ශ්රියානි විජේසිංහ –
දිවයින පුරා පිහිටි ග්රාම නිලධාරීන්ගේ කාර්යාලයන් නැවත විවෘත වන්නේ ලබන බ්රහස්පතින්දා බැවින් රාජකාරි කටයුතු කර ගැනීමට පැමිණෙන්නේ නම් එදිනට පැමිණෙන්නැයිද ශ්රී ලංකා ග්රාම නිලධාරින්ගේ සංගමය මහජනතාවට දැනුම් දී සිටියි.
මේ වන විට තම සේවා ව්යවස්ථාව සහ අනුමත වැටුප් යෝජනාව ලබා ගැනීම සම්බන්ධයෙන් රජය නිසි විසඳුමක් ලබා නොදීම හේතුවෙන් ග්රාම නිලධාරීන් ආරම්භ කර තිබෙන අකුරට වැඩ කිරීමේ දීපව්යාප්ත වෘත්තීය සමිති ක්රියාමාර්ගයට අමතරව ලබන සඳුදා සහ අඟහරුවාදා රාජ්ය , පළාත්රාජ්ය නිලධාරීන් එක්ව ක්රියාත්මක කරන අසනීප නිවාඩු වාර්තා කිරීමේ වෘත්තිය සමිති ක්රියාමාර්ගයට ග්රාම නිලධාරීන්ද සහයෝගය දක්වන බැවින් තම කාර්යාලයන් විවෘත නොකරන බව සංගමයේ ජාතික සංවිධායක නෙවිල් විජේරත්න සඳහන් කරයි.
ග්රාම නිලධාරින් තම ගැටලු විසඳා ගැනීම සඳහා රජය සමග දිගින් දිගම පැවැත් වූ සාකච්ඡාවලින් මෙතෙක් කිසිදු සාධනීය පිළිතුරක් ලබා නොදුන් බවද ජාතික සංවිධායකවරයා පැවසුවේය.
ග්රාම නිලධාරින් ගෙන යන වෘත්තීය සමිති ක්රියාමාර්ගය හේතුවෙන් මහජනතාවට සිදුවන අපහසුවන් හැකි පමණ අවම කරමින් අකුරට වැඩ කිරීමේ වෘත්තීය සමිති ක්රියාමාර්ගය තවදුරටත් ඉදිරියට ගෙන යන බවද හෙතෙම අවධාරණය කරයි.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්රෑම් සමූහයන්ට එක්වෙන්න.
