වැලිගම ප්රාදේශීය සභාවේ සභාපති වෙඩි තබා ඝාතනය කිරීමේ සිදුවීම සම්බන්ධයෙන් දකුණ පළාත භාර ජ්යෙෂ්ඨ නියෝජ්ය පොලිස්පතිවරයාගේ උපදෙස් මත කණ්ඩායම් 4ක් මේ වනවිට පරීක්ෂණ ආරම්භ කර තිබෙන බව කැබිනට් තීරණ දැනුම් දිමේ මාධ්ය හමුව අතර පොලිස් මාධ්ය ප්රකාශක සහකාර පොලිස් අධිකාරි , එෆ්. යූ. වුට්ලර් පැවසීය.
ඔහු ප්රකාශ කළේ අදාළ ඝාතනය සඳහා උණ්ඩ 4ක් භාවිත කර ඇතැයි ද මුලික විමර්ශනවලදී අනාවරණය වී තිබෙන බවය.
වැලිගම ප්රාදේශිය සභාවේ සභාපති ලසන්ත වික්රමසේකර හෙවත් ‘මිදිගම ලසා’ අද (22) උදෑසන 10.30ට පමණ වෙඩි තබා ඝාතනය කරන්නේ ඔහුගේ නිල කාමරය තුළදී ය. සභාපතිවරයාගේ හිසට හා ගෙලට එල්ල වූ මාරාන්තික වෙඩි ප්රහාරවලින් බරපතළ තුවාල සිදුව මරණයට ලක් වි තිබිණි.
අද සභාපතිවරයාගේ මහජන දිනයක් වූ බැවින් ඔහුව හමුවීම සඳහා මහජනතාවට වෙලාව වෙන් කර තිබූ බව පොලීසිය පවසයි.
වෙඩික්කරු ද සාමාන්ය පුද්ගලයෙකු මෙන් සුදුපැහැති ඇඳුමකින් සැරසී, කළු පැහැති මුව ආවරණයක් පැළඳ ඔවුන් අතර රැඳී සිට සභාපතිවරයා හමුවීමට යන අයෙක් සේ කාමරයට ඇතුළු වී වෙඩි තබා පලාගොස් තිබිණි.
වෙඩි ප්රහාරයෙන් අනතුරුව වෙඩික්කරු යතුරුපැදියකින් පලා යන අන්දම සීසීටීවී දර්ශවනවල සටහන්ව තිබේ.
පොලිසිය පවසන්නේ මිදිගම ලසා යනු කුප්රකට මත්ද්රව්ය ජාවාරම්කාර හරක්කටා සමග ගනුදෙනු කළ ඔහුගේ සමිපතමයෙක් බවට මූලික විමර්ශනවලදී කරුණු අනාවරණය වී ඇති බවය.
