දිනසේන රතුගමගේ –
යාපනයේදී ඝාතනයට ලක් වූ ප්රාදේශීය මාධ්යවේදී නිමලරාජන් මයිල්වාගනම් මියගොස් වසර 25 ක් පිරීම නිමිත්තෙන් උතුරේ ස්ථාන ගණනාවක ඔහුව සිහිපත් කිරීම පිණිස ඊයේ (21) ගුණ සමරු උත්සව පවත්වනු ලැබීය.
උතුරේ ඒ ඒ දිස්ත්රික්කවල මාධ්ය සමාජ විසින් සංවිධානය කළ එම උත්සව සඳහා මියගිය නිමලරාජන්ගේ පවුලේ ඥාතීහු ද සහභාගී වී සිටියහ.
ගුණ සමරු උත්සවවලට සහභාගී වූවන් නිමලරාජන්ගේ ඡායාරූප වලට මල්දම් පලඳවා පහන් හා ඉටිපන්දම් දල්වා ඔහුට මෝක්ෂය ප්රාර්ථනා කළ අතර ඔහු පිළිබඳව සමරු දේශන කීපයක්ද පවත්වනු ලැබීය.
2000 වසරේදී යාපනයේ ඇදිරි නීතිය ක්රියාත්මක වූ කාල සීමාවකදී නිමලරාජන්ව ඝාතනය ලක්වූයේ ඔහුගේ නිවස තුළදීමය.
යාපනයේ කොලුම්පුතුරේ ප්රදේශයේ පිහිටි ඔහුගේ නිවසට බෝම්බ ප්රහාරයක් එල්ල කොට පසුව නිමලරාජන්ට වෙඩිතබා ඝාතනය කළ අතර සිද්ධිය සම්බන්ධව ඊ.පී.ඩී.පී. සාමාජිකයින් හය දෙනෙකුට චෝදනා එල්ල වී තිබුණි.
ඔවුන්ට අයත් පාපැදියක්ද නිමලරාජන්ගේ නිවස අසලින් හමුවූවත් ඉතා දීර්ග නඩු විභාගයකින් පසුව ඒ සැකකරුවන් සියලුම දෙනා නිදොස් කොට නිදහස් කරණු ලැබීය.
නිමලරාජන් ඝාතනයෙන් පසුව බියට පත් ඔහුගේ මව පියා බිරිද හා දරුවන් විදේශ රටකට පලාගිය අතර ඔවුන් තවමත් එහි ජීවත් වන නමුත් නිමලරාජන්ගේ ඝාතනය සම්බන්ධයෙන් මෙතෙක් යුක්තිය ඉටු වී නොමැත.
