දුමින්ද දිසානායක මැගසින් බන්ධනාගාරයට යොමු කිරීමෙන් අනතුරුව බන්ධනාගාර රෝහලට ඇතුළත් කර ඇතැයි වාර්තා වේ.
අද විමර්ශන නිලධාරින් අධිකරණයට දන්වා සිටියේ අත් අඩංගුවට ගත් පසු සැකකාර දුමින්ද දිසානායක බන්ධනාගාර වෛද්යවරයා වෙත යොමු කළ බවත් සැකකරු රෝගී තත්ත්වකින් පෙළෙන්නේ යැයි වෛද්යවරයා විසින් තහවුරු කළ බවත්ය.
ඒ අනුව සැකකරු බන්ධනාගාර රෝහලට යොමු කරන බව විමර්ශන නිලධාරීහු අධිකරණයට දැන්වූහ.
අද දුමින්ද දිසානායක අධිකරණයට ඉදිරිපත් කළ පසු රන් ආලේපිත ගිනි අවිය සම්බන්ධව කරුණු දක්වමින් විමර්ශන නිලධාරීන් අධිකරණයට කීවේ මෙම ගිනි අවිය දුමින්ද දිසානායකගේ පියා ලඟ සිටි ප්රධාන ආරක්ෂක නිලධාරියා සන්තකයේ තිබුවක් යැයි මෙතෙක් සිදුකළ විමර්ශනවලින් අනාවරණය වී ඇති බවය.
අදාල ගිනි අවිය සැකකාරියන් වෙත සිය ගෘහ සේවයේ සිටි සේවකයෙක් හරහා භාර දීමෙන් පසු එම අවිය ආරක්ෂා සහිතව තබා ගන්නා ලෙස සැකකාර දුමින්ද දිසානායක දුරකථනයෙන් උපදෙස් දී ඇති බවත් මේ සම්බන්ධව දුරකථන දත්ත විශ්ලේෂණයක් ද සිදුකරමින් පවතින බව විමරශන නිලධාරීහු කීහ.
ප්රශ්න ගත ගිනි අවියට බලපත්රයක් තිබේද යන්න විමර්ශන කරන අතරම රස පරීක්ෂක වාර්තාවක් ද ගෙන්වා වැඩි දුර විමර්ශන කරන්න බලාපොරොත්තු වන බැවින් ද විමර්ශන තවමත් අවසන් වී නැති බැවින්ද සැකකරු රක්ෂිත බන්ධනාගාරගත කරන ලෙස විමර්ශන නිලධාරිහු අධිකරණයෙන් ඉල්ලා සිටියහ.
නමුත් සැකකාර දුමින්ද සිල්වා වෙනුවෙන් පෙනී සිටි ජනාධිපති නීතිඥවරුන්වන ෆයිසර් මුස්තාපා සහ සම්පත් මෙන්ඩිස් කියා සිටියේ සේවාදායකයා සම්බන්ධව විමර්ශන නිලධාරීන් එල්ල කරන සියලු චෝදනා ප්රතික්ෂේප කරන බවය. ස්වාධීන සාක්ෂි රහිතව සැකකරුවන්ගේ ප්රකාශ මත පුද්ගලයෙක් අත් අඩංගුවට ගෙන රක්ෂිත බන්ධනාගාරගත කිරීම ඉතාම බරතල තත්ත්වයක් බව ද ඔවුහු පෙන්වා දුන්හ.
අනතුරුව ජනාධිපති නීතිවරු ප්රකාශ කළේ දැනට මේ නඩුව ඇසෙන්නේ වැඩබලන මහේස්ත්රාත්වරයා ඉදිරියේ බැවින් ස්ථිර මහේස්ත්රාත්වරයා ඉදිරියේ ඇප ඉල්ලීමක් ගොනු කිරීමට තමන් බලාපොරොත්තුවන බවය.
කරුනු සලකා බැලූ මහේස්ත්රාත්වරයා සැකකරු මැයි 29 දක්වා රක්ෂිත බන්ධනාගාරගත කළේය.
