මනම්පිටිය නිමල් ජයරත්න –
යුද හමුදාවට අයත් ගිලන් රථයකින් මුවමස් ප්රවාහනය කරමින් සිටි රියදුරු ඇතුළු ලාන්ස් කෝප්රල් සෙබළුන් දෙදෙනකු අදට යෙදී තිබුණු ඉල් පොහොය දා දහවල් මාදුරුඔය වනෝද්යානය අසල දී අත්අඩංගුවට ගත් බව මාදුරුඔය වනජීවිී කාර්යාලය සඳහන් කරයි.
සැකකරුවන් මාවනාගම යුධ හමුදා කඳවුරට අයත් ලාන්ස් කෝප්රල් වරුන් දෙදෙනෙකු වන අතර මුව මස් කිලෝ තුනක් සමග ඔවුන් දෙදෙනා දෙහිඅත්තකණ්ඩිය පොලිසියට භාරදීමට කටයුතු කල බව මාදුරුඔය උද්යාන භාරකරු ඩී,එස්. ජයසෝම රත්නායක අප කළ විමසීමකදී සඳහන් කළේය.
මාදුරුඔය හෙනන්නේගල සිට මාවනාවෙල යුද හමුදා කඳවුර දක්වා මුවමස් ප්රවාහනය කර ඇති අතර මීට පෙරද ඔවුන් ගිලන් රථයෙන් මස් ප්රවාහනය කර ඇති බවට තොරතුරු ලැබී බවත්, මේ පිළිබඳ හෙනන්නේගල වනජීවි කාර්යාල තොරතුරු ලැබීමත් සමග ඔවුන් දියත් කළ මෙහෙයුමකින් ගිලන්රථය සහ මුව මස් සමග සැකකාර සෙබළුන් දෙදෙනා අත්අඩංගුවට ගැනීමට හැකි වූ බවත් ජයසෝම රත්නායක කීවේය.
අත්අඩංගුවට ගත් සැකකරුවන් දෙදෙනා 8 වැනිදා දෙහිඅත්තකණ්ඩිය මහේස්ත්රාත් අධිකරණයට ඉදිරිපත් කිරීමට නියමිත බවද මාදුරුඔය උද්යාන භාරකරු ජයසෝම රත්නායක වැඩිදුරටත් සඳහන් කළේය.
හෙනන්නෙගල වනජීවී කාර්යාලයේ වන සත්ව නියාමක ඩබ්ලිව්.කේ.සී. එම් රත්නායක, මහේෂ් මදුශංක, රියදුරු කේ. සී. එම් ගුණසේකර ඇතුළු වනජීවී නිලධාරීන් පිරිසක් මෙම වැටලීම සිදුකළහ.
