අමායා උඩුවැරැල්ල –
අසාර්ථක වූ ක්රිප්ටෝ හුවමාරු සමාගමක් වන FTX හි සම නිර්මාතෘවරයෙකු වන සෑම් බෑන්ක්මන් ෆ්රයිඩ් හට, ඔහුගේ සමාගමේ ගනුදෙනුකරුවන්ට සහ ආයෝජකයින්ට වංචා කිරීමේ වරදට වසර 25 ක සිරදඬුවමක් නියම කර ඇති බව වාර්තා වනවා. සෑම් බෑන්ක්මන් ෆ්රයිඩ් හැඳින්වෙන්නේ ක්රිප්ටෝ කරන්සි රජු ලෙසයි.
FTX ට්රේඩිං ලිමිටඩ් එනම් සාමාන්යයෙන් FTX ලෙස හැඳින්වෙන සමාගම, වංචාකාරී මුදල් හුවමාරුවක් සහ ක්රිප්ටෝ හෙජ් අරමුදලක් පවත්වාගෙන ගිය වර්ථමානය වනවිට බංකොලොත් බවට පත් වූ සමාගමක්. 2019 වසරේ දී සෑම් බෑන්ක්මන් ෆ්රයිඩ් සහ ගැරී වැන්ග් විසින් ආරම්භ කරන ලද එම සමාගම 2021 වසරේ ජූලි මාසය විට මිලියනයකට අධික පරිශීලකයින් සිටි තුන්වන විශාලතම මුදල් හුවමාරු කිරීමේ සමාගමක් ව පැවතියා.එහි මූලස්ථානය බහමාස් හි පිහිටා තිබෙනවා.
2022 වසරේ FTX සමාගමේ බිඳ වැටීම සිදු වූ අතර එලෙස බිඳ වැටීමට පෙර ෆ්රයිඩ් ගනුදෙනුකරුවන්ගෙන් බිලියන ගණනක් සොරකම් කර ඇති බව සොයා ගැනීමට හැකිව තිබෙනවා. වාර්තා වන පරිදි, ඔහු ගනුදෙනුකරුවන්ගෙන් ඩොලර් බිලියන 8 කටත් වැඩි ප්රමාණයක් ලබා ගත් ආකාරය සහ දේපළ මිලදී ගැනීමට මුදල් යෙදවූ ආකාරය විස්තර කරන ලද නඩු විභාගයකින් පසුව වංචා සහ මුදල් විශුද්ධිකරණය කිරීමේ කුමන්ත්රණය ඇතුළු චෝදනා මත නිව්යෝර්ක් හි ජූරි සභාවක් විසින් පසුගිය වසරේ ඔහු වරදකරු කර තිබෙනවා. 32 හැවිරිදි වියේ පසුවන සෑම් ෆ්රයිඩ් වරක් ෆෝබ්ස් සඟරාව මඟින් 41 වන ඇමරිකානු ධනවතා ලෙස ශ්රේණිගත කිරීම්වල දක්වා තිබූ බව සඳහන් වනවා.
කෙසේ වෙතත් පසුගිය බ්රහස්පතින්දා දින ඔහුගේ නඩු තීන්දුව ප්රකාශයට පත්කරන අවස්ථාවේ විනිසුරුවරයා ෆ්රයිඩ්ගේ හැසිරීම පිළිබඳව දක්වමින් එය වැරද්දක් බවත් සාපරාධී ක්රියාවක් බවත් ඔහු දැන සිටි නමුත් ඔහු කිසිවක් පිළිනොගන්නා බව පවසා තිබෙනවා. සැබවින්ම ෆ්රයිඩ් තම ගනුදෙනුකරුවන්ට සිදු වූ පාඩු පිළිබඳව තමා ශෝක වන බව පවසා ඇතත්, තමා කල අපරාධය ගැන කිසිවිටෙක පසුතැවිලි වන බවක් ප්රකාශ කර නොමැති බව විදෙස් මාධ්ය සඳහන් කර තිබෙනවා. ඔහුට ලැබුනු වසර 25 ක සිර දඬුවම, බරපතල සිර දඬුවමක් වන නමුත් එය ඇමරිකානු රජයේ නිල මාර්ගෝපදේශය යටතේ ඔහුට ලැබිය යුතුව තිබූ වසර 100 ක සිර දඬුවමට වඩා බෙහෙවින් අඩු බව සඳහන් ව තිබෙනවා.
ෆ්රයිඩ් ගේ දඬුවම් ප්රකාශයේදී විනිසුරු පවසා තිබුනේ ජීවිතාන්තය දක්වා සිරදඬුවම් නියම කිරීම අනවශ්ය නමුත් අනාගතයේ අපරාධ සිදු කිරීමෙන් වැලැකීමට ප්රමාණවත් වන දඬුවමක් ඔහුට ලැබිය යුතු බවයි. මොහු අනාගතයේදී ඉතා නරක යමක් කිරීමට හැකි තත්වයකට පත්වීමේ අවදානමක් පවතින අතර එය කිසිසේත්ම සුළු අවදානමක් නොවන බව විනිසුරුවරයා වැඩිදුරටත් පවසා තිබෙනවා. වින්දිතයින්ට වන්දි ලබා දීමට ඩොලර් බිලියන 11 ක් ගෙවීමට ද ඔහුට නියෝග කර තිබෙන අතර ඔහුගේ ඇතැම් වත්කම් රජය දැනටමත් අත්පත් කර ගෙන ඇති බව ත් වාර්තා වනවා. සෑම් ෆ්රයිඩ් තීන්දුව පිළිබඳව ප්රතිචාරයක් දක්වා නැති බව සඳහන් වනවා.
දඬුවම් නියම කිරීමට පෙර ඔහු විසින් වැරදි කළමනාකරණය සම්බන්ධ ව වරද පිළිගෙන ඇති නමුත් සමාගම බිඳවැටෙන අවස්ථාවේ ගනුදෙනුකරුවන්ට ආපසු ගෙවීමට FTX හට හැකියාව තිබූ බවට පවසා තිබෙනවා. එමෙන්ම ගැරී වැන්ග් ඇතුළු සමාගමේ නිලධාරීන් ද හිටපු සේවකයින් ද කලකිරීමට පත් කිරීම ගැන කණගාටු වන බවත් ඔහු සඳහන් කල බව දැක්වෙනවා. FTX සමාගම බිඳ වැටෙන විට එහි 300 කට ආසන්න පිරිසක් සේවය කරමින් සිට තිබෙන බව විදෙස් මාධ්ය වාර්තාවල සඳහන් වනවා.
ෆ්රයිඩ් ගේ දෙමව්පියන් පණිවිඩයක් නිකුත් කරමින් පවසා ඇත්තේ ඔවුන් හදවතින් කම්පා වී සිටින අතරම තම පුතා වෙනුවෙන් දිගටම සටන් කරන බවයි. එමෙන්ම සෑම් බෑන්ක්මන් ෆ්රයිඩ් ගේ නීතිඥයන් ඔහු වෙනුවෙන් අභියාචනයක් ඉදිරිපත් කිරීමට නියමිත බවද සඳහන් වනවා.
