බිලියන ගණනක මූල්ය වංචාවක් සම්බන්ධයෙන් රක්ෂිත බන්ධනාගාරගතව සිටින තිලිනි ප්රියමාලි නැමැති කාන්තාව දේශපාලකයකු සම්බන්ධ කරගෙන ගිය ඩොලර් වංචාවක් පිළිබඳවද විමර්ශනවලදී කරුණු අනාවරණය වී ඇති බව පොලිස් ආරංචි මාර්ග පවසයි.
ශ්රි ලංකාවට ඉන්ධන ගෙන්වීමේ අවසරය තම සමාගමට ලබා දී ඇති හෙයින් ඒ සඳහා ආයෝජනය කරන ලෙස විවිධ පුද්ගලයන් පොලඹවා ඔවුන්ගෙන් ඩොලර් ආයෝජන ලබා ගැනීමට ඇය කටයුතු කර ඇති බවත් ඒ සඳහා දේශපාලකයකුද සහය ලබා දී ඇති බවත් අනාවරණය වී තිබේ.
තෙල් අර්බුද සමඟ ඇය සිය ආයෝජකයන් වෙත දැනුවත් කර ඇත්තේ ඇයට අයත් තිකෝ සමූහ ව්යාපාරයට ඛනිජ තෙල් ගෙන්වීම සඳහා ලබාදී ඇති අවස්ථාවට ඩොර්වලින් ආයෝජනය කරන ලෙසත් ඊට සරිලන ප්රතිලාභ ලබා දෙන බවත්ය.
ඒ අනුව මෙලෙස ඇය වෙත විවිධ පුද්ගලයන් තමන් සතු ඩොලර් ලබා දී ඇති අතර ඒවා වෙළෙඳපොලේ පවතින මිලට වඩා අඩුවෙන් අලෙවි කොට ඇත. කෙසේ වුවද ඇය මෙම ඩොලර් ආයෝජනය කළ ඇතැම් පුද්ගලයන්ට කිසිදු ප්රතිලාභයක නොගෙවා වංචා කර ඇති බව අනාවරණය වී ඇත.
මුලදී මෙම පුද්ගලයන්ගේ විශ්වාසය දිනා ගැනීම සදහා යම් ප්රතිලාභ කොටසක් ලබා දුන්නද එයින් පසුව දිගින් දිගටම එය මඟ හැර කටයුතු කර ඇති බව පෙනී ගොස්තිබේ.
කෙසේ වුවද ඇයගේ මෙම වංචනික ක්රියා සම්බන්ධයෙන් මෙතෙක් ලැබී ඇති පැමිණිලි සංඛ්යාව 9ක් පමණ වන අතර මුදල් ආයොජනය කළ සහ ඇයට රැවටුණු බොහෝ දෙනකු තවමත් අපරාධ පරීක්ෂණ දෙපාර්තමේන්තුවට පැමිණිලි කොට නැති බව මෙම ආරංචි මාර්ග සඳහන් කරයි
