේ සහය ඇතිව මේ මුහුදු ගොවිපළවල් හදන එක නවත්වන්න තුන්වේලටම අමාරුවෙන් ඉන්න දුප්පත් ධීවර අපිට බැහැ.
අනාගතයේදී මේ මුහුදු ආහාර ගොවිපළ නිසා අපේ දරුවන්ට කන්න මාළු නැති වෙනවා වගේම දැවැන්ත පෝෂණ ඌනතාවයන් සහ විවිධ රෝගවලට ගොදුරු වෙනවා.
මෙම හානිකර සිප්පිකටු ගොවිපළවල සිප්පිකටු ඇති කිරීම වෙනුවට නීතිවිරෝධී ලෙස මුහුදෙන් බෙල්ලන් අල්ලා ගනිමින් සාගරයේ සමතුලිතතාවය සහ සාගරයේ සිටින මසුන්ගේ ස්වභාවික සුන්දරත්වය ඉතා භයානක ලෙස විනාශ කරමින් සිටින බව ද ඔබේ අවධානයට යොමු කරමු. .
මේ ගොවිපළවල් පවත්වාගෙන යන සමහර ලොක්කන් තිරය පිටුපස අපේ ජනතාව සහ අපේ සාගර සම්පත් සූරාකමින් බිලියන ගණන් උපයනවා.
නොගැඹුරු මුහුදේ සැරිසැරීමෙන් වගා කළ මසුන් සහ සමුද්ර සම්පත් විනාශ වනවා පමණක් නොව සමස්ත පරිසර පද්ධතියම විනාශ වන බව නැවත නැවතත් ඔප්පු කර ඇති අධ්යයනයන් රාශියක් ලොව පුරා තිබේ.
ලෝකයේ විවිධ සංවර්ධිත රටවල් සමුද්ර ගොවිපළ තහනම් කර තිබීම සමුද්ර ගොවිපළ සමස්ත පරිසරයටම හානිකර බවට පැහැදිලි සාක්ෂියකි.
චර්යාත්මක පරිසර විද්යාව සහ පරිණාමීය ජාන විද්යාව පිළිබඳ පශ්චාත් උපාධි පර්යේෂකයෙකු සහ අග්නිදිග විශ්වවිද්යාලයේ ජ්යෙෂ්ඨ කථිකාචාර්ය මහාචාර්ය ඒ.එම්. රියාස් අහමඩ් විසින් උතුරු මුහුදේ සිදු කරන ලද තීව්ර ක්ෂේත්ර පර්යේෂණ ඇසුරින් ලියන ලද “යාපනේ දූපත් වල මුහුදේ දේශපාලනය සහ පරිසර විද්යාව” මෑතකාලීන ග්රන්ථයකි.
නොගැඹුරු මුහුදේ මුහුදු පැලෑටි ගොවිපළවල් පිහිටුවීමෙන් සමස්ත පරිසර පද්ධති විනාශ කළ හැකි ආකාරය පිළිබඳ තවත් උදාහරණයක්.
දිළිඳු ධීවර ප්රජාවක් ලෙස ඇතැම් බාහිර බලවේග තම වාසිය තකා ධීවර ජනතාව අතර ගැටුම් ඇති කර මුහුදු ගොවිපළවලට මුවා වී ධීවර ජනතාව දෙකට බෙදීමට උත්සාහ කරන බව අපට නිරීක්ෂණය වී තිබේ.
දිළිඳු ධීවර ප්රජාවක් ලෙස, උතුරු පළාතේ තරුණ පරම්පරාව ඉලක්ක කර ගනිමින් සිදු කෙරෙන මත්ද්රව්ය බෙදා හැරීමට මෙම අක්වෙරළ ගොවිපළවල් සමීපව සම්බන්ධ වී ඇතැයි අපි සැක කරමු.
යාපනේ නාග විහාරයේ විමලදේව හිමියන්ගෙන් අපි ඉල්ලා සිටින්නේ සියලු ජනතාවට ඇත්ත ප්රකාශ කර අපේ මුහුදත්, දුප්පත් ධීවරයන්ගේ ජීවනෝපායත්, පරිසරයත් ඇතැම් ධනපතියන් විසින් තම අනුගාමිකයින් හරහා සූරා කෑමෙන් ආරක්ෂා කර දෙන ලෙසයි.
