මනම්පිටිය නිමල් ජයරත්න –
පසුගිය 2023 වසරේ ඔක්තෝම්බර් 26 වෙනිදා පිටපත් කිරීම කටයුතු ආරම්භ කළ ලංකාවේ දැවැන්තම සෙල් ලිපිය වූ දිඹුලාගල සෙල් ලිපියේ අන්තර්ගතය ප්රකාශ කිරීමට දින 14 ක් ගතවන බව පුරාවිද්යා නිලධාරින් ප්රකාශ කර නමුදු මේ වනවිට මාස හතරකට ආසන්න කාලයක් ගත වුවද සෙල්ලිපිය පිළිබඳව කිසිදු තොරතුරක් නොමැති වීම සැකකටයුතු තත්ත්වයක් බව දිඹුලාගල ආරණ්ය සේනාධිපති පූජ්ය දිඹුලාගල රාහුලාලංකාර හිමිපාණන් පැවසූහ.
දිඹුලාගල ආරණ්ය සේනාසයේ දි අද (26) විශේෂ පුවත් පත් සාකච්ඡාවක් පවත්වමින් උන්වහන්සේ මේ තත්ත්වය පිළිබඳ දැඩිව අවධානය යොමු කරන ලෙස ජනාධිපතිවරයාගෙන්, අගමැතිවරයාගෙන් සහ සංස්කෘතික කටයුතු පිළිබඳ ඇමතිවරයාගෙන් විශේෂ ඉල්ලීමක් කළහ.
උන්වහන්සේ දැඩිව අවධාරණය කළේ සෙල් ලිපියෙන් කියැවෙන ඉතිහාසය හා අර්ථකථනය මෙතෙක් හෙළි නොකිරීම පිටුපස යම් සැලසුම් සහගත කුමන්ත්රණයක් පවතින බවට දැන් නම් තමන්ටත් සැක සිතෙන බවය.
තවද මේ වනතුරුත් සෙල් ලිපිය නැරඹීමට යෑමේ දුෂ්කරතා මතුව ඇති හෙයින් ඉතා කඩිනමින් සෙල්ලිපිය නැරඹීමට ප්රවේශ මාර්ගයක් සහ ස්ථානයේ ආවරණයක් සහ ආලෝක පද්ධතියක් සවිකිරීමට කටයුතු කරන ලෙස ද උන් වහන්සේ ඉල්ලූහ.
දිගින් අඩි 50 ක් සහ උසින් අඩි 09 ක් පමණ ඇති මෙම ශිලා ලේඛනය, ක්රිස්තු පූර්ව පලවන සහ තුන්වන සියවස අතර පූර්ව බ්රාහ්මීය අක්ෂරවලින් ලියා ඇති බව ඒ පිළිබඳ ගවේෂණය කළ පුරාවිද්යා ගවේෂකයෝ ප්රකාශ කරති. .
අප මේ පිළිබඳව පුරාවිද්යා දෙපාර්තමේන්තුවේ පොළොන්නරුව සහකාර අධ්යක්ෂ එම්. ජී.රත්නපාලගෙන් දුරකථනය කළ විමසීමකදි සඳහන් කළේ, පුරාවිද්යා දෙපාර්තමේන්තුවේ ඊළඟ අදියර වන්නේ විශාලතම සෙල් ලිපිය ආරක්ෂා කිරීමත්, එය නැරඹීමට ප්රවේශ මාර්ග ඉදිකිරීම, සහ එම ස්ථානයට විදුලි ආලෝක සපයා දීමත් බවයි.
එම කටයුතු ඉතා කඩිනමින් සිදු කිරීමට පියවර ගන්නා බවද ඔහු කීවේය..
