මුහුදේ පාවෙමින් තිබුණු බෝතලය දැක්කම කට්ටියම කිව්වා ඒක විස්කි බෝතලයක් කියලා. පස්සේ බොහොම අමාරුවෙන් ඒක කට්ටියම එකතු වෙලා ගොඩ ගත්තා. බෝතලේ සීල් කඩල තිබ්බෙත් නැහැ. හැමෝම බෝතලේ කටේ තියාගෙන බිව්වා. මටත් දුන්නා. උගුරක් බොනකොට බඩ පපුව දන්න ගත්තා. ඒ වෙලාවේ මම අනිත් අයට කිව්වා ඕක බොන්න එපා කියලා. කවුරුත් ඒ කියන දේ ඇහුවේ නැහැ. හොඳටම බිව්වා.
පැයක් හමාරක් යනකොට කට්ටිය බඩවල් අල්ලගෙන කෑ ගහන්න ගත්තා. එක්කෙනා දෙන්නා මැරිල වැටෙනකොට මම දැන ගත්තා බීපු බෝතලේ විස වෙලා කියලා.
මම ඉක්මනටම උයන්න තියෙන පොල් ගෙඩියකින් කිරි මිරිකලා බිව්වා. උණු වතුරත් බිව්වා“ යැයි ගැඹුරු මුහුදේ ධීවර කටයුතුවල නිරතව සිටියදී මුහුදේ පාවෙමින් තිබුණු බෝතලයක තිබුණු ද්රාවණයක් මත්පැන් යැයි සිතා පානය කළ ධීවරයන් 06 දෙනා අතරින් දිවි රැකගත් එකම පුද්ගලයා වන සුමිත් කුමාර හම්බන්තොට වරාය පොලිසියට ප්රකාශයක් දෙමින් එසේ පැවසීය.
මේ වන විට ඔහු ප්රතිකාර ලැබීමෙන් පසු හම්බන්තොට උඩබැරගම සිය නිවෙසේ සිටින අතර ඔහු පොලිසියට පවසා ඇති ආකාරයට අනුව මුලින්ම මියගොස් ඇත්තේ බෝට්ටුවේ සිටි ස්කීපර්වරයාය. මුලින්ම බෝතලය කටේ තබාගෙන පානය කර ඇත්තේ ද ඔහුය.
ධීවරයින්ගේ අවසන් ගමන….
මෙම ධීවරයා පොලිසියට පවසා ඇත්තේ මුල් උගුර පමණක් පානය කළ තමා ඊට පසු එම බෝතලයේ තිබුණු ද්රාවණය පානය නොකළ බවය.
“අනිත් අය මැරිල වැටෙනවා මම දැක්කා. මට ජීවත් වෙන්න අවස්ථාවක් ලැබෙයි ද කියලා හිතා ගන්න බැරි වුණා. මම බෝට්ටුවේ තිබ්බ රේඩියෝවෙන් ගොඩබිමට පණිවිඩ දුන්නා.“ යැයි ද ඔහු පොලිසියට පවසා ඇත.
මෙම ධීවරයන් පිරිස තමන්ට බෝතලය ලැබුණු පසු එය පානය කිරීමට පෙර සෙල්ෆි ඡායාරූපයක් ගෙන ඇත.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
එම සෙල්ෆි ඡායාරූපය පෙරේදා (04) වන විට ප්රසිද්ධියට පත්ව තිබිණි. ඒ සම්බන්ධයෙන් හම්බන්තොට වරාය පොලිසියේ උසස් නිලධාරියකුගෙන් විමසීමක් කළ අතර එහිදී එම නිලධාරියා පැවසුවේ එම ඡායාරූපයේ සිටින්නේ එම ධිවරයන් බව තමාට ද දැන ගැනීමට ලැබුණු බවය. එම ඡායාරූපය තමාගේ ජංගම දුරකතනයට ද ලැබුණු බව ඔහු වැඩිදුරටත් සඳහන් කළේය. ( ගයාන් කුමාර වීරසිංහ – දිනමිණ )
