හැටන් රංජිත් රාජපක්ෂ –
සිංහරාජ ලෝක උරුම වනාන්තරයේ සහ හොර්ටන්තැන්න ජාතික උද්යානයට ඇතුළු වී මෙරටට ආවේනික වු ජෛව සම්පත් එක්රැස් කරමින් සිටියදි අත්අඩංගුවට ගත් රුසියානු ජාතිකයන් දෙදෙනා ඊයේ (15) දින ඇඹිලිපිටිය මහෙස්ත්රාත් අධිකරණය හමුවේ වරද පිලිගත් නිසා සැකකරුවන් දෙදෙනාට රුපියල් එකලොස් කොටි හැට අට ලක්ෂ දස දහසක දඩ මුදලක් ගෙවන ලෙස ඇඹිලිපිටිය මහෙස්ත්රාත් දිළුම් ප්රනාන්දු නියෝග කළේය.
මෙසේ දඩ මුදල් ගෙවන ලෙසට නියම කරනු ලැබුවේ රුසියාවේ මොස්කව් නුවර පදිංචි සැවෙලි ඇලෙක්සැන්ඩ්රොවිච් (18) සහ නිකොලයි ඊල්යිච් (21) යන අයටයි.
සැකකරුවන් දෙදෙනා වෙනුවෙන් පෙනි සිටි නිතිඥවරයා අධිකරණය හමුවේ ඉල්ලිමක් කරමින් කියා සිටියේ එම දඩ මුදල කොටස් වශයෙන් ගෙවීමට නියෝගයක් ලබාදෙන ලෙසත්, (15) දින එම දඩ මුදලෙන් ලක්ෂ පහලෝවක මුදලක් අධිකරණය වෙත ගෙවන බවත් ය.
එම ඉල්ලිමට වනජිවි නිලධාරින්ගේ විරෝධයක් මතු නොවු නිසා දෙපාර්ශව පිලිබදව කරුණු සලකා බැලු මහෙස්ත්රාත්වරයා යලිත් මෙම නඩුව ලබන මස (26) දින කැඳවිමට නියෝග කළ අතර, දඩ මුදල සම්පුර්ණයෙන්ම ගෙවා අවසන් කරන තෙක් සැකකරුවන් දෙදෙනාගේ විදෙස් ගමන් බලපත්රය අධිකරණය හමුවේ තවදුරටත් රදවා ගැනීමට නියෝග කෙරිණ.
සැකකරුවන් දෙදෙනා ඉකුත් අගොස්තු මස (28) දින එම රක්ෂිතයන් තුළට ඇතුළු වි ජෛව සම්පත් මංකොල්ලකමින් සිටින බවට ලද තොරතුරක් මත නුවරඑලිය හෝර්ටන්තැන්න ජාතික වන උද්යානයේ නියෝජ්ය භාරකරු ඩබ්ලිව්.එම්.එල්.කේ.වාසල, නුවරඑලිය ගැල්වෙස්ලැන්ඩ් ජාතික වන උද්යානයේ භාරකරු ප්රභාෂ් කරුණාතිලක ඇතුළු වනජිවි නිලධාරින් කණ්ඩායමක් සිංහරාජ ලෝක උරුම වන්නාන්තරය වෙත ගොස් වැටලීමක් සිදු කර සැකකරුවන් දෙදෙනා අත්අඩංගුවට ගෙන වැඩිදුර විමර්ශන සිදු කිරිමේදි සැකකරුවන් නවාතැන්ගෙන සිටි ඇඹිලිපිටිය ප්රදේශයේ පිහිටි සංචාරක හෝටලයක කාමරයක සඟවා තිබු ජෛව සම්පත් 230 ක් තම භාරයට ගත් බව එම වැටලීමට එක් වු හෝර්ටන්තැන්න ජාතික වන උද්යානයේ නියෝජ්ය භාරකරු ඩබ්ලිව්.එම්.එල්.කේ.වාසල පැවසිය.
එම සැකකරුවන් දෙදෙනා ඉකුත් අගොස්තු මස (29) දින ඇඹිලිපිටිය මහෙස්ත්රාත් අධිකරණය වෙත ඉදිරිපත් කිරිමෙන් අනතුරුව දැඩි ඇප කොන්දේසි මත මුදා හැරිමට ඇඹිලිපිටිය මහෙස්ත්රාත්වරයා නියෝග කර තිබුණි.
එක් සැකකරුවෙකුට චෝදනා 1067 බැගින් ගොණු කළ බවත්, වනජිවි දෙපාර්තුමේන්තු ඉතිහාසයේ ජෛව සම්පත් මංකොල්ලයකට නියම කළ වැඩිම දඩ මුදල මෙය බවත් ඩබ්ලිව්.එම්.එල්.කේ.වාසල කියා සිටියේය.
සැකකරුවන්ගේ චෝදනා වලට අමතරව සැකකරුවන් විසින් එක්රැස් කර තිබු ජෛව සම්පත් සම්බන්ධයෙන් කුමන සජිවී සත්ව කාණ්ඩයක්ද යන්න පිලිබඳව වාර්තාවක් සත්ව උද්යාන අධ්යක්ෂක ජෙනරාල්වරයාගෙන් සහ සතුන් මත් කිරිම සම්බන්ධයෙන් පශු පර්යේෂණ ආයතනයෙන් වාර්තා කැඳවා එම වාර්තාද අධිකරණය හමුවේ ඉදිරිපත් කල බවයි ඩබ්ලිව්.එම්.එල්.කේ.වාසල කියා සිටියේ.
එම චුදිතයන් දෙදෙනා මෙරටට ආවේනික දුම්බර අං කටුස්සා, පලා කටුස්සා, ඇහැටුල්ලා, කණාමැදිරියන්, ගොළුබෙල්ලන්, සිංහරාජ වනාන්තරයට ආවේනික රක්වාන ගෙම්බන් ඇතුළු ජෛව සම්පත් 230 ක් එක්රැස් කර තිබුණි.
