ශ්රී ලංකා මානව හිමිකම් කොමිෂන් සභාව ශ්රේෂ්ඨාධිකරණයට ගොනු කර ඇති පෙත්සම සලකා බැලීම අවසන් කරන තුරු විදුලිය විසන්ධි කිරීමක් සිදු නොකරන බවට ලංකා විදුලි බල මණ්ඩලය අද (02) ශ්රේෂ්ඨාධිකරණයට ප්රතිඥාවක් ලබා දුන්නේය.
ඒ ශ්රී ලංකා මානව හිමිකම් කොමිෂන් සභාව විසින් ගොනු කර තිබූ එම අධිකරණයට අපහාස කිරීමේ නඩුව පී. පද්මන් සුරසේන, යසන්ත කෝදාගොඩ, ශිරාන් ගුණරත්න යන විනිසුරු මඩුල්ල හමුවේ අද කැඳවනු ලැබූ අවස්ථාවේ දී ය.
මෙවර උසස් පෙළ විභාගය අවසන් වන තුරු කිසිදු ආකාරයකින් විදුලිය විසන්ධි කිරීමක් සිදු නොකරන ලෙසට තමත් ලබාදී තිබු තීන්දුව උල්ලංඝණය කරමින් විදුලිබල බලධාරීන් කටයුතු කිරීමට එරෙහිව ශ්රී ලංකා මානව හිමිකම් කොමිෂන් සභාව ශ්රේෂ්ඨාධිකරණයට මෙම පෙත්සම ගොනුකරනු ලැබුවේ පසුගිය 30 වැනි දා ය.
ලංකා විදුලි බල මණ්ඩලය වෙනුවෙන් පෙනී සිටි ජනාධිපති නීතිඥ උදිත ඉහලහේවා එම පොරොන්දුව ලබා දෙමින් අධිකරණයට පෙන්වා දුන්නේ, මේ වන විටත් ලංකා විදුලිබල මණ්ඩලය සැලසුම් කළ පරිදි කිසිදු ආකාරයකින් විදුලිය විසන්ධි කිරීමක් එම කාලය තුළ සිදු නොකරන බවයි.
කෙසේ වෙතත් මෙහිදි විදුලිබල මණ්ඩලය වෙනුවෙන් පෙනී සිටි නීතිඥවරයා අඛණ්ඩ විදුලිය ලබා දෙන කාලසීමාව ලෙස අදහස් කර තිබුණේ අපේක්ෂකයින් විභාගයට පිළිතුරු ලියන කාල සීමාව බව පෙනුනි.
පසුගිය 30 දා ශ්රේෂ්ඨාධිකරණය ඉදිරියේ මානව හිමිකම් කොමිෂන් සභාව මෙම නඩුව ගොනු කර තිබුණේ විදුලිබල හා බලශක්ති අමාත්යාංශයේ ලේකම්වරයාට, ලංකා විදුලිබල මණ්ඩලයේ සභාපතිවරයාට සහ ලංකා ඛනිජ තෙල් නීතිගත සංස්ථාවේ සභාපතිවරයාට එරෙහිවය.
2023 ජනවාරි 23 වැනි දින සිට පෙබරවාරි 17 වැනි දින දක්වා උසස් පෙළ විභාගයට අදාළ කාලසීමාව තුළ අඛණ්ඩව විදුලිය සැපයීම සඳහා විදුලිබල හා බලශක්ති අමාත්යාංශයේ ලේකම්, ලංකා විදුලිබල මණ්ඩලයේ සභාපති සහ ලංකා ඛනිජ තෙල් නීතිගත සංස්ථාවේ සභාපති කොමිසම හමුවේ ඇති කර ගත් එකඟතාවට අවනත වී නොමැති වීම හේතුවෙන් මෙම කොමිසම අධිකරණය හමුවට ගියේය.
මානව හිමිකම් කොමිසම පෙන්වා දුන්නේ 1996 අංක 21 දරන ශ්රී ලංකා මානව හිමිකම් කොමිෂන් සභා පනතේ විධිවිධාන යටතේ ලංකා විදුලිබල මණ්ඩලයේ සභාපතිවරයා අපහාස කිරීමේ වරදට වරදකරු බවය.
උසස් පෙළ සිසුන්ට විභාග කාලය තුළ අඛණ්ඩ විදුලිය ලබාදීමට අර්ථවත් ක්රම ඇති බව කොමිසම හමුවේ පිළිගෙන එම පදනම මත පිහිටා එකඟතාවකට පැමිණියද ලංකා විදුලිබල මණ්ඩලය හිතාමතා සහ ද්වේෂසහගත ලෙස එම සමථය නොතකා විදුලිය විසන්ධි කිරීම අඛණ්ඩව සිදු කළ බවට කොමිසම චෝදනා කර තිබිණි.
විභාග කාලසීමාව තුළ අඛණ්ඩ විදුලි සැපයුමක් ලබාදීමට විදුලිබල මණ්ඩලයේ ඉහත සඳහන් සමථය අමු අමුවේ නොසලකා හැරීම ළමා අධ්යාපන අයිතිය බරපතළ ලෙස උල්ලංඝනය කිරීමක් ලෙස කොමිසම සැලකුවේය.
ලංවිම රාජ්ය නිලධාරීන්ගේ නොගැලපෙන සහ සාහසික හැසිරීම හිතාමතාම ශ්රී ලංකා මානව හිමිකම් කොමිෂන් සභාවට සහයුක්තියට කළ අපහාසයක් ලෙස කොමිසම සලකන බවත් ශ්රී ලංකා මානව හිමිකම් කොමිෂන් සභාව කීවේය.
මෙම මැදිහත්වීමේ ඒකායන අරමුණ පුරවැසියන්ගේ සහ විශේෂයෙන් උසස් පෙළ අපේක්ෂකයින්ගේ නිසි ගෞරවය සහ පුරවැසියන්ගේ මූලික අයිතිවාසිකම් සහතික කිරීම පමණක් බව අවධාරණය කළ කොමිසම රටේ නීතියේ ආධිපත්යය තහවුරු කිරීම සඳහා අඛණ්ඩව දරන උත්සාහය පිළිබඳව සහතික කර තිබිණි.
