අසේල කුරුළුවංශ –
-
ඝාතකයා මහනුවර ලොතරැයි විකුණන 30 හැවිරිදි පුද්ගලයෙක්… ඔහු පොලිසියට ඇවිත් භාර වෙයි… මුදල් ණයට දුන් යාචක කාන්තාව මහනුවර ඔරලෝසු කණුව අසල සිටින යාචකයෙක්…
හදිසි අවශ්යතාවක් සඳහා රුපියල් ලක්ෂයක ණය මුදලක් මහනුවර නගරයේ යාචක කාන්තාවකගෙන් ඉල්ලා ගත් ලොතරැයි අලෙවි කරන 30 හැවිරිදි තරණයෙකු ණය මුදල යළි ඉල්ලීම නිසා උරනව එම කාන්තාව ඝාතනය කර පොලීසියට පැමිණ භාරවීමේ සිද්ධියක් මහනුවර මූලස්ථාන පොලීසියේ අපරාධ විමර්ශන අංශයෙන් වාර්තා වෙයි.
මහනුවර නගරයේ ලොතරැයි අළෙවි කිරීමේ නිරත අදාළ තරුණයා ලොතුරැයි අළෙවි නියෝජිතයෙකුට ලබාදීම සඳහා අදාළ ණය මුදල ලබාගෙන තිබෙන බව පොලිස් පරීක්ෂණ මගින් අනාවරණය වී ඇත.
යාචක කාන්තාව එම මුදල් ඉල්ලා නිතර කරදර කිරීම නිසා රුපියල් 70000 ක මුදලක් ටික දිනකට පෙර ඇයට දුන් බව තරුණයා පොලීසියට පවසා තිබේ.
නැවත දිගින් දිගටම ඇය මුදල් ඉල්ලා කරදර කළ බවත් මහවැලි ගඟේ දිය නෑමට පෙරේදා (24) ඇය සමඟ ගිය අවස්ථාවේ පිහියක් ගෙන කොටන බවට තර්ජනය කර ඇය මුදල් ඉල්ලූ බවත් සැකකරුගේ ප්රකාශයේ සඳහන්ව ඇත.
එම අවස්ථාවේ තමන් පිහියා උදුරා ඇගේ ගෙළ කැපූ බවත් නීතියෙන් වසන් වී ඉන්නට නොහැකි නිසා පොලීසියට පැමිණ භාර වූ බවත් ඔහු පවසා තිබේ.
ඝාතනයට ලක්වූ කාන්තාවගේ මළ සිරුර මහනුවර අරුප්පොළ ක්රීඩාංගණය ආසන්යේ ගං ඉවුරේ ලඳු කැලෑවක තිබී පොලීසිය සොයාගෙන තිබේ. ඝාතනයට යොදාගත් පිහිය මළ සිරුර ආසන්නයේ තිබී සොයා ගත් බව පොලීසිය පවසයි.
සැකකරු මහනුවර සිරිමල්වත්ත ප්රදේශයේ පදිංචිකරුවෙකු වන අතර ඝාතනයට ලක්ව ඇත්තේ ගොහාගොඩ ප්රදේශයේ පදිංචිව සිටි තැනැත්තියක් බවට හඳුනාගෙන ඇතත් අගේ අනන්යතාව මෙතෙක් තහවුරු කරගෙන නොමැත.
ඝාතනයට ලක්වූ කාන්තාව මහනුවර ඔරලෝසු කණුව අසළ යාචකයෙකු ලෙස රැඳී සිටිමින් මුදල් එකතු කර තිබෙන අතර ඇය ලොතරැයි අළෙවි කරු සමඟ ඉතා සමීප සම්බන්ධතාවත් පවත්වා තිබෙන බව පොලිස් පරීක්ෂණ මගින් අනාවරණය වී තිබේ.
මහනුවර ජ්යෙෂ්ඨ පොලිස් අධිකාරි අනුරුද්ධ බණ්ඩාර හක්මන, පොලිස් අධිකාරි (01) දයාල් ඉලංගකෝන්ගේ උපදෙස් මත මහනුවර මූලස්ථාන පොලිසියේ අපරාධ විමර්ශන අංශයේ ස්ථානාධිපති සම්පත් රාජපක්ෂ විසින් සිද්ධිය පිළිබඳ පරීක්ෂණ පවත්වනු ලබයි.
