පෙරේදා පැවති තරගයට වඩා සපුරාම වෙනස් තරගයකි. ඒ ගැහිල්ල මාරය. මුලින්ම පන්දුවට පහර දී ලකුණු 162ක් ලබා ගන්නා විට අපට හිතුනේ මේ නම් මදි වගේය. ඕවර විස්ස අවසානයේ දී මහා පරාජිත හැඟීමක් ආවේය. ඒ පළවෙනි මැච් එකේ ඔවුන්ගෙන් ගුටි කෑ ආකාරය සිහි වනවිටය. ඒ නැවු ගුටි මතක් වෙමින් තිබුණ ඒ වෙලාවේත් අපේ ඇඟ පතත් රිදෙමින් තිබුණේය.
ඒත් අද බටහිර ඉන්දීය කොදෙව්වන් සමග දඹුල්ලේ පැවති දෙවැනි තරගය අප ලකුණු 73කින් දිනුම්ය. ඔවුන් පන්දු 23ක් ඉතිරිව තිබෙද්දී ලකුණු 89කට සියල්ලෝ දැවී ගියහ.
දඹුල්ලේ දී අද අප දුටුවේ දඟ පන්දු විශ්මයකි. අපේ පොඩි එකා දුනිත් විස්සයි 20 අන්තර්ජාතික තරගයක අමතක නොවන පන්දු යැවීමක් කළේය. දුනිත් පන්දු ඕවර 4කි. ලබා දුනනේ ලකුණු 09කි. කඩුළු 03ක් දවා ගත්තේය. අනෙක් අන්තයෙන් මහීෂ් තීක්ෂණත් අග්ර පන්දු යැවීමකය. පන්දු ඕවර 3.1කි. ලකුණු 07ට කඩුලු 02කි. චරිත් අසලංකත් අද හිතාගත නොහැකි පෙරළියක් පන්දුවෙන් කළේය. පන්දු ඕවර 2කි. ලකුණු 06කි. කඩුළු 02කි. හසරංග දැඩි ප්රහාරයකට ලක්වුන එකම පන්දු යවන්නා වූයේය. ඔහු කඩුළු 2ක් ලබා ගත් නමුත් ඕවර 3ට ලකුණු 32ක් ලබා දුන්නේය. මතීෂ පතිරණ ලකුණු 12ට කඩුල්ලකි.
පන්දු යැවීම සම්බන්ධව මුලින්ම ඒ සටහන තබන්නේ දඹුල්ලේ අද එළිදැක්වුන දඟ පන්දු වික්රමය ඒ තරම් රමණීය එකක් නිසාය.
තරගය
කාසියේ වාසිය දිනුවේ ශ්රි ලංකා කණ්ඩායමය. චරිත් පන්දුවට පහරදීම තේරුවේය. අද ඒ තේරීම සාධාරණීකරණය කරන්නට පැතුම් නිශ්ශංක සහ කුසල් මෙන්ඩිස් සමත් වූහ. ආරම්භක කඩුල්ලේ සම්බන්ධතාවය ලකුණු 77කි. ආරම්භක පිතිකරුවන් දෙදෙනා මුල් පන්දු ඕවර 10 ක්රීඩා කළහ. කුසල් මෙන්ඩිස් ලකුණු 26කට මුල්ම කඩුල්ල ලෙස දැවී යන්නේ 10 වැනි ඕවරයේ අවසන් පන්දුවේ දී ය. කුසල් ඒ ලකුණු 26 සඳහා හයේ පහරක් සහ හතරේ පහර දෙකක් සමග පන්දු 25ක් වැය කළේය.
අනතුරුව පැතුම්ට එකතුවන කුසල් පෙරේරා පන්දු 16ක් තුළ ලකුණු 24ක් ලබන්නේ හතරේ පහර 03ක් සහ එක් හයේ පහරක් සමගිනි.
කමිඳු පන්දු 14ක දී ලකුණු 19ක් ලැබුවේය. බටහිර ඉන්දීය වේග පන්දු යවන බලඇණිය අවසන් මොහොත දක්වා දැඩි පීඩනයක් පතිත කරමින් පන්දු යැවූ අයුරු දුටුවෙමු. ඒ පීඩනය කදිමට කළමනාකරණය කරගෙන තරගයේ විශිෂ්ටම පිතිකරණය පැතුම් නිශ්ශංක ගොඩනැගුවේය. ඔහු පන්දු 49ක දී විශිෂ්ඨ ලකුණු 54ක් වාර්තා කළේය. ඒ පන්දු 49ක දී ය. ඊට හතරේ පහර 09ක් සහ එක් හයේ පහරක් ඇතුළත් විය.
බටහිර ඉන්දීය කොදෙව්වන් වෙනුවෙන් රොමාරියෝ ෂෙපඩ්, පන්දු ඕවර 3ක් තුළ ලකුණු 23කට කඩුළු 2ක් ලැබුවේය. අල්සාරි ජෝෂප් ලකුණු 33කට කඩුල්ලක්, ෂාමර් ජෝෂප් ලකුණු 35කට කඩුල්ලක්, ෂාමර් ස්ප්රින්ගර් ලකුණු 24ට කඩුල්ලක් ලැබුවේය.
මුල් තරගයේ දී වැඩ නොකළ චරිත්ගේ සැලසුම මේ තරගයේ නම් සුපිරියට වැඩ කරනු දුටුවෙමු. ආරම්භක පන්දු යැවීම මහීෂ් තික්ෂණගෙනි. තුන්වැනි ඕවරයේ සිට මහීෂ් තීක්ෂණ සමග පන්දු යවන්නට කැඳවන්නේ දුනිත් වෙල්ලාලගේය. පවර් ප්ලේ එක නිමා වනවිට බටහිර ඉන්දීය කොදෙව්වන්ට පරාජයේ සොහොන් ලකුණු වැටී අවසන්ය. මුල් පන්දු ඕවර 06 දී ලකුණු 21ට කඩුළු 03කි. ලකුණු 50 පසුකරන්නේ ඕවර 12.2 දී ය.
බටහිර ඉන්දීය කොදෙව්වන් වෙනුවෙන් වැඩිම ලකුණු නායක රොවෙන් පවෙල්ය. ඔහු ලකුණු 20කි. අල්සාරි ජෝෂප් ලකුණු 16කි. ෂෙෆන් රදර්ෆර්ඩ් ලකුණු 14කි.
අනෙක් කිසිම ක්රීඩකයෙකුට ලකුණු 07ක සීමා පසු කරන්නට බැරි විය . අංක 1 සිට 4 දක්වා පිතිකරුවන්ගේ ලකුණුවල එකතුව 16කි.
දැන් මරුය. තරගාවලි ජයග්රහණය තීන්දු වන්නේ ඊලඟ තරගයෙනි. බටහිර ඉන්දීය කොදෙව් කණ්ඩායමට සපුරා වෙනස් තරග සැලසුම අද ඔවුන්ව අල්ලා පොළොවේ ගැසුවේය. අප විශ්වාස කරන්නේ දිනුම පැරදුම කෙසේ වුවත් ඊලඟ විස්සයි 20 තරගය නිවාඩු දමා නැරඹිය යුතු එකක් බවය.
